Ձեր վստահելի աղբյուրը

Ազգային ժողովի ընդդիմադիր «Հայաստան» և «Պատիվ ունեմ» խմբակցությունները  նախաձեռնել են «Դատարաններում գործերի՝ օրենքով սահմանված բաշխման կարգի խախտմամբ, ինչպես նաև արդարադատության նախարարի կողմից դատավորների նկատմամբ կարգապահական վարույթների հարուցմամբ արդար դատաքննությունը խոչընդոտող փաստերն ուսումնասիրող քննիչ հանձնաժողով» ստեղծելու գործընթաց: 

«Դուք գիտեք, որ արդար դատաքննության իրավունքի ոլորտում վերջին երեք տարիների ընթացքում բազմաթիվ խնդիրներ են արձանագրվել: Նախկինում ևս եղել են, բայց մի առանձնահատկություն ուներ, որ մշտապես կար որոշակի դինամիկա զարգացման, բարեփոխման, դատարանների անկախության ձևավորման մասով, որոնք վերջին երեք տարիների ընթացքում հաստատուն կերպով գործադիր իշխանությունը ցույց տվեց, որ դրա նկատամբ ունի զրո հանդուրժողականություն»,- ասուլիսում ասաց ԱԺ «Հայաստան» խմբակցության պատգամավոր Արամ Վարդևանյանը:

Ըստ նրա, ամենամեծ խնդիրները, որոնք այսօր կան, և հենց դրանք էլ քննիչ հանձնաժողովը ուսումնասիրելու է, վերաբերում է այն հայտնի խնդրին, որ 2021 թվականի հուլիսին, բնավ պատահական չէր ընտրված ժամանակահատվածը, դատարաններում գործերի համակարգչային միջոցով մակագրման համակարգը, սարքավորումը իշխանությունների կողմից խլվել է. «Այսինքն որոշեցին՝ այլևս չեն կարող թույլ տալ, որ պատահականությունը որոշի, թե որ գործով որ դատավորը պետք է քննության առնի բողոքը, որոշեցին խլել համակարգը: Մինչ օրս համակարգը խլված է և ինչպես է ստացվում, որ 21-րդ դարում, երբ կան տեղեկատվական տեխնոլոգիաների բազմաթիվ լուծումներ, այդ համակարգը չի գործում»:

Նա հիշեցրեց, որ 2013-14 թթ. միջազգային կազմակերպությունների օժանդակությամբ ՀՀ իշխանությունները ներդրել էին այդ համակարգը, որը հենց դատարանների անկախության երաշխավորման կարևոր գործիքներից մեկն էր, որը ողջունվել էր Եվրոպայի խորհրդի, ԱՄՆ դեսպանատան կողմից, բայց այնպես է ստացվել, ըստ ընդդիմադիր պատգամավորի, որ այսօր հենց այդ կազմակերպությունները որևէ մտահոգություն նշված իրավիճակի վերաբերյալ չունեն:

«Սա իրականում առաջանցնում է այն իրավիճակը, որ բոլոր այդ գործերով ունենք խաթարված արդար դատաքննության իրավունք, և օրենքի հիման վրա ստեղծված դատարանի իրավունք»,- ասաց Արամ Վարդևանյանը:

Նա նշեց, որ քննիչ հանձնաժողովի ուսումնասիրության առարկան է լինելու նաև  արդարադատության նախարարության կողմից դատավորների նկատմամբ հարուցված կարգապահական վարույթները, որոնք ամենամեծ թափը ստացել են 2020 թվականի նոյեմբերից, որովհետև այդ ժամանակահատվածից սկսած իշխանությունների համար սկզբունքային էին կալանքների ֆետիշացումը, որոնք սակայն արդյունք չէին ստանում դատավորների կամային հատկանիշների դրսևորման համար:

«Այդ ինչպե՞ս է ստացվում, որ արդարադատության նախարարը որոշում է x կամ y տրամաբանությամբ լավագույն դատավորների նկատմամբ հարուցել կարգապահական վարույթներ, վատագույն դատավորների նկատմամբ չհարուցել»,- ասաց Արամ Վարդևանյանը:

Նա հայտնեց, որ նախատեսում են երեքամսյա ժամկետում ավարտել աշխատանքները և մանրամասն ներկայացնել այդ երկու խնդիրների վերաբերյալ իրական իրավիճակն ու զեկույցով հանդես գալ: