Ձեր վստահելի աղբյուրը

«Առուշ Առուշանյան» դաշինքի շտաբում խուզարկությունն ավարտվել է։ Այս մասին լրագրողներին հայտնեց Առուշ Առուշանյանի պաշտպան Արմեն Մելքոնյանը:

«Ըստ իս՝ ոչինչ չեն գտել։ Իրենք էլ հակված չեն, որ իրենք  ինչ-որ մի բան են գտել։ Առգրավել են 28 թերթ տարբեր փաստաթղթեր, նշումներ»,- ասաց նա։

Հիշեցնենք՝ ավելի վաղ Ա. Մելքոնյանը տեղեկացրել էր, որ  այսօր ոստիկանները «Առուշ Առուշանյան» դաշինքի շտաբում խուզարկություններ են անում իբր ընտրակաշառք բաժանելու դեպքով հարուցված քրեական գործի շրջանակներում, «իբր Առուշ Առուշանյանի հայրը՝ Գագիկ Առուշանյանը 2021 թվականի հոկտեմբերի  16-ին ընտրակաշառք է բաժանել:

Ա. Մելքոնյանն ընդգծեց՝ այս ամբողջ խուզարկության գործընթացն ապօրինի է։

«Երևան քաղաքի ընդհանուր իրավասության առաջին ատյանի դատարանը թույլ էր տվել խուզարկություն կատարել ընդամենը մեկ օր ոստիկանության Գորիսի բաժնի աշխատակիցներին։ Խուզարկությունը փաստացի իրկանացրեցին ՀՀ ոստիկանության կոռուպցիայի վարչության աշխատակիցները, որն օրենքի կոպտագույն խախտում է, քանզի դատարանը գրել որ, որ թույլատրում է  խուզարկությունը կատարեն Գորիսի բաժնի աշխատակիցները»,- ասաց պաշտպանը։

Նա նշեց, որ առգրավեցին անձնական բնույթի նամակներ, որի իրավասությունը դատարանը ոստիկաններին թույլ չէր տվել. «Ինչ որ անձ  իր հարազատին նամակ էր գրել, դատարանը հստակ մատնանշել էր, թե ինչ իրավունք ունեն առգրավել  խուզարկության ժամանակ։ Բայց մեր հորդորներին ի  հակառակ, ոստիկանության աշխատակիցներն առգրավեցին անձնական բնույթի նամակներ։ Ընդ որում նամակում հետաքրքիր մտքեր է գրված, որը մեզ շատ ձեռնտու է։ Ինչ որ անձ գրում է՝ եթե իշխանությունները հանկարծ փող չբաժանեն,  100 տոկոսով Առուշանյանը հաղթելու է»։

Առուշանյանի պաշտպանն ասաց, որ 3,5 ժամ շտաբի աշխատակիցները չկարողացան օգտվել իրենց համակարգիչներից, թեև շատ գործ կար անելու։

«Փաստացի այս ամեն ինչն ուղղված էր կազմալուծելու «Առուշ Առուշանյան» դաշինքի շտաբի գործունեությունը»,- ասաց Ա. Մելքոնյանը։

Նա նաև նաև հայտնեց, որ ոստիկանները օրենքի պահանջի համաձայն այստեղ բերել էին ընթերականներ առանց ճշտելու նրանց ինքնությունը.

«Վերջում պարզվեց ընթերականներից մեկը հայերենի չի տիրապետում։ Արձանագրության տակ ոստիկանը հայերեն չիմացող ընթերակայի փոխարեն իր ձեռքով գրում է անուն ազգանունը։  Այս արձանագրությունն ու արված գործողություններն իրավական որևէ հետևանք չունեն»։

Ա. Մելքոնյանը վստահեցրեց՝ «Առուշ Առուշանյան» դաշինքն ու նրա թիմակիցները պահպանել են օրենքի տառը, թե ով չի  պահպանել, բոլորին պարզ տեսանելի է։

Նա հայտնեց, որ Գագիկ Առուշանյանը հարցաքննության չի կանչվել, այս պահի դրությամբ ծանուցագիր չի ստացել։

«Առուշանյանը որևէ հանցանք չի կատարել, հերթական ապատեղեկատվությունն է։ Ցավոք սրտի, իրավապահ մարմիններից ոմանք այսպիսի գործալաճ են որդեգրել։ Ինչ է նշանակում օպերատիվ տեղեկություններ ենք ստացել, ստուգեիք, նոր գայիք,  այս շոուն կազմակերպեիք։

Կարծում եմ՝ մի քանի ժամ անց  շտաբի մոտ հավաքված գորիսեցիները ցնծալու են  իր հաղթանկի առթիվ»,- ասաց նա։

Ա. Մելքոնյանը կարծում է, որ Առուշ Առուշանյանը կարճ ժամանակ հետո կլինի ազատության մեջ ու կղեկավարի իր համայնքը։