Ձեր վստահելի աղբյուրը

«Բռնի տեղահանվածների սոցիալական ծրագրերը խայտառակ ձևով են իրականացվում»,- ՀՀ ԱԺ-ում  մարդու իրավունքների պաշտպանության և հանրային հարցերի մշտական հանձնաժողովի նախագահ Թագուհի Թովմասյանի նախաձեռնությամբ  կազմակերպված «Արցախի Հանրապետությունում բնակվող, Արցախի Հանրապետությունից բռնի տեղահանված և Հայաստանի Հանրապետությունում բնակություն հաստատած քաղաքացիների սոցիալ-տնտեսական, իրավական, կրթական և այլ խնդիրների վերաբերյալ» թեմայով աշխատանքային քննարկմանն ասաց «Վերադարձ դեպի Քաշաթաղ» ՀԿ ներկայացուցիչ Կարինե Մովսիսյանը:

Նրա խոսքով, ականատես են եղել և լսել են տեղահանվածներից, որ շատ մարդիկ,  որոնք տարիներ շարունակ չեն ապրել հենց Քաշաթաղի շրջանում, շատ ծրագրերից են կարողացել օգտվել, մինչդեռ կան մարդիկ, որոնք մինչև վերջին պահը մնացել են Քաշաթաղում,  այսօր չեն կարողանում շահառու դառնալ այդ ծրարգրերին:  Կ. Մովսիսյանն ասաց, որ համապատասխան կառույցներից չեն կարողանում ստանալ հարցերի պատասխանները, քար լռություն է,  բացարձակ չեն արձագանքում:

«Այսօր խախտված են բոլոր տեղահանվածների իրավունքները, ամենացավալին այն է, որ խախտված է հենց մեր ապրելու իրավունքը:

Նոր իրավիճակում ենք հայտնվել անկախ մեր կամքից,  ինչ-որ ձև առանջ գնալ առանց պետական  ծրագրի, հնարավոր չէ»,- ասաց նա:

Կ. Մովսիսյանը նաև ընդգծեց՝ իրենց կազմակերպության համար սկզբունքային հարց է կարգավիճակի հարցը. «Չեմ  պատկերացնում, թե ինչպես պետք է լինի, երևի իրավաբանական հարց է, բայց որ պետք է ունենանք ինչ-որ կարգավիճակ, միանշանակ է»:

Քննարկմանը ներկա «Հադրութի Դեօկուպացիա» ՀԿ-ի ղեկավար Մերի Դավթյանն ասաց, որ իրենց համար կարևոր է քաղաքական կայունությունը, որոշակիությունը, որպեսզի  հասկանան հայկական երկու  պետություններն ինչ օրակարգ ունեն, ինչ ուղղությամբ են շարժվում:

«Անվտանգությունը թիվ մեկ խնդիրն է, բայց, ինչպես նկատում ենք, խաղաղապահներով հանդերձ էլ մենք ունենում ենք պատահարներ, իրադարձություններ, որոնք անհանգստացնող են:
Ուզում ենք հասկանալ  Հայաստանի քաղաքական դաշտն ինչ դիրքորոշում ունի Արցախյան խնդրում:

Մեզ համար դա պարզ չէ, մենք չգիտենք մեր ճանաչման խնդիրը  երբ է նորից մտնելու  օրակարգ»,- ասաց Մ. Դավթյանը:

«Շուշիից բռնի տեղահանված հայ բնակչության» ՀԿ խորհրդի անդամ Աշոտ Հարությունյանն ասաց, որ իրենց բնակչության առջև ծառացած էր ընդամենը մեկ խնդիր՝ մարդկանց պետք է ապահովեին կացարաններով։

«Բայց մենք ի՞նչ տեսանք: Տեսանք՝ եկած առանց այն էլ սուղ միջոցների փոշիացում:  Հարց է ծագում՝ ի՞նչ է արել, օրինակ, Շուշիի աշխարհազորը, որ աշխատավարձ է ստացել: Շուշին  հանձնել է, ուրիշ ոչ մի բան չի արվել: Ինչի՞ համար է ինքն աշխատավարձ ստացել, փոխանակ այդ  մարդիկ պատժվեն»,- նշեց նա:

Ա. Հարությունյանն ասաց, որ թիվ մեկ խնդիրն այսօր Հայաստանում ապաստանած շուշեցիների համար այն վտանգն է, որ իրենք փոշիացած են ամբողջ ՀՀ-ով մեկ. «Մենք առաջարկել էինք  Երևանից 20 կմ շրջագծով ժամանակավոր բռնի տեղահանվածների ճամբար սարքվի, տնակներ դրվեն, դրվի նոր Շուշի ճամբար ու համաշխարհային հանրությանը ցույց տրվի»:

Նրա խոսքով, արդեն տասնյակ ընտանիքներ հեռացել են երկրից:

«Ի՞նչ է նշանակում՝ այն մարդիկ, որոնք հանձնել են Արցախի տարածքներն ու այսօր հայրենասեր են խաղում, ասում են՝ եկեք, բնակվեք Արցախում: Ո՞ւմ եք ասում՝  եկեք բնակվեք: Ամբողջ ստեփանակերտցիները փախել, եկել են Երևան, տներ են առել: Չեմ հասկանում, թե ինչ գներ են սահմանված Ստեփանակերտում տների համար։ Կատարվում է թալան, փախստական ժողովրդի թալան։ Եկեք գնանք Ստեփանակերտ, տեսնենք, թե քանի ստեփանակերտցի ենք հանդիպում ճանապարհին, հադրութեցիներ են, շուշեցիներ, մարտունեցիներ: Կարելի է մի քանիսին հանդիպել,  այն էլ ում հանդիպում ես՝ եկել է այդ պահին տան վարձը վերցնի ու գնա: Պետք է պարզել՝ ո՞վ է այդ ամենը ղեկավարում:

Կամ՝ ի՞նչ է նշանակում՝ եթե դու գաս Ստեփանակերտ, քեզ տուն եմ տալու, չգաս՝ չեմ տալու:

Կամ՝ հադրութցուն դուք հարցրե՞լ եք, որ հանձնել եք Հադրութը, հիմա էլ ասում եք՝ եկեք Ստեփանակերտ: Նրանց համար կապ չունի Երևանի կամ Ստեփանակերտի Աջափնյակը, իրենց Հադրութն են ուզում»,- հարցադրումներ արեց քննարկմանը ներկա շուշեցին:

Ըստ նրա, ամենացավալին այն է, որ այս պատերազմի մեղավորները ոչ ոք չի պատժվել:

«Հանդիպել ենք Արցախի Հանրապետության նախագահին, հարցում ենք՝ անվտանգության ի՞նչ երաշիքներ ունեք: Ասում է՝ ռուսական զորք:

Քեզ ասել են՝ բանակը ցրի, ցրում ես: Ո՞վ է քեզ թույլ տվել բանակը ցրել: Ասում է՝ Ադրբեջանը: Ասում ենք՝ Ադրբեջանը ղալլաթ է անում, գլուխն էլ պատերով է տալիս, դու քո բանակը պահում ես»,- ասաց Ա. Հարությունյանը:

Նա նշեց, որ իրենց ներկայացուցիչների պահանջն է՝ պարտադիր Արցախի կարգավիճակի հարցի լուծում: