Ձեր վստահելի աղբյուրը

Փորձագետների խումբը երեքշաբթի օրը ճնշող մեծամասնությամբ քվեարկել է՝ առաջարկելով ԱՄՆ-ի Սննդամթերքի և դեղամիջոցների վարչությանը թույլատրել Pfizer և BioNTech պատվաստանյութերը կիրառել 5-ից 11 տարեկան երեխաների համար: Այս մասին գրում է Ամերիկայի Ձայնը։

Այս տարիքային խմբի համար պատվաստման թույլտվությունը կարևոր քայլ կարող է դառնալ 28 միլիոն երեխաների համար, որոնց մեծ մասն արդեն իսկ վերադարձել են դպրոց:

Պատվաստանյութը կարող է հասանելի լինել հաջորդ շաբաթ։ ԱՄՆ-ի Սննդամթերքի և դեղամիջոցների վարչությունը (FDA) պարտավոր չէ հետևել իր փորձագետների խորհուրդներին, սակայն իր որոշումները հիմնականում կայացնում է նրանցից ստացված խորհուրդները հաշվի առնելով:

Եթե FDA-ն թույլատրի պատվաստումները այս տարիքային խմբի համար, ապա հաջորդ շաբաթ ԱՄՆ-ի Հիվանդությունների վերահսկման և կանխարգելման կենտրոնի խորհրդատվական խումբը կհանդիպի պատվաստանյութի կիրառման վերաբերյալ առաջարկություն ներկայացնելու համար:

Թեև երեխաների մոտ քովիդ հիվանդության ծանր կամ մահացության դեպքեր ավելի հազվադեպ են գրանցվել, ‘’Դելտա’’ ենթատեսակի տարածման արդյունքում չպատվաստված երեխաների շրջանում արձանագրվել է հիվանդության բարձր ցուցանիշ: Ամերիկյան մանկաբուժության ակադեմիայի տվյալները ցույց են տալիս, որ ԱՄՆ-ում COVID-19-ից մահացել է 500 երեխա:

Միայն մի քանի այլ երկրներ են տվել տարիքային այս խմբի անձանց պատվաստելու արտոնություն: Այդ երկրների շարքում են Չինաստանը, Կուբան և Արաբական Միացյալ Էմիրությունները:

Երկուշաբթի օրը Moderna-ն էր հրապարակել տվյալներ 6-ից 11 տարեկան երեխաների նկատմամբ իր կլինիկական փորձարկումների արդյունքները և հայտարարել, որ շուտով իշխանություններից կխնդրի տարիքային այդ խմբի նկատմամբ իր պատվաստանյութը կիրառելու թույլտվություն:

Դեռևս չի ասվում, թե ԱՄՆ-ի համապատասխան մարմինները երբ են մտադիր քննարկել այդ հարցը:
Pfizer-ը հայտարարել է, որ մինչև տարեվերջ կարող է ունենալ իր կլինիկական փորձարկումների տվյալները նույնիսկ ավելի փոքր` 2-ից 4 տարեկան երեխաների համար: