Ձեր վստահելի աղբյուրը

«Մի հիմար մի քար գցեց ձորը, հազար խելոք չկարողացան հանել։ Հիմա հայտնվել են մի իրավիճակում ու ասում են՝ դե տղա՞ եք, հանեք»,- ասաց ԱԺ պատգամավոր, դաշնակցական Քրիստինե Վարդանյանը՝ արձագանքելով Փաշինյանի այն հայտարարությանը,թե ինչո՞ւ ընդդիմադիր ուժերը չեն հայտարարում, որ իշխանության գալով հանելու են Նոյեմբերի 9-ի ստորագրությունը։

«Ի չիք դարձնելը կամ ստորագրություն հանելը չգիտեմ, բայց հույս ունեմ և համոզված եմ, որ այնպիսի երկիր ենք ստեղծելու, որ իրավիճակը 180 աստիճան տարբեր է լինելու։ Այդ պայմանագրին կարող ենք չնայել էլ, չի կաշկանդելու ու այս ամոթի շրջանը վերջանալու է»։

Պատգամավորն արձագանքեց նաև ՀՅԴ-ի հասցեին հնչող մեղադրանքներին՝ ասելով․

«Արցախի կորստի մեջ մի կուսակցության եք մեղադրում, որը արցախյան պատերազմների ընթացքում երևի ավելի շատ զոհ է տվել, քան դուք 2018-ից առաջ կուսակցության անդամ ունեիք։ Իմ կուսակցության ներկայացուցիչները, անցած տարի պատերազմի ընթացքում ձեր հետ հանդիպումից մի հատ կարևոր բան են ասել ՝ «չնայած բոլոր տարաձայնություններին, մենք հայոց բանակի զինվորն ենք այն պահից, երբ պատերազմ է հայտարարվել»։ Միևնույն ժամանակ հարց են տվել՝ «վերջը մենք կռվում ենք հաղթելո՞ւ,թե պարտվելու համար»։ Պարզվեց՝ կռվում ենք պարտվելու համար»։ 

Վարդանյանը հիշեցնում է Փաշինյանին, որ այն պահից, երբ պատերազմ է հայտարարվել վարչապետի միակ գործը չպարտվելն էր, մնացած ամեն ինչը պետք է դրան ստորադասեին։

«Ցանկացած այլ իշխանության պարագայում տրամաբանական կլիներ նայեի ու հարցնեի, այդ ե՞րբ ենք Շուշիի ու Հադրութի տալու մասին բանակցություններ վարել, բայց քանի որ դուք եք իմ առջև , անիմաստ է ցանկացած հարց։ Դրա համար ոչ թե ձեզ պետք է դիմեմ, այլ քաղաքացիներին»։

Քաղաքացիներին պատգամավորը  հիշեցնում է, որ իրավիճակից դուրս գալու ելքը՝ փողոց դուրս գալն է։

«Եթե ուզում եք տեսնել, որ այս իշխանությունները հաշվետու են իրենց արարքների համար կամ պատասխանատվություն են կրում, միակ միջոցը՝ փողոցում հազարավոր քաղաքացիների ներկայությունն է։ Մեր միակ գործն էլ դառնում է դա կազմակերպելը, որովհետև այս մարդիկ ուրիշ լեզու չեն հասկանում»,- հայտարարեց նա։

Փաշինյանն էլ արձագանքեց, թե պատգամավորի ավագ գործընկերներն իր հետ հանդիպումներից, եթե եկել ասել են այն՝  այն ինչ ասաց, ուրեմն խաբել են։ Պատասխանն ուրախություն առաջացրեց իշխանական պատգամավորների շրջանում։

Ի պատասխան Քրիստինե Վարդանյանն ասաց․ «Հադրութն ու Շուշին ե՞ք հետ բերել, որ այսքան ուրախանում եք։ Էս  երեք ամիսների ընթացքում միայն կարողացանք ձեզ բացատրել, որ ծափ տալ պետք չէ»։

Իսկ Փաշինյանին ի պատասխան արձագանեց․ «Ձայնագրություններ ունեք, հրապարակեք»։

Պատգամավորը նաև հույս հայտնեց, որ Փաշինյանը գոնե մեկ անգամ կարձագանքի Ալիևին։