Ձեր վստահելի աղբյուրը

Սեպտեմբերի 9-ին Panorama.am-ը քաղաքացիներից ստացած ահազանգերի, հայտնած մտահոգությունների, պատվաստումներից հետո հիվանդացածների թվի, պատվաստման հակացուցումների մասին հարցեր էր ուղղել առողջապահության նախարարությանը։

Նախարարությունից խնդրեցին 30-օրյա ժամկետ՝ նշելով, որ պատասխանները կտրամադրեն հոկտեմբերի 8-ին, սակայն պատասխանները խմբագրության էլեկտրոնային փոստին ուղարկվեցին երեկ՝ հոկտեմբերի 12-ին։ Ի դեպ, այդքանից հետո էլ, նախարարության պատասխանները, որի ներքո ստորագրել է ԱՆ գլխավոր քարտուղարի տեղակալը, սպառիչ չեն, կիսատ-պռատ են։ Նախարարությունում, ըստ երևույթին, ալարել են աշխատել։

Ներկայացնում ենք Panorama.am-ի հարցերն ու նախարարության պատասխանները.

Panorama.am- Սեպտեմբերի 9-ի դրությամբ Հայաստանում կորոնավիրուսի հետևանքով 4968 քաղաքացի է մահացել։ Նրանցից քանի՞սն ենք կանայք, քանի՞սն են տղամարդ։ Խնդրում ենք ներկայացնել սեռատարիքային վերլուծություն։ Նրանցից քանի՞սն են հղիներ։ Մահացածներից քանի՞սն են պատվաստված եղել։

Panorama.am- Սեպտեմբերի 9-ի դրությամբ Հայաստանում կորոնավիրուսով 1169 հիվանդ է մահացել այլ պատճառով։ Խնդրում եմ ներկայացնել առավել հաճախ արձանագրված հինգ պատճառները։ Նրանցից քանի՞սն ենք կանայք, քանի՞սն են տղամարդ։ Խնդրում եմ ներկայացնել սեռատարիքային վերլուծություն։ Նրանցից քանի՞սն են հղիներ։ Մահացածներից քանի՞սն են պատվաստված եղել։

ԱՆ-Առաջին և երկրորդ հարցերի վերաբերյալ հայտնում ենք, որ մահացության վերաբերյալ վիճակագրական տեղեկատվության տնօրինողը Հայաստանի Հանրապետության վիճակագրական կոմիտեն է։ Միևնույն ժամանակ հայտնում եմ, որ Հայաստանի Հանրապետությունում կորոնավիրուսային հիվանդության դեմ պատվաստումների հետ պատճառահետևանքային կապ ունեցող մահվան դեպքեր չեն գրանցվել:

Panorama.am- Սեպտեմբերի 5-ի դրությամբ` կատարվել է 303325 պատվաստում, որից առաջին դեղաչափ` 195290, երկրորդ դեղաչափ` 108035։ Պատվաստումից հետո քանի՞ մարդու մոտ է արձանագրել կորոնավիրուս (խնդրում եմ առանձին ներկայացնել հիվանադացների թիվը առաջին դեղաչափից և երկրորդ դեղաչափից հետո)։ Պատվաստումից հետո քանի՞ մարդ է հոսպիտալացվել հետագա բարդությունների հետևանքով։

ԱՆ- Հոկտեմբերի 7-ի դրությամբ առկա ակտիվ դեպքերի մեջ 176 պատվաստված անձ ունի հիվանդանոցային բուժման կարիք։

Panorama.am- Նախարարությունում ինչպե՞ս են բացատրում փաստը, որ կանայք ավելի շատ են պատվաստվում։

ԱՆ- Ցուցանիշների մեջ չկա էական շեղում, որը կարող է պատճառահետևանքային կապի հայտնաբերման նպատակով լրացուցիչ հետազոտության իրականացման հիմք հանդիսանալ։

Panorama.am- Երկրորդ դեղաչափով պատվաստման ժամանակ եղել են դեպքեր, երբ պոլիկլինիկան չի ունեցել  համապատասխան  պատվաստանյութ։  Առաջին  պատվաստումից  հետո պատվաստվողների  համար  երկրորդ  դեղաչափի  պատվաստման  անհրաժեշտ  չափով պատվաստանյութ պահվո՞ւմ է՝ նման խնդիրներից խուսափելու համար։

ԱՆ- Հայաստանի Հանրապետության քաղաքացիների կորոնավիրուսային հիվանդության (COVID-19) դեմ պատվաստումները կատարվում են անկախ կցագրումից բոլոր բժշկական կազմակերպություններում և հնարավոր է շատ կարճ ժամանակով որոշ ԲԿ-ներում կորոնավիրուսային հիվանդության դեմ պատվաստանյութեր առկա չլինեն, որոնք սակայն շատ արագ համալրվում են:

Panorama.am- Հայաստանում  գրեթե  բոլոր  պետական  մարմիններում,  կազմակերպություններում, ընկերություններում  աշխատակիցներին  ստիպում  են  պատվաստվել,  մինչդեռ նախարարությունը հայտարարում է պատվաստումը կամավոր է։ Ինչո՞ւ։

ԱՆ- Հայաստանի Հանրապետությունում պատվաստումները պարտադիր չեն, համաձայն հոկտեմբերի 1-ից ուժի մեջ մտնող օրենսդրական կարգավորումների՝ աշխատակիցները յուրաքանչյուր 14 օրը մեկ պետք է ներկայացնեն կորոնավիրուսային հիվանդության (COVID-19) ախտորոշման պոլիմերազային շղթայական ռեակցիայի հետազոտության արդյունքը հավաստող առավելագույնը 72 ժամ վաղեմության սերտիֆիկատ, բացառությամբ ամբողջական պատվաստված, մեկ դեղաչափ պատվաստված, փաստագրված բացարձակ հակացուցում ունեցող աշխատողների և հղիների։

Panorama.am- Պատվաստվածներից քանի՞սն են հղիներ։

ԱՆ- 2021 թվականի սեպտեմբերի 24-ի տվյալներով՝ պատվաստվածներից 23-ը հղի են:

Panorama.am -Պատվաստման համար որո՞նք են հակացուցումները։

ԱՆ- Պատվաստման հակացուցումներն են՝ Հայաստանում կորոնավիրուսային հիվանդության դեմ կիրառվող կանխարգելիչ պատվաստումների բժշկական հակացուցումները նույնն են, ինչ բոլոր պատվաստումների դեպքերում: Պատվաստումների միակ բացարձակ հակացուցումը տվյալ պատվաստանյութի նախորդ դեղաչափից առաջացած անաֆիլաքսիան է: Անաֆիլաքսիան պատվաստանյութի կամ պատվաստանյութի որևէ բաղադրիչի նկատմամբ լուրջ ալերգաբանական ռեակցիան է` տարածուն եղնջացան, սուլող շնչառություն, բերանի խոռոչի, կոկորդի այտուց, դժվարացած շնչառություն, հիպոթենզիա և շոկ:

Պատվաստման ժամանակավոր հակացուցումներ են՝ սուր հիվանդությունները՝ միջին և ծանր ընթացքով, ինչպես նաև քրոնիկ հիվանդությունների սրացումը: Հղիությունը պատվաստման հակացուցում չէ՝ հղիները ներառվել են կորոնավիրուսային հիվանդության դեմ պատվաստումների ռիսկի խմբերում: Խորհուրդ չի տրվում հետաձգել հղիության պլանավորումը կամ էլ պատվաստման պատճառով ընդհատել հղիությունը: Եթե հղին պատվաստվել է առանց տեղեկացված լինելու հղիության մասին, ապա պատվաստումն անվտանգ է մոր և պտղի առողջության համար և հղիությունն ընդհատելու ցուցում չէ: