Ձեր վստահելի աղբյուրը

«Այն իրավիճակը, որ ստեղծվել է Հայաստանի ու Արցախի շուրջ, ավելին է, քան մտահոգությունը»,- ասուլիսում լրագրողների հետ հանդիպմանն ասաց ԱԺ «Պատիվ ունեմ» խմբակցության պատգամավոր, անվտանգության հարցերով փորձագետ Տիգրան Աբրահամյանը։

Նա ընդգծեց՝ ակնհայտ է, որ իշխանությունն ամեն կերպ փորձում է քողարկել սահմանագծում առկա իրական իրավիճակն ու քողարկել իր կողմից որևէ լուրջ քայլ չանելու գլխավոր պրոցեսը.

«Ակնհայտ է՝ իշխանությունը թաքցնելու բան ունի: Իշխանությունը որևէ ձևով չի ուզում, որ ընդդիմադիր պատգամավորները ֆիքսեն այն իրական իրավիճակը, ինչ կա առաջնագծում, ինչի մասին անընդհատ խոսվում է ամենատարբեր հարւթյուններում: Դրանով պայմանավորված ոչ միայն ամեն գնով տապալում են խորհրդարանական ընդդիմության բարձրաձայնած  քննարկումների վերաբերյալ հարցերը, այլ նաև սահմանափակումներ են մտցնում նույնիսկ պաշտպանության և անվտանգության հանձնաժողովի անդամի առաջնագիծ այցելելու համար»:

Ա.Աբրահամյանի խոսքով, սահմանազատման հետ կապված բարդագույն իրավիճակ է։

«Հայաստանը միանգամից փորձում է միջազգային հանրությանը, բոլոր շահագրգիռ կողմերին տեղեկացնել, որ ինքը շահագրգռված է դելիմիտացիայի գործընթացով, ընդհուպ, հղում է անում խորհրդային քարտեզներին, որի հիման վրա պետք է տեղի ունենան այդ գործընթացները», - ասաց ընդդիմադիր պատգամավորը։

Ըստ Տ.Աբրահամյանի, իշխանության՝ հրատապ այս քայլերի իրականացումը, շտապողականությունը բավականին հարցեր է առաջացրել այս իրավիճակում։

Միաժամանակ անվտանգության հարցերով փորձագետը նշեց, որ դելիմիտացիան բավականին երկար գործընթաց է ու կարող է Հայաստանը մտնի մի գործընթացի մեջ, որը հետագա տասնամյակներին բավականին վտանգավոր իրավիճակի բերել Հայաստանին՝ անկախ նրանից, թե այդ պահին ով կլինի իշխանության:

«Հայաստանի ու Արցախի շուրջ տեղի ունեցող գործընթացները պետք է լինեն ընդհանուր մեկ փաթեթով: Շատ բան կախված է, թե ինչ փաստաթուղթ կունենանք վերջում:

​Ցանկացած գործընթաց, որը Հայաստանի ու Արցախի շուրջ է տեղի ունենում, պետք է հաշվի առնել շատ կարևոր հանգամանք՝ Արցախի կարգավիճակի հստակեցումը, որի հիմքում պետք է լինի ինքնորոշման իրավունքի իրացման հարցը ու դրա միջազգային ճանաչման հարցը», - ասաց «Պատիվ ունեմ» խմբակցության պատգամավորը։

Նա հայտնեց, որ ԱԺ «Պատիվ ունմ» և Հայաստան» խմբակցությունները, Հայաստանի և Ադրբեջանի շփման գծում տիրող իրավիճակի և դեմարկացիայի խնդրով պայմանավորված, ԱԺ սեպտեմբերի 26-ին հատուկ նիստ հրավիրելու նախաձեռնությամբ են հանդես եկել: