Ձեր վստահելի աղբյուրը

ՄԱԿ-ի Արդարադատության միջազգային դատարանում այսօր շարունակվում են Ադրբեջանն ընդդեմ Հայաստանի գործով հրատապ միջոցների վերաբերյալ բանավոր լսումները՝ «Ռասայական խտրականության բոլոր ձևերի վերացման մասին» միջազգային կոնվենցիայի հիմքով (CERD):

Ադրբեջանն իր դիմումում գրել է, թե «Հայաստանը մասնակցել է և շարունակում է մասնակցել ադրբեջանցիների դեմ խտրական վերաբերմունքի մի շարք գործողությունների` իրենց «ազգային կամ էթնիկ» ծագման հիմքով»: Ադրբեջանը գրել է, որ «ինչպես ուղղակի, այնպես էլ անուղղակի միջոցներով, Հայաստանը շարունակում է իր էթնիկ զտումների քաղաքականությունը», և որ այն «հրահրում է ատելություն և էթնիկ բռնություն ընդդեմ ադրբեջանցիների՝ ներգրավվելով ատելության խոսքի մեջ և տարածելով ռասիստական քարոզչություն, այդ թվում` կառավարման ամենաբարձր մակարդակներով»:

Նախօրեին դատարանում Ադրբեջանի կողմից ներկայացվել են հրատապ միջոցներ կիրառելու վերաբերյալ պահանջները։ Ադրբեջանը դատարանին խնդրել է՝ պարտավորեցնել Հայաստանին՝ հանձնել ականների տեղադրման քարտեզները, միջոցներ ձեռնարկել՝ վերջ դնելու համար ռասայական ատելության և բռնության հրահրումը հայկական խմբերի կողմից։

Ի պատասխան Ադրբեջանի՝ Հայաստանի Հանրապետության ներկայացուցիչ Եղիշե Կիրակոսյանը ներկայացրել է հակափաստարկներ, հայտարարելով, որ Ադրբեջանի պահանջները հագեցած է CERD-ի պարամետրերից ակնհայտորեն դուրս եկող խնդիրներով ու Ադրբեջանի նպատակն է  լինել զոհի կարգավիճակում։

շԿիրակոսյանը նշել է, որ  Ադրբեջանի դիմումը անլուրջ է ու «հայելային» արձագանք Հայաստանի հիմնավոր պնդումներին:

«Առաջինը Հայաստանն էր, որ նոյեմբերի 11-ին տեղեկացրեց Ադրբեջանին CERD-ի շրջանակներում իր պահանջների մասին, որին Ադրբեջանը պատասխանեց հայելային ձևով։ Հայաստանը ներկայացրեց պահանջներ ատելության խոսքի հետ կապված՝ Ադրբեջանը «հայելապատեց»: Հայաստանը ներկայացրեց մշակութային ժառանգության ոչնչացման պահանջները, Ադրբեջանը «հայելապատեց»: Հայաստանն էր, որ սեպտեմբերին ներկայացրեց իր դիմումը` վարույթ հարուցելով դատարանի առջև ժամանակավոր միջոցների միջնորդության հետ միասին, Ադրբեջանը կրկին «հայելապատեց» ուղիղ մեկ շաբաթ անց»,-ասաց Կիրակոսյանը, հավելելով, որ Ադրբեջանի պնդումները շինծու և պաշտպանական քայլեր են:

Հիշեցնենք, որ հոկտեմբերի 14-15-ին դատարանը լսումներ անցկացրեց «Հայաստանն ընդդեմ Ադրբեջանի» գործով։ Հայաստանը խնդրել է դատարանին կիրառել մի շարք հրատապ միջոցներ՝ այդ թվում ռազմավարի պուրակի փակումը և ռազմագերիների ու պահվող քաղաքացիական անձանց վերադարձը, մշակութային ժառանգության պահպանում։

Լսումների ավարտին դատարանի նախագահը հայտարարել էր, որ որոշումը կհրապարակվի հնարավորինս սեղմ ժամկետում: