Ձեր վստահելի աղբյուրը

«Իշխանությունն ասում է՝ Արցախի հետ կապված հարցերով մեզ մի դիմեք, այսինքն նրանք իրենց ձեռքերն արդեն լվացել են և որևէ պատասխանատվություն, բացի հումանիտար բնույթի հարցերից, իրենց վրա  չեն զգում»,- ԱԺ-ում ճեպազրույցում ասաց «Պատիվ ունեմ» խմակցության պատգամավոր, անվտանգության հարցերով փորձագետ  Տիգրան Աբրահամյանը:

Նրա խոսքով,  հումանիտար, սոցիալական ուղղվածության գործառույթներն էլ իրականացվում են մեկ նպատակով՝ թույլ չտալ, որպեսզի իրենց իշխանությունն այստեղ որևէ ձևով խնդիրներ ունենա,  այսինքն սոցիալական դժգոհություն նոր օջախներ չստեղծվեն: 

Տ.Աբրահամյանն ասաց, որ Արցախում տեղակայված  ռուսական խաղաղապահ զորախումբն ունի անվտանգություն ապահովելու գործառույթ, բայց դրան զուգահեռ  կա  պաշտպանության  բանակ, որի արդիականացումն այսօր հրատապ է, մարտունակություն բարձրացմանն ուղղված հարցերն առաջանային են, պետք է իրականացվեն, այսինքն ցանկացած իրավիճակի համար պետք է ունենանք լուծումներ:

Նա հիշեցրեց, որ խաղաղապահ զորախումբը 5 տարի ժամկետով է, և հայտնի չէ, թե հետո քանի անգամ կերկարաձգվի, սցենարային առումով ինչ կլինի 5, 10,20 տարի անց:

«Ցանկացած պարագայում Արցախի պաշտպանության բանակը, ՀՀ զինված ուժերը պետք է ունենան այնպիսի մակարդակ, որն առաջին հերթին կկանխի արյունահեղությունը, լայնամաշստաբ պատերազմն Արցախում, կկարողանա պատերազմի ժամանակ ապահովել Հայաստանում և Արցախում  ապրող մեր հայրենակիցների անվտանգությունը»,- ասաց Տ. Աբրահամյանը:

Հարցին, թե սահմանազատման աշխատանքների հետ կապված պատգամավորը հարցով դիմել էր Նիկոլ Փաշինյանին,  թե հնարավո՞ր է Արցախից մի շարք գյուղեր անցնեն հակառակորդի տիրապետության տակ, նա էլ պատասխանել էր, որ տեղանուններով չի պատկերացնում, քարտեզներով պետք է աշխատել, Տ. Աբրահամյանն ասաց, որ գրավոր է դիմել նույն հարցով, պատասխանել է՝ այդ թեմայով դեռևս բանակցություններ չեն տարվում:

«Այսինքն, իշխանությունը չի երաշխավորում, որ  բանակցությունների վերսկսման պարագայում, իսկ դա նախատեսված էր առաջիկա երեք տարվա համար, չի ունենալու սկզբունքային դիրքորոշում չընտրելու, չհաստատելու  մի այնպիսի ճանապարհ, որի պայմաններում Շուշիի և Քաշաթաղի  շրջանի այդ բնակավայրերը չեն հայտնվի  Ադրբեջանի վերահսկողութան տակ: Կամ՝ այս իշխանությունն արդեն  պայմանավորվել է  հանձման շուրջ կամ հնարավորությունը չի տեսնում այնպիսի բանակցություններ վարելու, որի պայմաններում այդ բնակավայրերը չեն հանձնվի Ադրբեջանին»,- ասաց Տիգրան Աբրահամյանը: