Ձեր վստահելի աղբյուրը

Եվրոպայի խորհրդի Կոռուպցիայի դեմ պայքարող պետությունների խմբի (ԳՐԵԿՈ) պահանջի մասին այսօր հիշեցրեց իրավապաշտպան, Արցախի նախկին ՄԻՊ, արդարադատության նախկին փոխնախարար Ռուբեն Մելիքյանը։

«Սեպտեմբերի 22-ին այն վերահաստատեց իր պահանջը, որ արդարադատության նախարարը զրկվի դատավորին կարգապահական պատասխանատվության ենթարկելու հարցով Բարձարգույն դատական խորհուրդ միջնորդություն ներկայացնելու հնարավորությունից»,- ասաց նա՝ ավելացնելով, որ ԲԴԽ-ն նախարարի մի քանի միջնորդություններ մերժել է։

Ռուբեն Մելիքյանն ընդգծեց, որ քաղաքական ղեկավարությունը ոչ միայն չի պատրաստվում հարգել միջազգային գործընկերների դիրքորոշումը, այլև կարծում է, որ ավելի շատ կարգապահական վարույթներ պետք է հարուցել դատավորների նկատմամբ։

Նախկին փոխնախարարը հիշում է, իր պաշտոնավարման ընթացքում միջազգային գործընկերները գալիս ու կռիվ էին անում՝ պահանջելով, որ թույլ չտան այն ժամանակ արդարադատության խորհուրդին, հիմա՝ ԲԴԽ-ին դատական ակտերի համար դատավորիներին պատասխանատվության ենթարկել։

«Ասում էին՝ դա հնարավոր է բացառիկ դեպքերում։ Պահպանվեց այդ հնարավորությունը, գրվեցին ուժեղ բառեր, բայց ուժեղ բառերով խնդիր չի լուծվում, հիմա մենք տեսնում ենք, թե ինչպես է դա չարաշահվում։ Բայց մենք հիմա չենք տեսնում նույն արձագանքը միջազգային կառույցների կողմից»,-ասաց նա։ 

Իրավապաշտպանն ընդգծեց, այո, կան վատ դատավորներ, որոնց օր առաջ պետք է ազատել դատավորի պատմուճանից, իրավունք չունեն արդարադատություն իրականացնել, սակայն արդարադատության նախարարը կարգապահական վարույթ է հարուցում դատավոր Սերգեյ Մարաբյանի նկատմամբ։

«Ինձ թվում է չկա մի երկիր՝ եվրոպական, ամենազարգացած, որի դատական համակարգում Սերգեյ Մարաբյանը չէր փայլի իր գիտելիքներով, շիտակությամբ, կեցվածքով, արժեքներով։ Նա ձևավորել է անկախ դատավորի մոտեցում, դա հեշտ բան չէ»,- նշեց նա։