Ձեր վստահելի աղբյուրը

«Բացի Փայլասարից նաև Շիկահող, Սրաշեն, Ճակատեն հատվածում մենք նույնպես խնդիր ունենք, քանի որ ադրբեջանական զինված ուժերը, չհանդիպելով, թե՛ դիվանագիտական, թե՛ այլ դիմադրության քայլելով գալիս են առաջ և մենք, ենթադրաբար, շուտով կկորցնենք նաև Շիկահող գյուղի դիմացի բարձունքը»,- Աժ-ում ճեպազրույցի ժամանակ հայտնեց «Հայաստան» խմբակցության պատգամավոր Վահե Հակոբյանը:

Անդրադառնալով Տիգրան Ավինյանին՝ Զանգեզուրի պնղձամոլիբդենային կոմբինատի տնօրեն նշանակելու մասին հարցին՝ Հակոբյանը հայտնեց, որ այդ մասին տեղեկություն չունի և իրեն թվում է, որ այն մամուլի մտահղացումն է:

«Տիգրան Ավինյանը, ինչքան գիտեմ, որևէ մասնագիտական ունակություններ չունի, որ  ղեկավարի կոմբինատը»,-ասաց պատգամավորը։

Ըստ Հակոբյանի՝ քանի որ բաժնեմասերի մեծ տոկոսն ունի «Գեոպրոմայնինգ» ընկերությունը, այդ պատճառով էլ տնօրենը պետք է նշանակվի հենց այդ ընկերության կողմից։

Լրագրողներից մեկը հարցրեց, թե վտանգ սպառնո՞ւմ է իր ընտանեկան մասնաբաժնին:

«Այս պետության կողմից իմ նկատմամբ երեքուկես տարի է վտանգ է սպառնում, ցանկացած վտանգ ստանում է իր պատասխանը և այդպես էլ շարունակվելու է»,-պատասխանեց «Հայաստան» խմբակցության պատգամավորը։

Ըստ նրա՝ անհասկանալի է նաև, թե ինչպես բաժնեմասերը հայտնվեցին «Գեոպրոմայնինգ» ընկերության ձեռքում, բայց ենթադրություններ ունի, որով դեռ չի կիսվի։

Պատգամավորը խոստացավ, որ երբ վերջնական պարզի, թե ինչ է կատարվել, անմիջապես ասուլիս կհրավիրի ու բոլոր հարցերին կանդրադառնա: