Ձեր վստահելի աղբյուրը

Հակառակորդի կողմից կրակոցները սահմանին նվազել են, վերջին երկու շաբաթվա ընթացքում կարելի է ասել` հասել են մինիմումի։ Այսօր լրագրողների հետ ճեպազրույցում հայտարարեց ՀՀ Պաշտպանության նախարար Սեյրան Օհանյանը` նկատելով, որ դա պայմանավորված է Ադրբեջանում ու Թուրքիայում երեկ տեղի ունեցած ընտրություններով:

«Մենք հիմա խիստ վերահսկում ենք, համապատասխան վերլուծություններ ենք կատարում, և մեր զինուժը, հատկապես պաշտպանության բանակը, պատրաստ է ցանկացած զարգացումների», - հայտարարեց նախարարը:

Անդրադառնալով առաջնագծի վերաբերյալ ԵԱՀԿ Մինսկի խմբի համանախագահների հայտարարություններին, մասնավորապես ընդհանրական գնահատականներին, Օհանյանը նկատեց. «Այս տարիների ընթացքում մենք կարծում ենք, որ Մինսկի խմբի համանախագահների կատարած աշխատանքն ի վերջո բերում է նրան, որ ո՛չ պատերազմ և ո՛չ էլ խաղաղություն իրավիճակը և հարաբերական զինադադարի պահպանման պայմանները պահպանվում են: Մեր ցանկությունն այն է, որ գնահատականները թիրախային լինեն այն կողմի համար, որը խախտում է հրադադարը»:

Ըստ Օհանյանի, եկել է ժամանակը լիարժեք միջազգային հետաքննական պայմաններ ապահովել, ինչը կարող է լիարժեք գնահատական տալ, թե խախտումները որ կողմից են: Հայկական կողմի կարծիքով, նախարարի խոսքով, անհրաժեշտ է գնահատական տալ և թիրախավորել այն կողմին, որը իրականում խախտում է կատարում: