Ձեր վստահելի աղբյուրը

«Բյուջեով նախատեսված է, որ պետական պահպանության ապահովումն 4 մլրդ 38 մլն դրամ է դառնում: Ըստ ձեր ներկայացրած ցուցանիշների, եթե 2018-19 թթ 11 պահպանության օբյեկտներ էին, ապա 2020 թ.-ից սկսած 10 պահպանության օբյեկտ է»,-Աժ հանձնաժաղովների միասնական նիստում 2022 թվականի բյուջեի քննարկմանը ԱԱԾ տնօրենի տեղակալ Արամ Հակոբյանին դիմեց «Հայաստան» խմբակցության քարտուղար Արծվիկ Մինասյանը և նկատեց, որ չնայած  ՊՊԾ-ի պահպանության օբյեկտների թիվը նվազել է, բայց վերջին երկու տարում ֆինանսավորման աճը կազմել է 70 %:

Պատգամավորը հարցրեց, թե արդյո՞ք այն նշանակում է, որ կառավարության ղեկավարի, ԱԺ նախագահի պաշտպանության ծախսերն են ավելացել:

Արամ Հակոբյանը պատասխանեց, որ ՊՊԾ ղեկավարը կկարողանա հստակեցնել ծախսերի ուղղությունները, բայց բյուջեում նման թվեր չկան:

Արծվիկ Մինասյանը ստիպված կարդաց նախագծում բերված թվերը, ըստ որոնց՝ 2018 թվականին 11 օբյեկտի համար հատկացվել է 2.5 մլրդ դրամ, իսկ 2020 թվականին 10 պահպանվող օբյեկտի համար մոտ 4 մլրդ, 2022թ.-ի համար արդեն՝ 4 մլրդ 38 մլն և թվաբանորեն ճակը ակզմում է 70%:

«Մենք նման աճ չենք ունեցել: Այո, անհրաժեշտության դեպքում լրացուցիչ միջոցներ են ներգրավվել։ Բայց դրանք հիմնական պարբերական ծախսերը չեն, այլ՝  դրվագային»,-ասաց  Հակոբյանը։

Մինչ այդ «Հայաստան» խմբակցության պատգամավոր Արթուր Խաչատրյանն էլ ԱԱԾ տնօրենի տեղակալին խնդրեց հիպոթետիկ իրավիճակի օրինակ բերի, որ ժողովրդի կողմից ընտրված առաջնային մանդատով պատգամավորին մերժվի գաղտնի նյութերին ծանոթանալու հնարավորությունը:

«Օրենքների ընդունումը ձեզնից է կախված, օրենքներ եք ընդունում, որ հնարավորություն ունենաք ծանոթանալ ամեն ինչին, բայց իմացեք, որ դուք գործ ունեք հատուկ ծառայությունների հետ, այնտեղ այնպիսի թղթեր կան, որ ինձ էլ չեն թողնում մոտենալ, ձեզ որտեղի՞ց թողնեն»,-պատասխանեց Արամ Հակոբյանը:

Արթուր Խաչատրյանը նկատեց, որ ինքը խոսում էր բյուջեի ծախսերի մասին:

«Բյուջեի մեջ էլ տողեր կան, որ նման հարցեր է առաջացնում»,-պատասխանեց Հակոբյանը:

Արծվիկ Մինսայանն էլ հրապարակեց մինչ այդ ԱԱԾ-ին ուղղած իր հարցման պատասխանը, որ 2018 թվականից հետո որևէ դեպք չի եղել, որ ԱԱԾ-ն արգելի որևէ պատգամավորի նման նյութերին ծանաթանալ:

Պատգամավորներից մեկը տեղից ասաց, որ գործակալը կարող է նաև ընտրվել պատգամավոր:

«Ընտրված ագենտներին մենք դեմ ենք: Ագենտներին շուտ ոչնչացրեք, պարոն Հակոբյան»,-արձագանքեց նիստը համանախագահող Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը: