Ձեր վստահելի աղբյուրը

«Այսօր շատ հաճախ խոսվում է երկարատև կովիդի մասին, երբ հիվանդությունից հետո երեք ամիս ու ավելի դեռևս հիվանդների մոտ պահպանվում են հին ախտանիշները, որոշ դեպքերում ի հայտ են գալիս նորերը»,- ասուլիսում ասաց ԵՊԲՀ Համաճարակաբանության ամբիոնի դոցենտ Մերի Տեր-Ստեփանյանը:

Նա նշեց, որ առավել հաճախ հանդիպող ախտանիշներից է՝ հևոցը, որը բավական երկար պահպանվում է, մկանացավերը, հոդացավերը, կորդինացիայի խախտումը, հիշողության անկումը, նյարդաբանական տարբեր խանգարումները:

«Ցավոք սրտի, մենք դեռևս այս վարակի ավելի հեռակա ազդեցության մասին չենք կարող խոսել, բայց այն, որ վարակն ազդում է բոլոր օրգան համակարգերի վրա, հետազոտությունները բազմաթիվ են՝ միզասեռական համակարգի խնդիրներ, երիկամի ֆիլտրացիոն ֆունկցիայի նվազեցում»,- ասաց համաճարակաբանը:

Նա ընդգծեց՝ կորոնավիրուսը միայն շնչուղիների վարակ չէ, ազդում է ամբողջ օրգանիզմի, բոլոր օրգան համակարգերի վրա, փոփոխությունները բավականին հաճախ պահպանվում են անգամ ամիսների ընթացքում:

ԵՊԲՀ Համաճարակաբանության ամբիոնի ավագ դասախոս Արման Բադալյանն ասաց, որ վիրուսը խթանում է նոր հիվանդության ի հայտ գալուն, կամ այդ հիվանդությունը պացիենտն ունեցել է, բայց մինչ այդ չի իմացել:

Խոսելով կորոնավիրուսի դեմ պատվաստանյութերի անվտանգության մասին, Մերի Տեր-Ստեփանյանը նշեց, որ բոլոր պատվաստանյութերն արդյունավետ են, ընդունելի ու կիրառելի, բոլորն էլ անցել են կլինիկական հետազոտությունների երեք փուլերը:

Հարցին՝ կա՞ն հստակեցումներ, թե երկրորդ դեղաչափը ստանալուց հետո քանի ամիս անց նորից  պատվաստվելու անհրաժեշտություն կա, բժշկուհին նշեց, որ կան բազմաիթվ հետազոտություններ: Օրինակ, «Փֆայզերի» դեպքում խորհուրդ է տրվում առաջին երկու դեղաչափի ընդունումից վեց ամիս անց ընդունել երրորդ դեղաչափը 65 -ից բարձր տարիքային խմբին և նրանց, որոնց մոտ իմուն պատասախանն այդքան արտահայտված չի եղել:

«Հետազոտությունները բազմաթիվ են, բայց ուղեցույց, որ պարտադիր Հայաստանում պետք է արվի երրորդ դեղաչափը տվյալ պատվաստանյութից հետո, դեռևս չկա: Մենք ընթացիկ պրոցեսում են՝ թե գիտական, թե պրակտիկ»,- նշեց ԵՊԲՀ Համաճարակաբանության ամբիոնի դոցենտ Մերի Տեր-Ստեփանյանը: