Ձեր վստահելի աղբյուրը

Երևանի ընդհանուր իրավասության դատարանի Շենգավիթ նստավայրում դատավոր Աննա Դանիբեկյանի նախագահությամբ  շարունակվում է  Սիլվա Համբարձումյանի գործով նիստը։

Այսօր դատական նիստին ներկայացել էր ՀՀ նախկին փոխվարչապետ, ՀՀ նախագահի աշխատակազմի նախկին ղեկավար, այժմ պատգամավոր Արմեն Գևորգյանի փաստաբան Ալեքսանդր Կոչուբաևը, որը ստանձնեց Գևորգյանի շահերի պաշտպանությունը։

Դատավր Դանիբեկյանի այն նկատառմանը, թե պաշտպանը ծանոթացել է գործի նյութերին, քանի որ դրանք նրան տրամադրվել են դեռ սեպտեմբերի վերջին, Կոչուբաևն արձագանքեց՝ այդպե չէ, հարգելի դատարան։ Նա հիշեցրեց, որ իրեն մի քանի էջ նյութ է տրամադրվել, մի քանի միջնորդության մասին տեղեկություն։

«Բայց հարգելի դատարան, կարծում եմ, վաղ է քննարկել հարցը, թե ես ունեմ նյութերը թե ոչ, քանի որ ես Ձեզ ինքնաբացարկ հայտնելու միջնորդություն ունեմ»,-ասաց Կոչուբաևը։

Պաշտպանը նշեց, որ ինքնաբացարկի միջնորդության նպատակներից մեկն էլ այն է, որ գործը չքննի այնպիսի դատավորը, որն անկողմնակալ, անաչառ չէ, որը կարող է անաչառ դիտորդի մոտ կասկածներ առաջացնել։

«Կասկած առաջացնելու դեպքում այս ինստիտուտը հնարավորություն է տալիս ինքնաբացարկ հայտնել դատավորին»,-ասաց Կոչուբաևը։

Նա նշեց՝ հաշվի առնելով իր, Լուսինե Սահակյանի, Էրիկ Ալեքսանյանի, Արմեն Գևորգյանի կնոջ՝ Թամարա Գևորգյանի շուրջ ստեղծված իրավիճակը, գտնում է, որ դատավոր Դանիբեկյանը սուբյեկտիվ դիրքորոշում ունի։

«Բայց ես չեմ կարող այդ մասին պնդում անել։ Բայց վերադառնալով օբյեկտիվ գործոններին, կխոսեմ մի գործի մասին, որով Դուք հանդես եք գալիս որպես տուժող»,-ասաց Կոչուբաևը, հիշեցնելով, երբ պետք էր ՀՀ երկրորդ նախագահ Ռոբերտ Քոչարյանի խափանման միջոցը փոխվեր, տեղեկություններ են տարածվել, որ Դանիբեկյանը վիրահատել է քիթը, ինչի վերաբերյալ ինքը մամուլի ասուլիսում քննադատել է։

Արդյունքում քրեական գործ է հարուցված, որտեղ Կոչուբաևն ունի վկայի կարգավիճակ, Դանիբեկյանը՝ տուժողի, մեղադրյալի կարգավիճակ ունի Նարեկ Մանթաշյանը։

Նա հարցրեց դատավոր, արդյո՞ք այս գործը հաշվի առնելով դատավորը կարող է օբյեկտիվ, բազմակողմանի քննություն իրականացնել՝ պաշտպանեով անաչառության բոլոր տարրերը։

«Խնդրում եմ սրանց անդրադառնալ ծանրակշիռ փաստարկներով։ ՄԻԵԴ-ի մշակած թեստը օբյեկտիվության վերաբերյալ Դուք չեք կարող բավարարել, հարգելի դատարան, քանի որ չեք կարող փարատել կասկածը, որ Դուք լինելու եք անաչառ»,-ասաց նա։

Կոչուբաևը նաև տեղեկացրեց, գործի նյութերն իրեն տրամադրվել են ոչ ամբողջությամբ, իսկ այդ տրամադրված ծավալին՝ 75 հատոր, ծանոթանալու համար հատկացվել է ընդամենը 7 օր։

Բացարկի միջնորդություն է պատրաստվում ներկայացնել նաև պաշտպան Լուսինե Սահակյանը։ 

ՀՀ երկրորդ նախագահ Ռոբերտ Քոչարյանի պաշտպանները միացան ներկայացված միջնորությանը։ Պաշտպան Հովհաննես Խուդոյանը նշեց, որ դատավարության ընթացքում ակնհայտ է եղել դատավորի սուբյեկտիվ վերաբերմունքը Արմեն Գևորգյանի նկատմամբ։ Նրա խոսքով, դատավարության մասնակիցները տեսել են դատավորի որոշումներն ու գործողությունները, որոնք ակնհայտորեն սահմանափակել են Գևորգյանի իրավունքները։