Ձեր վստահելի աղբյուրը

«ՀՀ սահմաններին կատարվող գործողությունների հրամանը պետք է լիներ գրավոր ու համապատասխան մարմնի հետ որոշված:  Փաշինյանի  պատասխանից չերևաց, թե ինչ օրգանի միջոցով է ինքն այդ որոշումն ընդունել»,- ԱԺ-ում ճեպազրույցում ասաց «Հայաստան» խմբակցության ղեկավար Սեյրան Օհանյանը՝  պատասխանելով հարցին, թե օրերս Փաշինյանն ասել է, որ Սյունիքում 2020 թ. դեկտեմբերի 18-ին զորքերի հետքաշման հրամանն ինքն է տվել:

Նա նշեց, որ հակառակորդն իր GPS-ներով  միանգամից անցել էլ և դելիմիտացային, և դեմարկացիայի, ներխուժել է ՀՀ սահմաններից ներս և արդեն իսկ իրենց համար սահմաններ են կահավորում:

«Մարդու իրավունքների պաշտպանի ահազանգերին, որ մեր տարածքի ներսում ադրբեջանցիները ամրաշինական աշխատանքներ են իրականացնում, որքան պետք է տհաս ու հեռու լինես այդ ամենից, որ ահազանգող, մտահոգված պաշտոնյանին պատասխանելով ասեք՝ դե ոչինչ, մի քանի ամիս է մնացել, որ իր պարտականությունները կատարի»,- ասաց Ս. Օհանյանը:

Նա ընդգծեց՝ այնտեղ, որտեղ զինվորի ոտք է դրվում, հատկապես  թուրքի, դրանից հետո ավելի դժվար է լինելու իրական սահմանների  ճշտման ժամանակ հետ  շպրտել այն տարածքներից, որտեղ իրենք կանգնած են:

Ասուլիսին ներկա «Հայաստան» խմբակցության պատգամավոր Արամ Վարդևանյանն հարցադրում արեց՝ արդյո՞ք կարող է դատախազությունը հուշի, թե որտեղ է  գրված, որ ՀՀ Զինված ուժերը կարող են բանավոր ցուցումուվ տարածքների մեր անձեռնմխելիությունից, սահմանների անձեռնմխելիությունից հետ քաշվել, որտե՞ղ է  գրված, որ  վարչապետը կարող է նման բանավոր հրամաններ ու որոշումներ կայացնի:

«Գլխավոր հրամանատար լինելը Հայաստանի սահմաները պահելու պարտականությունն է, ոչ թե զիջելու:

Եթե մենք իրականում լինեինք այնպես, ինչպես գրված է  Սահմանադրության մեջ՝ իրավական և   ժողովրդավարական պետություն ենք,  ապա կտեսնեինք, որ արդեն երեկ գլխավոր դատախազությունը հայտարարություն էր տարածել, որ այս աղմկահարույց  խոստովանական դիրքորոշման վերաբերյալ արդեն իսկ նյութեր են առնվազն նախապատրաստվում»,- ասաց Ա. Վարդևանյանը: