Ձեր վստահելի աղբյուրը

«Խորամուխ չլինելով հարցիս բովանդակության մեջ ԱԱԾ-ն պատասխանել է, որ սահմանապահ զորքերը շարունակում են ծառայություն իրականացնել պետական սահմանի նշված հատվածում»,- ԱԺ Պաշտպանության և անվտանգության հարցերով մշտական հանձնաժողովի նիստում անդրադառնալով Փայալասարի վերահսկողությունն ադրբեջանցիներին անցնելու մասին իր ահազանգին տված ԱԱԾ-ի պատասխանին՝ հայտարարեց «Հայաստան» խմբակցության պատգամավոր Աննա Գրիգորյանը:

Նրա խոսքով՝ իրեն հայտնի է, որ ադրբեջանցիները սարի վրա հայտնվել են GPS սարքի միջոցով, առանց սահմանի հստակ դելիմիտացիայի և պաշտպանության փոխնախարար Արման Սարգսյանին հարցրեց, թե երբ է տեղի ունեցել պետական սահմանի ճշգրտում, որ հասարակությունը դրան ականատես չի եղել:

«Հիմա ինչո՞ւ է ԱԱԾ-ն պետական սահմանի մասին խոսում, երբ այն դեռ ձևավորված չէ»,- հարցրեց պատգամավորը:

«Եթե դուք այդ պատասխանի մեջ մտահոգություններ եք տեսնում, ապա ԱԱԾ-ն կփարատի Ձեր մտահոգությունները, կամ կտա կողմնորոշիչ մեկնաբանություններ»,- պատասխանեց ՀՀ պաշտպանության նախարարի տեղակալ Արման Սարգսյանը և անմիջապես էլ հայտարարեց, որ սահմանազատում և սահմանագծում չի իրականացվել:

Փոխնախարարը նաև նկատեց, որ Պաշտպանության և անվտանգության հարցերով հանձնաժողովում հնչած ոչ մի հարց էլ չէին վերաբերում իր ներկայացրած «Պետական սահմանի մասին» օրենքում լրացումներ կատարելու նախագծին:

Ըստ Աննա Գրիգորյանի՝ հարցերի առատության պատճառն այն է, որ արդեն երկու ամիս է ՊՆ ներկայացուցիչները խուսափում են գալ ԱԺ և մասնակցել հնչող հարցերի վերաբերյալ նախաձեռնվող քննարկումներին: 

«Հայաստան» խմբակցության պատգամավորը նկատեց՝ իր հարցն էլ հենց դա է եղել, որ եթե պետական սահման չկա, ապա ԱԱԾ-ի պատասխանը լեգիտիմացնում է այն, որ ադրբեջանցիները գտնվում են ճիշտ այն դիրքերում, որտեղ պետք է գտնվեին:

Արման Սարգսյանն էլ պնդեց, որ եթե անգամ ԱԱԾ-ն սխալվել է, ապա պատգամավորը հարցը բարձրացնելով լեգիտիմացնում է սխալը և պետք էր այն աշխատանքային կարգով քննարկել:

Ընդդիմադիր պատգամավորները ստիպված կրկին տեղից բարձրաձայնեցին, որ երկու ամիս է նման քննարկում են խնդրում ՊՆ-ի և ԱԱԾ-ի հետ, որը չի կազմակերպվում վերջիններիս բացակայության և ԱԺ ղեկավարության անպատրաստակամության արդյունքում: