Ձեր վստահելի աղբյուրը

«Տիկին նախարար, ձեր խոսքի սկզբում ասացիք, որ պետք չէ մեղավորներ փնտրել, սակայն հետո նշեցիք, որ կար թերացում, խուճապ, որի հետևանքով մեր պատմամշակութային  ժառանգությունը չկարողացանք ամբողջությամբ դուրս բերել։ Խնդրում եմ ասել՝ ով է թերացել, ով է խաճապահար եղել»,- ՀՀ ԱԺ-ում «Արցախի Հանրապետության՝ ադրբեջանական վերահսկողության տակ հայտնված շրջաններում հայկական պատմամշակութային և կրոնական ժառանգության պահպանություն» թեմայով կազմակերպված աշխատանքային քննարկմանն ասաց «Հայաստան» խմբակցության պատգամավոր Արեգնազ Մանուկյանը՝ դիմելով Արցախի կրթության, գիտության և մշակույթի նախարար Լուսինե Ղարախանյանին։ 

Պատգամավորի խոսքով, մեզ մոտ կարծես արդեն ավանդույթ է դառնում՝ «ես պատասխանատու եմ, բայց մեղավոր չեմ» կոնցեպտը. «Խնդրում եմ հստակ ասել՝ ստեղծված իրավիճակի համար ո՞վ է թիվ մեկ  մեղավորն ու պատասխանատուն, այո, ես պնդում եմ, որի հետևանքով մենք մեր պատմամշակութային ժառանգությունը նվիրեցինք թշնամուն»։

Նախարար  Լուսինե Ղարախանյանի կարծիքով, բոլորն են պատասխանատու՝ սկսած իրենից։ 

«Ես ասացի՝ Հադրութի պատմամշակութային ժառանգությունն ուղղակի անհնար էր տարհանել, այնտեղ մարդկանց տարհանման  խնդիր կար, քաղաքացիական անձինք են Հադրութում զոհվել։ Իսկ Շուշիի մասով, մենք Կերենի դամբարանադաշտի ցուցանմուշները, գորգերի ցուցադրությունը հանել ենք։ Շուշիի պատմության թանգարանի տնօրենը, իմ հրահանգը նրան բանավոր է եղել, չի տարհանել ցուցանմուշները՝ վստահ լինելով, որ Շուշին ամենաապահովն է, նույնիսկ շատ մարդիկ իրենց աղջիկների օժիտն էին տարել Շուշիում պահել որպես ապահով վայր։ Իհարկե, սա արադարացում չէ։

Գուցե նաև տեղեկատվությանը ճիշտ չտիրապետելու հետևանքով է այսպես ստացվել, բայց այն պահին, երբ հասկացել ենք, որ պետք է տարհանվեն, եղել է շատ վտանգավոր»,- ասաց Արցախի ԿԳՄ նախարարը։

Նշվեց, որ Արցախի քննչական կոմիտեում 334-րդ հոդվածով քրեական գործ է հարուցել, նախաքննության փուլում է, ավարտից հետո հարցերին հնարավոր կլինի հստակ պատասխան տալ։

Արեգնազ Մանուկյանի կարծիքով, այսօրվա քննարկումը ևս մեկ անգամ եկավ ապացուցելու այն, որ մենք մեր պատմամշակութային ժառանագությունը թողել ենք թշնամուն, առնվազն համակարգային անփութության, հանցավոր անգործության, անտարբերության, գուցե նաև միտումնավորության հետևանք է։

«Ուզում եմ ընդգծել, որ այսպիսի մոտեցումը ոչ միայն եղել է մեր պատմամշակութային ժառանգության նկատմամբ, նաև մեր զինծառայողների նկատմամբ, քանի որ այդ օրերին մենք մեր  տարածքները հանձնում էինք թշնամուն, բայց մեր տղաներին այնտեղից դուրս չէինք բերում կամ թողնում էինք շրջափակման մեջ։ Այսինքն՝ այս անտարբեր, անթույլատրելի մոտեցումը ոչ միայն մեր պատմամշակութային ժառանագության նկատմամբ է եղել, նաև մեր զինծառայողների»,- ասաց «Հայաստան» խմբակցության պատգամավորը։

Նրա խոսքով, ինչ էլ հնարավոր է եղել փրկել, մեծամասամբ եղել է անհատների ջանքերի, սեփական նախաձեռնության, սրտացավության արդյունքում, ոչ համակարգային մոտեցման կամ  իշխանությունների կազմակերպվածության։

«Կարծում եմ՝ այս իրավիճակը հնարավոր է ամբողջությամբ պարզել անխուսափելի իշխանափոխությունից հետո, քանի որ իշխանությունը չի կարող իրեն մեղադրել մի բանի համար, որն ինքն է կատարել»,- ասաց Ա. Մանուկյանը։