Ձեր վստահելի աղբյուրը

Հաքերները գողացել են համաշխարհային առաջնորդների, հոլիվուդյան աստղերի և միլիարդատերերի անձնական տվյալները՝ հսկայական «վիրտուալ կողոպուտ» կատարելով հեղինակավոր Graff ոսկերչական ընկերության վրա: Այս մասին հաղորդում է «dailymail.com»-ը։

Կիբերհանցագործներն արդեն 69 000 գաղտնի փաստաթղթեր են արտահոսել այսպես կոչված «դարք նետ», այդ թվում՝ Դոնալդ Թրամփի, Օփրա Ուինֆրիի, Դեյվիդ Բեքհեմի, սըր Ֆիլիպ Գրինի, Թոմ Հենքսի, Ալեք Բոլդուինի, Սեմուել Էլ Ջեքսոնի հետ կապված ֆայլեր։

Եվ ենթադրվում է, որ հանցագործները պահանջում են տասնյակ միլիոնավոր ֆունտ ստերլինգ՝ դադարեցնելու հետագա զգայուն տեղեկատվության հրապարակումը:

Բրիտանական պարբերականի պնդմամբ՝ ռուսական Conti հաքերային խմբավորումը կանգնած է տվյալների գողության հետևում և պնդում է, որ հրապարակված տեղեկատվությունը, որը վերաբերում է Graff-ի մոտ 11 000 ամենաէլիտար հաճախորդներին, ներկայացնում է նրա գողացված ֆայլերի ընդամենը մեկ տոկոսը:

Գողացվել են փաստաթղթերը, ներառյալ հաճախորդների ցուցակները, հաշիվ-ապրանքագրերը, անդորրագրերը և վարկային նշումները: Դրանք կարող են անհարմար իրավիճակում դնել այն հաճախորդներին, որոնք, օրինակ, կարող են նվերներ գնած լինել գաղտնի սիրուհիների համար կամ որպես կաշառք վերցրել զարդեր:

Լոնդոնյան Graff-ը, որը հիմնադրվել է 83-ամյա Լոուրենս Գրաֆի կողմից, ասել է, որ տեղեկացրել է նրանց, ում անձնական տվյալները կարող են հասանելի դարձած լինել կիբերհանցագործներին: