Ապրանքախմբերի մեծ մասում դրամի փոխարժեքը գնաճի վրա մեծ ազդեցություն չի ունենում. Մարտին Գալստյան

Տնտեսություն 16:05 02/11/2021 Հայաստան

Ապրանքախմբերի մեծ մասում դրամի փոխարժեքը գնաճի վրա մեծ ազդեցություն չի ունենում. Մարտին Գալստյան

«Դրամի ազատ լողացող փոխարժեք ունենք և այս պահի դրությամբ այն մոտ 480 դրամի շրջանակներում է, ինչը որոշակիորեն է ազդում գների վրա»,- հրավիրված մամուլի ասուլիսում հայտնեց ԿԲ նախագահ Մարտին Գալստյանը՝ պատասխանելով լրագրողի հարցին, թե ինչքանով է դրամի փոխարժեքն ազդում թանկացումների վրա:

Նրա խոսքով՝ երեք հիմնական գործոններ կան, որոնք ազդում են գնաճի վրա, որից առաջինը առաջարկի գործոնն է, երբ համաշխարային շուկայում պարենի և սննդամթերքի գների աճ է գրանցվում:

Ըստ Գալստյանի՝ առաջին գործոնի մեջ է մտնում նաև բեռնափոխադրումների և լոգիստիկ շղթաների խաթարումները և երկրորդը՝ ներքին գյուղատնտեսական ապրանքների որոշակի գնաճն է:

Նրա խոսքով՝ երրորդ գործոնը պահանջարկի որոշակի առաջանցիկ աճն է արտադրողական առաջարկի նկատմամբ, որի պատճառով այսօր Հայաստանում առկա է 8.9 % գնաճ:

«Ապրանքախմբերի մեծ մասում մեր դիտարկումներով դրամի փոխարժեքը գնաճի վրա մեծ ազդեցություն չի ունենում»,- հայտնեց ԿԲ նախագահը, բայց նկատեց, որ փոխարժեքը որոշակիրոն կապված է ներմուծման և բեռնափոխադրումների խաթարումների հետ:

Գալստյանը չհամաձայնեց լրագրողի դիտարկմանը, թե բենզինի և շաքարավազի թանկացումը սովորաբար դրամի փոխարժեքի գործոնով է դիտարկվում՝ նշելով, որ շաքարի համաշխարհային գներն այս պահի դրությամբ 2019 թ. դեկտեմբերի համեմատ աճել են 50 %-ով, և այն ավելի լուրջ ազդեցություն է, քան դրամի փոխարժեքը:

Նրա խոսքով՝ նավթի գները մեկ բարելի դիմաց 80 դոլարից ավելի են, որը նույն 2019 թ. դեկտեմբերի համեմատ ևս էական աճ է գրանցել:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: