Ձեր վստահելի աղբյուրը

ՀՀ կառավարությանն այսօր չզեկուցվող հարցերի շարքում որոշում ընդունեց, որով ՀՀ պետական բյուջեից 2,242,223,800 դրամի չափով բյուջետային վարկ տրամադրվեց «Հայկական ատոմային էլեկտրակայան» ՓԲԸ-ին:

Նախագծի հիմնավորման մեջ ասվում է. «Հանրային ծառայությունները կարգավորող հանձնաժողովի 2020 թվականի դեկտեմբերի 29-ի թիվ 485Ա որոշմամբ հաստատված «ՀԱԷԿ» ՓԲԸ 2021-2022թթ. էլեկտրաէներգիայի (հզորության) սակագնում ատոմակայանի 2-րդ էներգաբլոկի շահագործման նախագծային ժամկետի երկարաձգման աշխատանքների ֆինանսավորման նպատակով ներգրավված վարկերի մարման և սպասարկման ծախսեր հոդվածով պակաս է նախատեսվել 10,187.17 մլն դրամ, որի հետևանքով 2021-2022թթ. սակագնային տարում ընկերությունում կառաջանա ֆինանսական ճեղքվածք:

Վերը նշված որոշման 2-րդ կետի 2-րդ ենթակետի համաձայն ֆինանսական ճեղքվածքի մասնակի փոխհատուցման անհրաժեշտությամբ պայմանավորված ՀՀ պետական բյուջեից ի օգուտ «Հայկական ատոմային էլեկտրակայան» ՓԲԸ-ի անհրաժեշտ է ներգրավել 2,242,223,800 դրամի չափով ֆինանսական միջոցներ»:

Ըստ նախագծի ուղեկցող գրության՝ վարկը կուղղվի ատոմային էլեկտրակայանի շահագործման ժամկետի երկարաձգման աշխատանքների ֆինանսավորման համար ներգրավված վարկերի մարման և սպասարկման ծախսերի փոխհատուցմանը, ինչն էլ կբերի կայանի 2021 թվականի ընթացքում երկարատև` 141 օր կանգառով պայմանավորված դրամական հոսքերի պակասորդի մեղմմանը: