Ձեր վստահելի աղբյուրը

«Պատիվ ունեմ» խմբակցության պատգամավոր, ԱԺ պաշտպանության և անվտանգության մշտական հանձնաժողովի անդամ Տիգրան Աբրահամյանը պաշտպանության նախարարին ուղղված գրության պատասխանը ստացել է: Լրագրողների հետ ճեպազրուցում նա ասաց, որ հարցադրումներ էր արել՝ արդյո՞ք 44-օրյա պատերազմի հետ կապված  անհրաժեշտ վերլուծություններ իրականացվել են, որո՞նք են եղել  հիմնական խնդիրները,  դրանց կարգավորմանն ուղղված ի՞նչ աշխատանքներ են  իրականացվում:

«Գրության մեջ նշվում է, որ Զինված ուժերի Գլխավոր շտաբում շարունակվում են 44-օրյա պատերազմի համապարփակ վերուծության աշխատանքները, վերջինիս  արդյունքների հիման վրա ԶՈւ-ն իրականացնում է կառուցվածքային և  բովանդակային  խորքային բարեփոխումների  գործընթաց, որը ենթակա չէ հրապարակման»,- պաշտպանության նախարարի պատասխանից մեջբերումներ արեց ընդդիմադիր պատգամավորը:

Նա նշեց, որ մի քանի տողանոց գրությունում տեխնիկական առումով կան մեծ հակասություններ. «Մի կողմից նշվում է՝ համապարփակ վերլուծությունը շարունակվում է, մյուս կողմից նշվում է դրանց արդյունքի հիման վրա  ԶՈւ-ն  կառուցվածքային  և բովանդակային խորքային բարեփոխումների գործընթաց է  իրականացնում: Եթե  այդ աշխատանքներն ամբողջությամբ չեն  արվել, ինչպե՞ս կարելի է համակարգում փոփոխություններ իրականացնել:

Ես ինքս դիմել եմ որպես պաշտպանության և անվտանգության մշտական հանձնաժողովի անդամ, և պարզվում է, որ այդ տեղեկատվությունը ոչ միայն փակ է քաղաքացիների համար,  նաև պաշտպանության հանձնաժողովի անդամների համար»:

Տ. Աբրահամյանը նշեց, որ խոսվում է երկրում բարեփոխումների արմատական, խորքային գործընթացի մասին, սակայն չի  կարող երկրում  խորքային այնպիսի մեծ բարեփոխում տեղի ունենա, որի մասին որևէ մեկը չիմանա: Բացի այդ, ըստ նրա, եթե կա հայեցակարգ, որի մասին խոսվում է, մինչև հիմա այն չի շրջանառվել խորհրդարանում, գոնե հանձնաժողովում նույնիսկ փակ քննարկումներ չեն եղել:

«Այս պատասխանն ու Զինված ուժերի Գլխավոր շտաբին ուղղված իմ գրությանը չպատասխանելու  պարագան ինձ ավելի շատ հուշում են, որ իրականում լուրջ աշխատանք չի տարվում, Հայաստանի  քաղաքացին այսօր որևէ ձևով պաշտպանված չէ, խոսքը վերաբերում է և սահմանամերձ հատվածում ապրող մեր հայրենակիցների մասին և առհասարակ: Եթե անվտանգությանը,  պետությանը  վերաբերող հարցերին այս իշխանությունը մոտենում է  այս ձևով, ապա ադրբեջանական կամ թուրքական ցանկացած ագրեսիայի  պարագայում շատ շուտ Հայաստանի բոլոր բնակավայրերը կվերածվեն  սահմանամերձի, դա էլ լավագույն պարագայում: Իրականում իշխանությունն  անվտանգության վերականգնման ուղղությամբ որևէ  լուրջ աշխատանք չի իրականացնում»,-ասաց Տիգրան Աբրահամյանը:

Նա նշեց, որ Փաշինյանն ու այս իշխանությունը պատերազմի հետևանքով ու դրանից հետո 10 շրջան հանձնեցին,  հետո էլ սկսել են «խաղաղության» դարաշրջանը, այսինքն՝  խաղաղություն  ասվածը ենթադրում է, որ մեր կորուստներն ուղղակի լինելու են խաղաղ ճանապարհով, ոչ թե ռազմական:

«Մենք զիջում ենք կամ կորցնում ենք ոչ միայն մեր տարածքները, մենք կորցնում ենք որպես պետություն վերականգնվելու, մրցունակ դառնալու, 5-15 տարի անց մեր ռեգիոնում  որպես  կենսունակ երկիր ներկայանալու հնարավորությունը»,- ասաց նա:

Խոսելով 44-օրյա պատերազմի հանգամանքները քննող հանձնաժողովից ակնկալիքների մասին, ընդդիմադիր պատգամավորն ասաց, որ գործընթաց դեռևս չկա, հանձնաժողովը չի ձևավորվել, բացի այդ փորձագետի անվան տակ փորձում են ներգրավել անձանց, որոնք իրականում ոչ թե փորձագետներ են,  այլ քաղաքական դեմքեր, որոնք  ընտրություններից առաջ և հետո այս կամ այն ձևաչափով շփումների մեջ են եղել իշխանության հետ:

Ինչ վերաբերում է երեկ Գորիսում տեղի ունեցած ընտրությանը, Տիգրան Աբրահամյանն ասաց, որ այդ ընտրության արդյունքը  գորիսեցիների և Գորիս խոշորացված համայնքի մեր հայրենակիցների պատասխանն է այս  իշխանության՝ անվտանգության ոլորտում իրականացրած քաղաքականությանը, քանի որ Գորիսն ու նրա հարակից բնակավայրերը պատերազմից հետո դարձել են սահմանակից, իրենց վրա են զգում ադրբեջանական լկտիություններն ու ագրեսիայի բոլոր հետևանքները: