Ձեր վստահելի աղբյուրը

Զանգեզուրի պղնձամոլիբդենային կոմբինատի բաժնետոմսերի 12,5 տոկոսի սեփականատեր, Ռուսաստանի առողջապահության ու սոցիալական զարգացման հարցերի նախկին նախարար. Վ. Պուտինի նախկին խորհրդական Միխայիլ Զուրաբովը դիմել է Սյունիքի մարզի ընդհանուր իրավասության դատարան՝ գործարքն անվավեր ճանաչելու և անվավերության հետևանքներ կիրառելու մասին պահանջով։

Դատական տեղեկատվական համակարգից Panorama.am-ը տեղեկացավ, որ «Զանգեզուր մայնինգ» ՍՊԸ -ի, որի վերջնական բաժնետերն է Զուրաբովը,  շահերը դատարանում կներկայացնի հայտնի փաստաբան Արամ Օրբեյանը։

Պատասխանողներ են նշանակվել  Հայաստանի Հանրապետությունը՝ ի դեմս ՀՀ վարչապետի աշխատակազմի, ինչպես նաև «Զանգեզուրի պղնձամոլիբդենային կոմբինատ» ՓԲԸ -ն ու Մոսկվայում գրանցված «Արդյունաբերական ընկերություն» ԲԸ -ն։

Որպես երորդ անձինք ներգրավված են «Հայաստանի Կենտրոնական դեպոզիտարիա» ՓԲԸ-ն ու «ԱՄՓ Հոլդինգ» ՍՊԸ-ն։

Դատարանը հայցադիմումը ստացել է հոկտեմբերի 7-ին ու հենց նույն օրը մակագրել դատավոր Անահիտ Թումանյանին։ Դատական Նիստի օր դեռևս նշանակված չէ։

Նշենք, որ գործարքը, որն անվավեր ճանաչելու համար դատարան է դիմել Միխայիլ Զուրաբովը, վերաբերում է Ռոման Տրոցենկոյի կողմից կոմբինատի բաժնետոմսերի 60 տոկոսի ձեռքբերմանը։

Ավելի ուշ հայտնի դարձավ ու պաշտոնապես հաստատվեց, որ այս գործարարը բաժնետոմսերի 25 տոկոսը նիրել է Հայաստանի կառավարությանը։։

«Որպես նվիրատվություն Հայաստանի Հանրապետությանը «Արդյունաբերական ընկերություն» բաժնետիրական ընկերությունից ընդունել «Զանգեզուրի պղնձամոլիբդենային կոմբինատ» փակ բաժնետիրական ընկերությունում վերջինիս սեփականության իրավունքով պատկանող 25 տոկոս (քսանհինգ տոկոս) 412,250.75 (չորս հարյուր տասներկու հազար երկու հարյուր հիսուն ամբողջ յոթանասունհինգ) հատ հասարակ (սովորական) բաժնետոմսերը՝ 20,000 (քսան հազար) դրամ անվանական արժեքով բաժնետոմսերը՝ բաժնետոմսերի կառավարման լիազորությունը վերապահելով Հայաստանի Հանրապետության վարչապետի աշխատակազմին»,-նշված է կառավարության որոշման մեջ։

Իրականցված գործարքը ոչ թափանցիկ էր գնահատել «Թրանսփարենսի ինթերնեշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանը։

«Դեռ հարց է մնում, թե ինչու հանկարծ որոշում կայացվեց գնելու Զանգեզուրի կոմբինատի բաժնետոմսերի 60 տոկոսը, այնուհետև դրա մեկ քառորդը նվիրատվություն անել վարչապետի աշխատակազմին։ Ընդ որում` այստեղից էլ այլ հարց է առաջանում, թե ինչու է դա հանձնվում վարչապետի աշխատակազմին, այլ որ թե էկոնոմիկայի նախարարությանը, քանի որ այն ավելի համապատասխան պետական մարմին է»,-նշել էր նա «Փաստինֆո»-ին տված հարցազրույցում։

ՀՀ երկրորդ նախագահ Ռոբերտ Քոչարյանը վերջերս լրագրողների հետ հանդիպմանը ԶՊՄԿ-ի բաժնեմասերը վարչապետի աշխատակազմին նվիրելը լկտիության հասնող կոռուպցիայի դրսևորման բարձրագույն պիլոտաժ էր որակել։

«Հայաստանի պատմության մեջ ամենաանհասկանալի գործարքն է, անհասկանալի տրամաբանությամբ։ Ինչ-որ չես հասկանում, թե ինչու նվիրաբերություն է արվում ու դրա կառավարումն անցնում է վարչապետի աշխատակազմին։ Աբսուրդ է։ Պետական բաժնեմասերը պետք է կառավարվեն ֆինանսների, էկոնոմիկայի նախարարության կողմից։ Ի՞նչ գործ ունի, ի՞նչ մասնագիտական հմտություն ունի վարչապետի աշխատակազմը նման գործառույթ իրականացնելու համար։ Սա ուղղակի փայ մտնել է Հայաստանի ամենախոշոր, ամենից գրավիչ ակտիվի մեջ՝ ֆինանսական հոսքերը կառավարելու համար։ Այլ բացատրություն չկա։ Սա կոռուպցիայի դրսևորման առումով բարձրագույն պիլոտաժ է՝ լկտիության հասնող»,-ասել էր ՀՀ երկրորդ նախագահը։