Ձեր վստահելի աղբյուրը

ՀՀ կրթության, գիտության, մշակույթի և սպորտի նախարարի տեղակալ Կարեն Գիլոյանն այսօր ընդունել է Օլիմպիական խաղերի եռակի չեմպիոն, հունահռոմեական ոճի լեգենդար ըմբիշ, ՌԴ Դաշնային խորհրդի անդամ Ալեքսանդր Կարելինին, Օլիմպիական խաղերի, աշխարհի եռակի, Եվրոպայի կրկնակի չեմպիոն, ԽՍՀՄ սպորտի վաստակավոր մարզիչ Մնացական Իսկանդարյանին։Այս մասին հայտում են ՀՀ ԿԳՄՍՆ-ից։

Հանդիպմանը ներկա են եղել նաև Հայաստանի ըմբշամարտի ֆեդերացիայի նախագահ Ռոբերտ Խաչատրյանը, ֆեդերացիայի գլխավոր քարտուղար Արայիկ Բաղդադյանը, հունահռոմեական ոճի ըմբշամարտի հավաքականի նախկին գլխավոր մարզիչ Լևոն Ջուլֆալակյանը։

ԿԳՄՍ նախարարի տեղակալ Կարեն Գիլոյանը ողջունել է հյուրերին՝ շնորհակալություն հայտնելով այցելության համար և կարևորելով երկու երկրների միջև փոխհամագործակցությունը՝ ուղղված սպորտի զարգացմանը․ «Դուք ինձ համար կուռք եք եղել։ Շնորհակալություն այցելության համար․ մեզ համար մեծ պատիվ է։ Այս տարվա ապրիլին ես Մոսկվայում էի, հանդիպեցի Ռուսաստանի սպորտի փոխնախարար Քսենիա Մաշկովայի հետ, մենք որոշ հարցեր քննարկեցինք համագործակցության վերաբերյալ և պետք է հուշագիր ստորագրեինք, բայց այն ինչ-ինչ պատճառներով հետաձգվեց․ հուսով եմ՝ մոտ ապագայում մենք այդ հուշագիրը  կստորագրենք։

Դրա նպատակը համատեղ հավաքներ, մարզումներ, սեմինարներ անցկացնելն է, անել ամեն ինչ, որպեսզի Հայաստանի և Ռուսաստանի՝ տարբեր մարզաձևերը ներկայացնող մարզիկները համագործակցեն։

Կարծում եմ՝ երկուստեք միմյանց փոխանցելու շատ բաներ ունենք, այնպես որ իդեալական կլինի, եթե մենք ամենօրյա կապի մեջ լինենք, քննարկենք հարցեր՝ հօգուտ մեր պետությունների և սպորտի զարգացման»։

Ալեքսանդր Կարելինը շնորհակալություն է հայտնել հյուրընկալության համար և հետագա համագործակցության պատրաստակամություն հայտնել։

Կարեն Գիլոյանը նաև խնդրանքով դիմել է լեգենդար ռուս ըմբիշին:

«Կցանկանայի խնդրել ռուսական ֆոնդին մեզ տրամադրել հայ մարզիկների մասնակցությամբ որոշ արխիվային նյութեր։ Ցավոք, մենք մեծ արխիվ չունենք։ Ցանկանում ենք այնպես անել, որ մարդիկ չմոռանան անցյալում մեր անվանի մարզիկների գրանցած հաջողությունները»,- ասել է Կարեն Գիլոյանն ու ընդգծել, որ այս հարցով մտադիր են նաև գրություն ուղարկել Ռուսաստանի սպորտի նախարարություն, իսկ Ալեքսանդր Կարելինը խոստացել է անպայման ընթացք տալ այդ հարցին։

«Շատ լավ եմ հասկանում ու կարևորում սպորտի պրոպագանդան և մասսայականացումը։ Սա շատ կարևոր է ինչպես հանրաճանաչության, այնպես էլ այն մարդկանց նկատմամբ հարգանքի առումով, ովքեր իրենց անունները գրել են պատմության մեջ՝ իրենց նվաճած տիտղոսներով և մրցանակներով։ Գիտեմ, որ Հայաստանում ըմբշամարտը շատ սիրելի մարզաձև է, և վստահ եմ, որ Դուք ևս շատ մեծ աշխատանք եք կատարում հասարակական վերաբերմունքի ձևավորման հարցում»,- նշել է Ալեքսանդր Կարելինը։

Հունահռոմեական ոճի ըմբշամարտի լեգենդը, որը Հայաստան է այցելել հայ-ռուսական միջտարածաշրջանային 8-րդ համաժողովի շրջանակում, երեկ՝ հոկտեմբերի 18-ին, նաև ճանաչողական այց է կատարել Գյումրի, եղել Գյումրու համայնքապետարանի ազատ ոճի ըմբշամարտի մանկապատանեկան մարզադպրոցում և խոստովանում է, որ վերադարձել է հիանալի տպավորություններով․ «Ուրախ եմ, որ կարողացանք այցելել Գյումրի, լինել ըմբշամարտի մանկապատանեկան մարզադպրոցում։ Գյումրիում բոլորովին այլ տրամադրություն էր, այլ բնավորություն։ Հիանալի տպավորություններ ստացանք»։

Օլիմպիական խաղերի եռակի չեմպիոնը նաև շնորհավորել է ներկաներին Օլիմպիական խաղերի արծաթե մեդալակիր Արսեն Ջուլֆալակյանի՝ Ըմբշամարտի միջազգային ֆեդերացիայի մարզիկների կոմիտեի անդամ ընտրվելու կապակցությամբ․ «Ցանկանում եմ շնորհավորել ձեզ։ Ձեր սանի, հայկական ըմբշամարտի դպրոցի ներկայացուցչի առջև համաշխարհային մակարդակով շատ մեծ խնդիր է դրված, պետք է նաև էթիկական հարցերը ղեկավարի, ինչը բավականին պատասխանատու է»։

Ի դեպ, ԿԳՄՍ նախարարի տեղակալը ռուսաստանցի անվանի հյուրերին՝ որպես հատուկ հյուրեր, հրավիրել է ներկա գտնվելու 2022 թվականի մայիսին Երևանում կայանալիք մեկ այլ խոշոր մրցաշարի՝ բռնցքամարտի Եվրոպայի առաջնությանը։

«Մեծ սիրով։ Վստահ եմ, որ յուրահատուկ կոլորիտ կհաղորդեք այդ մրցաշարին և ձեզ ցույց կտաք առանձնահատուկ կողմերով»,- ասել է Կարելինը։