Ձեր վստահելի աղբյուրը

«Պատերազմում Հայաստանի իշխանությունների խայտառակ պարտությունից հետո  երկիրը գտնվում է անվտանգային, սոցիալ-տնտեսական ծանր մարտահրավերների առջև, իսկ թուրք-ադրբեջանական տանդեմը պարտադրում է ապաշրջափակում որպես ազգային շահերի առաջմղման հաջորդ փուլ»,- «Հայաստան» դաշինքի կազմակերպած «Հայաստանին և Արցախին սպառնացող վտանգներն ու դրանց հաղթահարման ուղիները» թեմայով քննարկմանն ասաց ԱԺ «Հայաստան» խմբակցության պատգամավոր Թադևոս Ավետիսյանը։

Նա նշեց, որ ՀՀ գործող իշխանությունը հինգամյա ծրագրում ձևակերպել է տարածաշրջանի ապաշրջափակման նպատակադրումը որպես մեր երկրի փոխշահավետ գոյակցության հիմք՝ ակնկալելով նաև Թուրքիայի և Ադրբեջանի կառուցողական դիքորոշումը։

«Այս նպատակադրումը հակադրվում է Հայաստանի  և Արցախի ընթացիկ տնտեսական շահերին, ամենակարճ ճանապարհն է տնտեսական մեթոդներով թուրքական ազդեցությունը մեր տարածաշրջանում անսահման տարածելու համար, անխուսափելիորեն հանգեցնելու է ինքնիշխանության և պետականության անդառնալի կորուստների հայկական երկու պետությունների տնտեսական համակարգի թուրքացմանը համաքայլ, մյուս կողմից այս նպատակադրումը թուրք-ադրբեջանական ռազմավարական շահերի կենտրոնում է, դարձել է առաջնային օր առաջ և ամեն գնով ներառյալ ռազմական ուժի կիրառման սպառնալիքով իրագործման ենթակա»,- ասաց տնտեսագետ պատգամավորը։

Թ. Ավետիսյանի խոսքով, թուրք-ադրբեջանական տանդեմն իր նավթադոլարներով փողախեղդ կանի Հայաստանի տնտեսությունը՝ այն դնելով իրենց անդառնալի կախվածության մեջ, տեղական արտադրանքը կփոխարինվի թուրքական և ադրբեջանական  ներմուծումով։ Ըստ նրա, առաջնային և կործանար հարված է հասցվելու նաև մեր երկրի գյուղատնտեսությանը, հատկապես ջերմոցային տնտեսությանը, տեքստիլ արդյունաբերությանը, մշակող արդյունաբերական ճյուղերին։