Ձեր վստահելի աղբյուրը

«Տպավորություն է, որ մենք գործ ունենք մի իրավիճակի հետ, երբ նույնիսկ իշխանություն ներկայացնող պատգամավորն անուղղակի ձևով  մեղադրում է գործադիր իշխանությանը  և ճիշտ է անում»,-ԱԺ-ում «ՀՀ քաղաքացիության մասին» օրենքում լրացումներ և փոփոխություններ կատարելու մասին նախագիծ վերաբերյալ իր ելույթում հայտարարեց «Հայաստան» խմբակցության քարտուղար Արծվիկ Մինասյանը։ 

Նրա գտնում է, որ լավ կլիներ, եթե գործադիր իշխանությունն իր տեղում լիներ՝  ՊՆ-ն և ԱԱԾ-ն  նորմալ տեղեկատվություն ներկայացնեին, այլ  ոչ թե փորձեն հարձակում կազմակերպել ՄԻՊ-ի վրա, որն այս ընթացքում ցույց տվեց,  որ միակ բարձրաստիճան պաշտոնատար լիազություններ ունեցող անձն է, որը հստակ պաշտպանում է Հայաստանի և հայ ժողովրդի  շահերը:

Անդրադառնալով երկու  տարով օտարերկրյա  պետություններում  հայկական անձնագրերի վավերականության սահմանափակման կառավարության նախաձեռնությանը՝ Արծվիկ Մինասյանը նշեց, որ բազմաթիվ են քաղաքացիների դժգոհություններն ու բողոքները օտարեկրյա պետություններում  անձնագրի  վավերականության սահմանափակման մասով:

«Ստացվում է, որ օտար երկրներում անձնագրերի վավերականացումը սահմանափակում եք 2 տարով, այդ դեպքում  նրանք ի՞նչ անեն,  ում, օրինակ, 4 տարով է տրված վավերականացումը»,-նկատեց պատգամավորը և հավելեց. «Իմ անձնագրի ժամկետն ավարտվել է և ես ոչ միայն հին նմուշի, այլև կենսաչափական անձնագիր ստանալ չեմ կարողանում, որովհետև կենսաչափական անձնագրեր չկան»:

Նա կոչ արեց ապահովել կենսաչափական անձնագրերով, որից հետո նոր միայն նման սահմանափակումներ բերեն խորհրդարան:

Մինչ այդ «Հայաստանի Հանրապետության քաղաքացիության մասին» օրենքում լրացումներ և փոփոխություններ կատարելու մասին նախագիծը ներկայացնելիս ոստիկանության պետի տեղակալ Արա Ֆիդանյանը նշեց.«Նախագիծն մշակվել է օրենքի կիրառության ընթացքում առաջացած գործնական խնդիրներն լուծելու, «Ապաքաղաքացիության կրճատման մասին» կոնվենցիայով ստանձնած պարտավորությունները պատշաճ իրականացնելու, ինչպես նաև քաղաքացիության հարցերի լուծման ընթացքում վարչարարությունն առավել պարզեցնելու նպատակով»:

Նա տեեղեկացրեց, որ երկու տարով վավերականության սահմանելուց բացի, նախագծով առաջարկվում է ՀՀ-ում մշտապես բնակվող ազգությամբ հայերի և ԽՍՀՄ նախկին հանրապետությունների այլ քաղաքացիների համար ՀՀ քաղաքացիության ճանաչման դիմում ներկայացնելու օրենքով սահմանված ժամկետը երկարաձգել մինչև 2023 դեկտեմբերի 31-ը: