Ձեր վստահելի աղբյուրը

Ելույթ ունենալով Ամանորի տոնական օրերն աշխատանքային դարձնելու նախագծի օգտին ԱԺ պատգամավոր Արսեն Թորոսյանը հայտնեց, որ իր մտքով էլ է անցել այդ տոնական օրերն աշխատանքային դարձնել, քանի որ, լինելով փոքր բժշկական հիմնարկի տնօրեն, միշտ զարմացել է, թե ինչպես կարելի է երկար հանգստանալ, երբ այդքան հիվանդ կա:

Նախկին նախարարը սակայն շրջանցեց այն փաստ, որ բուժհիմնարկներում տոն օրերին միշտ էլ լինում է բժիշկների հերթափոխային աշխատանք:

Թորոսյանը հայտարարեց, որ քաղաքակիրթ աշխարհին նմանվելու նման օրենքների քննարկումների ժամանակ, շատ էժան շահարկումներ են անում և սկսում են այն անհրակի կապել քրիստոնեական արժեքների հետ:

«Հայաստան» խմբակցության պատգամավոր Գեղամ Նազարյանը տեղից նկատեց, որ կրոնական հարցերը, մեռելոցների հարցն էժան շահարկում չէ:

«Ու խնդրում եմ տեղից չխոսել ու ընդհանրապես՝ պարոն Նազարյան»,-Գեղամ Նազարյանին դիմեց Արսեն Թորասյանը:

Նազարյանը նկատեց, որ Թորոսյանը կրոնից հեռու է ու աթեիստ:

«Հա աթեիստ եմ, հարցեր կան, ի տարբերություն շատերի ես չեմ թաքցնում կրոնական պատկանելիությունս և չպատկանելիությունս»,-արձագանքեց Արսեն Թորոսյանը:

Գեղամ Նազարյանը հայտնեց, որ այո հարցեր կան ու՝ շատ մեծ:

Պատգամավոր Թորոսյանը շարունակեց ելույթը և հայտնեց, որ Հայաստանն ազատ օրերով ռեկորդակիր է, իսկ երբ ասվում է, որ դեկտեմբերի 31-ը և 1-ը քիչ է, ապա ցանկանում է հիշեցնել, որ «արանքում շաբաթ և կիրակիներ էլ են լինում»:

«Պարո՛ն Թորոսյան, կարծում եմ, որ առնվազն բարոյական չէ դասեր տալ քրիստոնյաներին, մանավանդ, որ աթեիստ եք»,-իր ելույթում Արսեն Թորոսյանին արձագանքեց «Հայաստան» խմբակցության պատգամավոր Ագնեսա Խամոյանը  և նշեց, որ ժողովուրդը լավ հիշում է, որ Առողջապահության նախարար Թորոսյանը ժամանակին հայտարարում էր, որ կորոնավիրուսը սովորական գրիպ է և ինքն իր երեխաներին ուղարկելու է դպրոց: