Ձեր վստահելի աղբյուրը

«Հանրահայտ իրողություն է. երբ թույլ, վախկոտ մարդն իշխանություն է ստանում, տիրապետում է  ուժային լծակների, դառնում է  հասարակության համար վտանգավոր»,- ասաց ԱԺ «Հայաստան» խմբակցության պատգամավոր Աղվան Վարդանյանը Այլընտրանքային նախագծեր խմբի կազմակերպած «Դեպի բռնապետություն. Հետընթաց իրավունքներից» թեմայով պանելային քննարկման ժամանակ։

Նրա խոսքով, նման դեպքերում հասարակությունը պաշտպանվելու քիչ միջոցներ ունի, հիմնականում իրավական համակարգն է, իրավունքների և ազատությունների իրացվելիությունը:

«ՍԴ-ի վահե գրիգորյանացումից, դատական համակարգի՝ գագիկ ջհանգիրյանացումից հետո և ընթացքում բնական էր, որ հաջորդ թիրախը լինելու էր խոսքի, մամուլի ազատությունը, լրատվամիջոցներն էին դառնալու թիրախ: Հատկանշական մի հանգամանք. այս իշխանության կարճ ժամանակահատվածում շատ երկար ժամանակ ապրել ենք արտակարգ դրության և ռազմական դրության պայմաններում, ինչը նման իշխանությանը հնարավորություն է տվել էլ ավելի սեղմել օղակները»,- ասաց Ա. Վարդանյանը:

Նա նշեց, որ սրանք խոսքի ազատության, մամուլի հանդեպ ճնշումների երկու ուղղություն են կիրառում՝ արգելել որոշ թեմաներով հրապարակումները, երկրորդ՝ նվազեցնել լրատվամիջոցների, մամուլի ֆինանսական մուտքերը, եկամուտները:

«Հայաստան» խմբակցության պատգամավորն առանձնացրեց վիրավորանքի, զրպարտության քրեականացման օրենքը, գովազդների սահմանափակումը, ԱԺ նախագահ Ալեն Սիմոնյանի հեղինակած օրենքը վիրավորանքի համար՝ տուգանքները կտրուկ մեծացնելով մինչև 6 միլիոն:

Աղվան Վարդանյանը տեղեկացրեց, որ իր նախաձեռնությամբ «Հայաստան» դաշինքը վիրավորանքի քրեականացման օրենքը ուժը կորցրած ճանաչելու մասին օրենսդրական նախաձեռնությամբ է հանդես եկել, դրվել է շրջանառության մեջ: 

«9 էջում կետ առ կետ հիմնավորվում է, թե այս օրենքը և հակասահմանադրական է, և հակասում է մարդու իրավունքների և ազատությունների կոնվենցիային»,- նշեց նա:

Ընդդիմադիր պատգամավորն ընդգծեց՝ այս իշխանության միակ խնդիրն է՝ երկարաձգել գոյությունը, այսինքն՝ շարունակելու է  ճնշումները, այդ թվում խոսքի ազատության, մամուլի դեմ: Ըստ նրա, հակաքայլերի մասին պետք է մտածեն իրենք:

«Այս իշխանությունը մեկ անձի իշխանություն է, ցանկացած քայլ կատարվում է մեկ անձի հրահանգով: Խորապես համոզված եմ՝ ի վերջո այդ մարդու վզից կախվելու է ժանգոտ կողպեք, ճակատին դաջվելու է նաև մամուլի թշնամի դրոշմը»,- ասաց Աղվան Վարդանյանը: