Ձեր վստահելի աղբյուրը

ԱԺ «Հայաստան» խմբակցության պատգամավոր Թադևոս Ավետիսյանի գնահատմամբ՝ «ՀՀ տոների և հիշատակի օրերի մասին» օրենքում փոփոխություններ կատարելու մասին օրենքի նախագիծը կարևոր է, վերաբերում է  650  հազար աշխատողի, մոտ 40 հազար գործատուի:

Հիշեցնենք, որ ԱԺ-ում քննարկվում է «ՀՀ տոների և հիշատակի օրերի մասին» օրենքում փոփոխություններ կատարելու մասին օրենքի նախագիծը, որով առաջարկվում է հունվարի 2-ը, 3-ը, 4-ը, 5-ը և 7-ը սահմանել աշխատանքային օրեր: Հիմնական զեկուցողն է էկոնոմիկայի նախարար Վահան Քերոբյանը:

«Այս նախաձեռնությունը քննարկվել է ոչ թե միայն բիզնես շահի տեսանկյունից, նաև աշխատողների ընդհանուր իրավունքի կամ հանրային շահի տեսանկյունից: Բայց  դուք՝ պարոն Քերոբյան, իրավացիորեն երևի չնշեցիք այն թվերը, որոնք բերել եք որպես հիմնավորում: Ըստ էության, այդտեղ հիմնավորում չկա, ցավում եմ, որ  էկոնոմիկայի նախարարության ներկայացրած նախագծում տնտեսությանը  վերաբերող հաշավարկներն այդպիս մեթոդներով են իրականացվում:

Վերցրել եք, մեխանիկորեն ավելացրել եք աշխատանքային օրերի թիվը,  ենթադրենք 4-5-ով, և դրան վերագրել եք մի ամբողջ  ՀՆԱ, տնտեսության  տարբեր ոլորտներ: Խնդրում եմ հանեք դա, որպեսզի նաև մեր պոտենցիալ ներդրողները չկարդան այդ մասին»,- ասաց Թ. Ավետիսյանը:

Նա նշեց, որ հիմնավորում չկա և մեծ հարց է՝ թե այդ օրերի ավելացումը ՀՆԱ-ի ավելացում կբերի՞, թե՞ չի բերի: Մյուս կարևոր խնդիրը, ըստ ընդդիմադիր պատգամավորի, պետք է հավասարակշռվի այսպիսի նախագծերը նաև աշխատողների իրավունքների տեսանկյունցի:

«Խոսեցիք բիզնեսի մասին, բայց սոցիալական պետության կառավարություն եք ներկայացնում: Այս նախագիծը չի քննարկվել Հանրապետական սոցիալական եռակողմ հանձնաժողովում: Եռակողմ ֆորմատ կա, օրենքի ուժով գործում է հենց այսպիս նախագծերի համար է»,- ասաց Թ. Ավետիսյանը: