Քննիչ հանձնաժողովի ստեղծումը ՀՀ բոլոր դատարանների մուտքերը փակելու վարչապետի կոչի հետ համեմատելու հմտություն պետք է ունենալ . Վարդևանյան
«Դուք բերել եք մի նախագիծ, որով քննիչ հանձնաժողովը, ոչ թե միջամտում է, այլ ներ է խուժում դատական համակարգ, պարո՛ն Վարդևանյան, ես անձամբ ձեզանիից չէի սպասում»,-«Հայաստան» խմբակցության պատգամավոր Արամ Վարդևանյանին դիմեց՝ ՔՊ պատգամավոր Վահագն Ալեքսանյանը՝ նկատելով, որ նա հակասում է ինքն իրեն, երբ քննադատում էր դատարանները շրջափակելը և հիմա նման նախագիծ է բերում:
ԱԺ-ն քննարկում է Արամ Վարդևանյանի նախաձեռնած՝ Դատարաններում գործերի՝ օրենքով սահմանված բաշխման կարգի խախտմամբ, ինչպես նաև Արդարադատության նախարարի կողմից դատավորների նկատմամբ կարգապահական վարույթների հարուցմամբ արդար դատաքննությունը խոչնդոտող փաստերը ուսումնասիրող քննիչ հանձնաժողով ստեղծելու և անդամների թիվը սահմանելու մասին նախագիծը:
«Քննիչ հանձնաժողովի ստեղծումը ՀՀ բոլոր դատարանների մուտքերը և ելքերը շրջափակելու Վարչապետի կոչի հետ նույն հարթության մեջ դնելու և համեմատելու համար պետք է ունենալ նման հմտություն, մի բան էլ ավել»,-պատասխանեց Վարդևանյանը և հիշեցրեց, որ այդ օրը նույնիսկ դատավորներին արգելու էին մուտք գործել շենք, իսկ ոստիկանները իրենց գործողությունները պատճառաբանում էին, որ վարչապետն է նման ցուցում տվել:
Պատգամավորը ասաց, որ այդ երևույթի վերաբերյալ ոչ միայն ինքն է քննադատությամբ հանդես եկել. այլ նաև «ֆրիդմ հաուս» և «Ամնեստի ինթերնեշնլ» կազմակերպությունները:
«Մեղմ ասած, այդ կազմակերպություններն ասում էին՝ շատ վատ բան եք արել, իսկ իմ կարծիքով՝ այն շատ խայտառակ գործողություն էր, իսկ քննիչ հանձնաժողովի ստեղծումը իրավական պրոցես է, նա՝ ոչ»,- ասաց վարդևանյանը:
Ալեքսանյանը պնդեց, որ դատարանների մոտ կանգնած մարդիկ այնքան չեն կարող միջամտել դատավորների գործողությանը, ինչքան ԱԺ քննիչ հանձնաժողովն է քննելու և պատասխաններ պահանջելու դատական համակարգից:
ՔՊ պատգամավորը նկատեց, որ չի ճանաճում Արամ Վարդևանյանի թվարկած դատավորներին, բայց տպավորություն ունի, որ նարնց, որոնք Ռոբերտ Քոչարյանին կալանավորման որոշում են կայացնում, ընդդիմությունը վատն են համարում, իսկ նրանց, որոնք այն չեղարկում էին՝ երկնքից իջած հրեշտակներ են համարում:
Վարդևանյանն ասաց, որ ուրախ է, որ Ալեքսանյանը չի ճանաչում իր թվարկած դատավորներին:
«Ես հույս ունեմ, որ ոչ դուք, ոչ էլ ձեր գործընկերներից ոչ մեկը երբևէ չի առնչվի այն դատավորների հետ, որոնց ես ոչ դրվատանքի խոսքով թվարկում եմ»,-հայտարարեց Վարդևանյանը:
Նա Ալեքսանյանին խորհորդ տվեց վերաքննիչ դատարանի մոտով անցնելիս քաղաքացուն հարցնի, թե Արմեն Դանիելյանը ինչ դատավոր է՝ հիշեցնելով, որ նա Քոչարյանին է կալանավորել:
«Վայ ընենց հետաքրքիր գնահատականներ եք լսելու»,-ասաց ընդդիմադիր պատգամավորը և խորհուրդ տվեց ՔՊ-ի նախկին թիմակից Դավիթ Սանասարյանից էլ հարցնել, թե ինչ կարծիք ունի Արմեն Դանիելյանի, Մնացական Մարտիրոսյանի, Ռշտունու և այլ դատավորների մասին:
