Լրատվամիջոցից պահանջում եք կատարել մի գործառույթ, որն անգամ ԱԱԾ-ն ի վիճակի չէ կատարել. Արեգնազ Մանուկյանը՝ ՔՊ-ականներին
Ազգային ժողովում «Զանգվածային լրատվության մասին» օրենքում փոփոխություններ և լրացումներ կատարելու մասին նախագծի քննարկման ժամանակ «Հայաստան» խմբակցության պատգամավոր Գեղամ Մանուկյանը ընթերցեց մեդիափորձագետ Սամվել Մարտիրոսյանի գրառումն այս նախագծի վերաբերյալ. «Ինձ շատ հետաքրքիր է, թե որ մեդիա փորձագետներին է սա ներկայացվել ու իրենք իսկապես հավանություն են տվել այս տարօրինակագույն օրինագծին։ Այս օրինագծի հիման վրա «Հայկական ժամանակ»-ը կարող է դիտարկվել որպես անանուն հղում, քանի դոմեյնի գրանցման տվյալները փակ են»։
Նա նախագծի հիմնական զեկուցող «Քաղաքացիական պայմանագիր» խմբակցության պատգամավոր Արթուր Հովհաննիսյանից հետաքրքրվեց՝ քննարկումներ եղե՞լ են մասնագիտական խմբերի հետ, օրինակ՝ Ժուռնալիստների միություն, Մեդիա նախաձեռնությունների կենտրոն, Երևանի մամուլի ակումբ, «Ասպարեզ» ակումբ։
Արթուր Հովհաննիսյանն ասաց, որ նշված անուններից մի քանիսի հետ քննարկումներ չեն եղել, կարծում է՝ չէին էլ կարող լինել, քննարկումներ եղել են Երևանի մամուլի ակումբի ղեկավարի, Խոսքի ազատության պաշտպանության կոմիտեի հետ, մի շարք այլ գործըներների, Եվրախորհրդարանի, ԵԱՀԿ գործընկերների եզրակցությունը կա և լրամշակված տարբերակը այդ քննարկումների արդյունքում է ձևակերպվել։
Գեղամ Մանուկյանը զարմանք հայտնեց, որ Երևանի մամուլի ակումբի Բորիս Նավասարդյանը դրական կարծիք է հայտնել։ Սակայն Ա. Հովհաննիսյանը նշեց. «Չասեցի դրական կարծիք, ասացի՝ քննարկում է եղել»։
Ընդդիմադիր պատգամավորի խոսքով, թելեգրամյան ալիքներում, սոցիալական հարթակներում հրապարակվում են բազմաթիվ տեղեկություններ, որոնք ամբողջովին իրականության հետ են կապված, սակայն այժմ լրատվամիջոցները կխուսափեն օգտվել, քանի որ վարչական պատիժների են ենթարկվելու։
Ա.Հովհաննիսյանն ասաց, որ խնդիրը բովանդակությունն է, չեն արգելում որևէ աղբյուրի վրա հղում անել։
«Հայաստան» խմբակցության պատգամավոր Արեգնազ Մանուկյանն էլ հարցրեց՝ կարո՞ղ են զուտ տեխնիկանապես ներկայացնել, թե լրատվամիջոցն ինչպե՞ս պետք է պարզի՝ այդ աղբյուրը նույնականացված է, թե՞ ոչ։
«Կան լրատվամիջոցներ, որոնք ֆեյսբուքյան օգտատերերի կարծիքներ են հրապարակում իրենց էջերում, ինչպե՞ս պետք է պարզեն՝ այդ օգտատերերն իրական են, ֆեյք են, թե ոչ։ Ունենք հայտնի դեպք, երբ անգամ ԱԱԾ-ն չկարողացավ պարզել՝ ֆեյք է, թե ոչ, ով է նրա հետևում կանգնած, մի քանի հոգու բռնեցին, ստիպված եղան ազատ արձակել, որովետև այդպես էլ չկարողացան ապացուցել, որ այդ անձինք էին կոնկրետ այդ օգտատիրոջ հետևում կանգնած։ Այսինքն՝ լրատվամիջոցից պահանջում եք կատարել մի գործառույթ, որն անգամ ԱԱԾ-ն ի վիճակի չէ կատարել»,- ասաց Ա. Մանուկյանը։
ՔՊ-ական պատգամավորը պատասխանեց. «Ամենևին ոչ։ Լրամշակված տարբերակում ձևակերպված են, թե որոնք են չնույնականացված աղբյուրները»։
Ըստ Արեգնազ Մանուկյանի, այսպես իրականում պայքարում են գրանցված լրատվամիջոցի դեմ, նրան են տուգանում. «Իսկ ֆեյք տարածող լրատվամիջոցները, որոնք շատ հաճախ և ըստ օդում կախված լուրերի նաև ձեր հովանավությամբ են գործում և կեղծիքներ են տարածում, ազատորեն կարող են գործել և ինչ ուզեն, դա էլ տարածեն»։
«Հայաստան» խմբակցության պատգամավոր Գեղամ Նազարյանն էլ ասաց, որ եթե ընդունեն նպատակը լավն է, բարի է, լրատվական դաշտը մաքրում են կեղծ, իրն ականությանը չհամապատասխանող տեղեկությունից, բայց դրանով այդ խնդիրը չեն լուծում, ընդամենը լրատվամիջոցին դնում են ծանրության տակ։
«Հազարավոր, հարյուրավոր յութուբյան ալիքներ նույնը տարածելու են։ Սովորական քաղաքացին չի տարբերելու՝ դելտան է նորմալ լրատվամիջոց, թե իգրեկը։ Մենք այդ խնդիրն էլ ունենք, թե ո՞րն է ի վերջո լրատվամիջոցը, որովհետև այսօր ցանկացած մեկը ֆեյսբուքում իրեն իրավունք է վերապահում լրատվամիջոցի դեր կատարել։ Այդ խնդիրը ձեր առաջարկով չի լուծվելու։ Շատերը կարող են հանգիստ եզրահանգել, որ այս ամեն ինչն արվում է լուրջ, կայացած լրատվամիջոցներին ճնշելու համար»,- նշեց ընդդիմադիր պատգամավորը։
Հարակից հրապարակումներ`
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
