Ձեր վստահելի աղբյուրը

«Պարզաբանումները, մոտեցումը, ներկայացման ձևն ու այն կոնտենտը, որը փոխանցվել էր խորհրդարանին երեկ փակ քննարկման ժամանակ, չի կարող մեզ լիարժեք հնարավորություն տալ պատկերը հասկանալ և դրանից լիրաժեք պատկերացում կազմել»,- ԱԺ-ում լրագրողների հետ զրույցում ասաց «Պատիվ ունեմ» խմբակցության պատգամանավոր Տիգրան Աբրահամյանը՝ խոսելով  ԱԺ-ում երեկ «Հայաստանի Հանրապետության և Ադրբեջանի Հանրապետության շփման գծում տիրող իրավիճակը և սահմանազատման խնդիրները» թեմայով հրատապ քննարկման մասին, որն անցկացվել է փակ ռեժիմով։

Նրա փոխանցմամբ, հարակից զեկուցողների հիմնական ասելիքն այն էր, որ առաջնագծում իրականացվում են բավարար աշխատանքներ, նրանք իրավիճակը մտահոգիչ չեն համարում։

Ինչ վերաբերում է այդ հրատապ քննարկման արդյունքում Արցախի նկատմամբ ադրբեջանաթուրքական ագրեսիան դատապարտող հայտարարությանը, որն այսօր ներկայացվեց ԱԺ-ում և իշխանական պատգամավորները մերժեցին, Տ.Աբրահամյանն ասաց, որ այն կազմվել էր, քանի որ փակ նիստի ընթացքում իրենց հարցադրումներին բավարար պատասխաններ չեն հնչել։

«Այդ հայտարարությունը մենք երեկ փոխանցել ենք իշխանությանը, իշխանությունն ունեցել է իր վերապահումները, իսկ մենք արձանագրել ենք, որ ընդդիմության համար կան կարմիր գծեր, որևէ ձևով չեն կարող խախտվել, այդ պայմաններում, բնականաբար, իշխանությունը չէր կարող կողմ քվեարկել»,- նշեց նա։

Հարցին՝ ինչպես նշեցին ՔՊ-ականները, հայտարարության մեջ տեղ են գտել ներքաղաքական բովանդակություն ունեցող ձևակերպումներ, դա՞ է պատճատը, որ մերժեցին, ընդդիմադիր պատգամավորը պատասխանեց. «Չեմ կարծում, որ գլխավոր խնդիրը ներքաղաքականն էր։ Ովքեր ծանոթացել են հայտարարության տեքտսին, առաջին բանը, որ արձանագրում են՝ դա բխում է ոչ միայն ընդդիմության, հասարակության շահերից, այլև բխում է իշխանության շահերից, որովհետև իշխանությունը պետք է իմանա, որ կա նաև հանրության կամքը՝ սահմանելու այն կարմիր գծերը, որոնց պայմաններում իշխանությունը չի կարող ավելի քայլ կատարել։

Խնդիրը կարող է լինել այն հարցում, թե ինչպիսի մոտեցումներ ունեն ընդդիմությունն ու իշխանությունը բանակցային գործընթացի, սահմանազատման գործընթացի հարցում։ Այս պարագայում հայտարարության տեքստը հաշվի առնելով՝ ցույց է տալիս իշխանության մոտեցումը Արցախի հետ կապված և սահմանազատման գործընթացներին։ 

Այս հայտարարությամբ խորհրդարանը սահմանում էր այն սահմանափակումները, որոնցից այն կողմ գործադիր իշխանությունը չէր կարող գործել։ Կարծում եմ՝ առաջին հերթին սա չէր բավարարում նրանց, քանի որ այս իշխանությունը կարծես թե համարում է, որ ինքն ամեն ինչ կարող է անել, վեր է օրենքից, բանակցում է այն կետից, որից ինքն է նպատակահարմար համարում, իսկ մենք տեսել ենք, թե այդպիսի ընթացքն ինչ հետևանքներ է բերում մեր երկրի համար»։ 

Նա ներկայացրեց, թե որոնք են ընդդիմության հիմնական ասելիքն այս հարցում. «Սահմանազատման հետ կապված՝ Հայաստանն այսօր ծանր իրավիճակում է, նման լուրջ պրոցեսի մեջ մտնելու և շահած դուրս գալու հնարավորություն չունի։ Կարծում ենք՝ ինչ-որ փուլում պետք է լինի սահմանազատում,  բայց այդ հարցում շտապողականություն չպետք է լինի։

Քանի որ հիմք է դրված քարտեզների հարցը, իշխանությունն անընդհատ հղում է անում այս կամ այն քարտեզներին, մեր մոտեցումն է՝ սովետական ժամանակաշրջանում տեղի ունեցած վարչական փոփոխությունները միջազգային իրավունքի առումով պարտադիր չէ մեզ համար, սովետական ժամանակաշրջանում այդ փոփոխություններն արվել են Հայաստանի, Ադրբեջանի և Խորհրդային միության սահմանադրությունների խախտումներով։ Ուստի ասում ենք՝ ի սկզբանե հայտարարել, որ առաջնորդվում ենք սովետական քարտեզերով, նեղացնում է մեր բանակցային  հնարավորությունները։

Մեր ասելինքն է՝ որևէ պայմաններում որպես բանակցությունների նյութ կարելի է հաշվի առնել քարտեզները, բայց ամբողջության մեջ միայն հիմնվել այդ քարտեզների վրա, Հայաստանի ու Արցախի շահերից չի բխում»։

Ըստ նրա, գործընթացը ենթադրում է բանակցությունների բավականին ծանր և երկար փուլ, իսկ բանակցությունները ենթադրում են մեզ համար շահեկան գործիքների առկայություն։

«Իշխանությունը ի սկզբանե հայտարարելով այսպես կոչված ադրբեջանական անկլավների մասին, տարբեր բնակավայրերին ադրբեջանական տեղանուններ տալով՝ նեղացրել է մեր բանակցային հնարավորությունները և մեկնարկային իրավիճակում Հայաստանին բավական բարդ դրության մեջ է դրել»,- ընդգծեց «Պատիվ ունեմ» խմբակցության պատգամավորը։

Բացի այդ, ըստ նրա, դելիմիտացիայի գործընթացը ենթադրում է մասնագիտական խորը քննարկումներ, որն, իր տպավորությամբ, առհասարակ չի իրականացվել։