Ձեր վստահելի աղբյուրը

«Ժողովրդավարությունից խոսող իշխանությունները հերթական անգամ հաստատում են, որ ժողովրդավարության հետ առնչություն չունեն մեկ պարզ պատճառով՝ ժողովրդից հերթական անգամ թաքուն պրոցեսներ են ընթանում»,- ասուլիսում ասաց ԱԺ «Հայաստան» խմբակցության պատգամավոր Արամ Վարդևանյանը:

Նա նշեց, որ սա փաստ է, ԱԳՆ պարզաբանումից ևս պարզ է դառնում, որ հերթական անգամ թաքուն պրոցեսներ են ընթանում:

Ա. Վարդևանյանը հիշեցրեց, որ 1960-ականներից ընդունված պարզ սկզբունք կա՝  եթե պետություններից մեկը մյուսին ուզում է ստիպի մի թուղթ ստորգրել,  դրա համար կոնվենցիա է ընդունվել, որը վավերացրել են նաև Հայաստանը, Ադրբեջանը, Ռուսաստանը, Թուրքիան:

«Կոնվենցիան ասում է՝ եթե մեկին ուժի կամ ուժի սպառնալիքի ներքո ասում ես թուղթ ստորագրի, եթե  նույնիսկ ստորագրի էլ, առոչինչ է: Սա բառացի գրված է, միջազգային  ամենապարզ սկզբունքներից մեկն է: Հիմա հարց՝ եթե մեկը եկել, մտել է  մեր տուն, մեր արտգործնախարարը, դատախազն ասում են՝ դա հանցագործություն է,  ապօրինի եկել, մտել են մեր տուն, չեն գնում և հիմա էլ ասում են՝ եկեք մի հատ էլ թուղթ ստորագենք, արդյո՞ք  չեղավ ուժի սպառնալիքի լեզվով մեզ հետ խոսել:

Երբ մինչև հիմա մեր հայ տղաներին զոռով, ռազմագերու կարգավիճակով պահում են ադրբեջանական բանտերում ու չեն վերադարձնում, չեղա՞վ որ սպառնալիքի  լեզվով են խոսում:

Եղավ չէ՞: Սա պարզ ճշմարտություն է, պարզ ու հստակ կոնվենցիոնալ ձևակերպում է»,- ասաց ընդդիմադիր պատգամավորը: