Ձեր վստահելի աղբյուրը

«Պատերազմից մեկ տարի է անցել, առ այսօր, կարծում եմ, բռնի տեղահանվածների խնդիրները մասնակի լուծումներ որպես այդպիսին չեն ստացել»,- ՀՀ ԱԺ-ում  Մարդու իրավունքների պաշտպանության և հանրային հարցերի մշտական հանձնաժողովի նախագահ Թագուհի Թովմասյանի նախաձեռնությամբ  կազմակերպված «Արցախի Հանրապետությունում բնակվող, Արցախի Հանրապետությունից բռնի տեղահանված և Հայաստանի Հանրապետությունում բնակություն հաստատած քաղաքացիների սոցիալ-տնտեսական, իրավական, կրթական և այլ խնդիրների վերաբերյալ» թեմայով աշխատանքային քննարկմանն ասաց Արցախի ԱԺ «Արդարություն» խմբակցության անդամ Մետաքսե Հակոբյանը:

Նա նշեց, որ իրենք լուծումներ ունեն, բազմիցս առաջարկել են, ցավոք, կամ անկարողության, կամ չուզենալու հետևանքով այդ առաջարկությունները կամ չեն լսվել կամ մերժվել են:

Մ. Հակոբյանի խոսքով, ՀՀ-ում գտնվող բռնի տեղահանված արցախցի ընտանիքների կարիքների գնահատում չի կատարվել՝ սկսած Արցախ վերադառնալու իրենց ցանկությունից, հստակ  տվյալներ չունեն ՀՀ-ում ժամանակավոր  բնակվող արցախցիներից քանիսն են ուզում վերադառնալ Արցախ, վերջացրած՝ այսօր իրենց գլխին ծածկ չունենալուց:

«Եթե կարիքները խմբավորենք ըստ առաջնահերթության, հասկանալի կդառնա, որ դրանք լուծելի են: Մեկ տարի շարունակ «լուծումները» տրվել են տարերայնորեն, մեծ նշանակություն է տրվել խնամի-ծանոթ-բարեկամին, երբեմն անհատի բարձր ձայնին, ինչի պատճառով հսկայական գումարներ ուղղակի վատնվել են: Իսկ խնդիրներն ավելի են կուտակվել ու շատ դեպքերում թվում են անլուծելի»,- աաց նա:

Մ. Հակոբյանն ընդգծեց՝ մեկ տարի է անցել, պետք է հրաժարվել առկա մոտեցումից ու արագ տեմպերով ներգրավելով ՀՀ-ում օպերատիվ շտաբին՝ կատարել ընտանիքների կարիքների գնահատում և խմբավորել դրանք ըստ առաջնահերթության և դրանց տալ լուծումներ:

«Նույն խնդիրն ունենք Արցախում մի փոքր այլ տեսքով: Արցախում ոչ միայն խնդիր ունենք բռնի տեղահանվածների սոցիալ-տնտեսական հարցերը լուծելու առումով, նաև այսօր շատ ավելի մեծ խնդիր ունենք՝ արտագաղթի խնդիրը»,- ասաց պատգամավորը:

Նրա խոսքով, Արցախում մեկ տարի շարունակ ոչ հասցեական, կրկին տարերային սոցիալական ծրագրերը բերեցին էլ ավելի հսկայական գումարների վատնմանն ու շորթմանը:

«Սոցիալական հարցերի նախարարությունը Արցախում խոսում էր հսկայական սոցիական ծրագերի մասին, արդյունքում տեսանք, որ փող բաժանելուց զատ  այդպես էլ որևէ ծրագիր չիրականացավ:

Այս իշխանությունները սոցիալական ծրագիրը որպես այդպիսին գիտեն միայն փող բաժանել, այլ տարբերակ չեն տեսնում, մինչդեռ պետք է հասկանալ, որ այսօր Արցախում միայն փողով չես կարող  ոչ բնակիչ պահել, ոչ առավել ևս ավելացնել»,- ասաց Մ. Հակոբյանը:

Խոսելով իրավական վիճակի մասին, Մ. Հակոբյանն ասաց, որ շատ հայրենակիցները պահանջում են փախստականի կարգավիճակ տալ իրենց:

«Եթե դա զուտ անհատի ցանկությունն է  սեփական հարցերը լուծելու համար կամ այլ երկիր տեղափոխվելու նպատակով է արվում, ապա դա էլ հարց է: Իսկ եթե միջազգային  դատարաններում կամ արտաքին քաղաքականության  մեջ լրացուցիչ գործիքակամզ կհանդիսանա, բնականաբար, այլ հարց է, պետք է քննարկել»,- ասաց Մետաքսե Հակոբյան: