Ձեր վստահելի աղբյուրը

«Ես կարող եմ գոհունակությամբ արձանագրել, որ ՀՀ կառավարությունը և իշխանությունը վերջապես հիշեցին, որ կա «ՀՀ պետական սահմանի մասին» օրենք և Հայաստանի սահմանները որոշվում են այդ օրենքով, ոչ թե «Վարչատարածքային բաժանման մասին» օրենքով»,-այսօր ԱԺ Պաշտպանության և անվտանգության հարցերի մշտական հանձնաժողովի նիստում հայտարարեց «Հայաստան» խմբակցության պատգամավոր Արթուր Ղազինյանը՝ «Պետական սահմանի մասին» օրենքում լրացում կատարելու մասին նախագծի քննարկման ժամանակ:

Պատգամավորը հարցը զեկուցող պաշտպանության փոխնախարար Արման Սարգսյանին խնդրեց հանրությանը ներկայացնել օրենքի այն դրույթը, որում արձանագրված է բանավոր փոխըմբռնմամբ սահմանի տեղորոշումը կամ GPS  սարքերի միջոցով սահմանների հստակեցումը:

Ղազինյանը նաև հետաքրքրվեց, թե Հայաստանի պետական սահմանի փաստացի փոփոխության հարցերում օրենքի 28-րդ հոդվածի համաձայն ՀՀ ԱԳՆ-ն ներգրավված եղե՞լ է և ի՞նչ ձևաչափով:

«ՀՀ ԱԳՆ արդյո՞ք տեղյակ է եղել 2020 թվականի դեկտեմբերի 16-ին արձակած հրամանից, երբ ՀՀ ԶՈՒ-երը 15-20 կմ հետ են տարվել իրենց բնագծերից»,-հարցրեց «Հայաստան» խմբակցության պատգամավորը:

ՀՀ պաշտպանության նախարարի տեղակալ Արման Սարգսյանը հայտնեց, թե տեղյակ է, որ Արթուր Ղազինյանը ատենախոսությունը պաշտպանած իրավաբան է , հետևաբար պետք է այդ հարցերի պատասխանը գտած լիներ օրենքում իսկ մյուս հարցերով պետք է գրավոր դիմի ՊՆ-ին, ԱԳՆ-ին և վերընթերցի օրենքը:

Արթուր Ղազինյանը հայտնեց, որ լավ տեղյակ է օրենքից և այնտեղ չկա դրույթ, որ բանավոր պայմանավորվածությամբ և GPS  սարքերով սահման գծվի:

«Այն, ինչ տեղի է ունեցել դեկտեմբերին և շարունակվում է այսօր  որևէ առնչություն չունի «Պետական սահմանի մասին» ՀՀ օրենքի հետ և այդ գործընթացները դրանով չեն կարգավորվում»,-արձագանքեց Ղազինյանը:

ՀՀ պաշտպանության նախարարի տեղակալ Արման Սարգսյանը, մինչ այդ ներկայացնելով օրենքի նախագիծը, հայտնեց, որ «Պետական սահմանի մասին» օրենքի 29-րդ հոդվածում սահմանված են պետական սահմանի օդային տարածքի պաշտպանության ապահովման գործընթացում հակաօդային պաշտպանության զորքերի իրավասությունները, ներառյալ՝ ՀՀ անվտանգությանն սպառնալու դեպքում կամ Հայաստանի նկատմամբ թշնամական որևէ գործողություն կատարելիս օդանավին կամ թռչող այլ սարքին վայրէջքի պարտադրումը, իսկ այդ գործողությունների շարունակման դեպքում՝ օդանավի կամ թռչող այլ սարքի ոչնչացման իրավունքը:

Նրա տեղեկացմամբ՝ 2015 թվականի դեկտեմբերի 23-ին կնքված և 2017 թվականի հունվարի 11-ին ուժի մեջ մտած՝ «ՀՀ և ՌԴ միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագրի 8-րդ հոդվածի և համաձայնագրով հաստատված կանոնակարգի 7-րդ կետի պահանջների համաձայն՝ խաղաղ ժամանակ Կողմերն իրենց իրավունք են վերապահում որոշում կայացնել Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգի կազմի մեջ մտնող իրենց զորքերի կիրառման մասին, ընդ որում, զենքի կիրառման կարգը սահմանվում է այն պետության օրենսդրությամբ, որի օդային տարածքում գտնվում է օբյեկտը, որի նկատմամբ կիրառվում է զենքը:

«Քանի որ օրենքը սահմանել է պետական սահմանի օդային տարածքի պաշտպանության գործընթացում հակաօդային պաշտպանության զորքերի իրավասությունները, սակայն հստակեցված չէ դրանց շրջանակներում հակաօդային պաշտպանության միջոցների օգտագործումը, ինչպես նաև հաշվի առնելով, որ «Պաշտպանության մասին» ՀՀ օրենքի 16-րդ հոդվածի 1-ին մասի պահանջների համաձայն զինված ուժերի գտնվում են Հայաստանի Հանրապետության կառավարության ենթակայության ներքո, անհրաժեշտություն է առաջացել ՀՀ կառավարության որոշմամբ սահմանել հակաօդային պաշտպանության միջոցների օգտագործման կարգը»,-հայտնեց Սահակյանը և հավելեց, որ օրենքի նախագծով նախատեսվում է պետական սահմանի օդային տարածքի պաշտպանության ժամանակ հակաօդային պաշտպանության զորքերի կողմից պաշտպանության միջոցների օգտագործման կարգը սահմանել ՀՀ կառավարության որոշմամբ: