Ձեր վստահելի աղբյուրը

Քաղաքական վերլուծաբան Վարդան Բալյանը գրում է.

«Սոցմեդիան հանդիսանում է տեղեկատվության հիմնական աղբյուրը Ադրբեջանում: Նույնիսկ գյուղական բնակավայրերում, որտեղ ինտերնետի հասանելիության, տարածման և օգտագործման ներկա ծավալների պարագայում բնակչության մեծամասնությունը տեղեկություններ ստանում է առավելապես հեռուստատեսությունից, սոցիալական մեդիան հանդիսանում է տեղեկատվության հավաստիության ստուգման հարթակը:

Այս համատեքստում կարևոր ենք համարում նշել, որ Ադրբեջանի կառավարությունը մեծ գումարներ է ծախսում համապատասխան սարքավորումների և ծրագրային փաթեթների ձեռքբերման համար, որոնք օգտագործվում են առանձին վեբ-կայքերի հասանելիության սահմանափակման,  թվային դիտարկման և շատ այլ նպատակներով: Համապատասխան տեխնիկական սարքավորումների և ծրագրային միջոցների ձեռքբերումների, միլիոնավոր դոլլարների հասնող ծախսերի մասին կխոսենք առանձին գրառման շրջանակներում: Հիմա արձանագրենք, որ ադրբեջանական պետական կառույցները երկրի ներսում ինտերնետի հասանելության սահմանափակման և օգտագործման վերահսկողության համար օգտագործում են ինչպես օրինական, անպես էլ անօրինական գործիքներ:

Ադրբեջանի տարածքից դուրս տեղակայված սերվերների պարագայում անցանկալի տեղեկատվության աղբյուր կայքերի արգելափակման ամենատարածված մեթոդը  URL հասցեների և բանալի բառերի նույնականացումն է, առանձին, որպես կանոն, բացառիկ դեպքերում կայքը կոտրելը:
Այսինքն՝ ադրբեջանական տեղեկատվական դաշտում արդյունավետ տեղեկատվական աշխատանքը հանրային կարծիքի վրա ազդեցության նպատակով անհրաժեշտ է և կարելի է իրականացնել սոցմեդիայի դաշտում, բայց անհրաժեշտ է մասնագիտական անհրաժեշտ ուղեկցում և աշխատանքի ճիշտ կազմակերպում: Պետք է անենք միասին, մեզ շատ անհրաժեշտ է լինելու, հատկապես, Սփյուռքի մեր հայրենակիցների աջակցությունը: Առանձին խոսակցության թեմա է, դիմեք անհատական նամակով գրանցման համար, Ձեզ հետ կկապվենք:

Մեր մշտադիտարկման արդյունքներով հաստատված է, որ ադրբեջանական կառավարական կառույցները նաև մեր տեղեկատվական հարթակներում իրականացնում են ակտիվ թիրախային ֆիշինգ: Արդյունքում հայկական լրատվականների գերակշիռ մեծամասնությունում և սոցմեդիայի տիրույթում ադրբեջանցիներին հաջողվել և հիմա էլ հաջողվում է իրականացնել տեղեկատվական-հոգեբանական գրոհների ընթացքում նպատակային տեղեկատվության տրանսլյացիա մեր իսկ տեղեկատվական կանալներով և հայ օգտատերերի միջոցով:

Տասնյակ հազարավոր սինթետիկ օգտահաշիվների ստերիլազացումը, որով զբաղվում ենք արդեն մի քանի ամիս, իհարկե, որոշակի դրական արդյունքներ է տվել, բայց մեզ անհրաժեշտ է շատ ավելին, ինչը հնարավոր է, եթե բարձրացնենք մեր օգտատերերի և լրատվականների մեդիագրագիտության մակարդակը և կոլեկտիվ ջանքերով արգելափակենք հակառակորդի տեղեկատվական-հոգեբանական գրոհները:

Վերջին մեկ ամսվա ընթացքում մենք դիտարկում ենք լայնածավալ նախապատրաստական աշխատանք ադրբեջանցիների մոտ: Առաջիկայում կհրապարակենք հայկական տեղեկատվական դաշտում ադրբեջանական տեղեկատվական-հոգեբանական գրոհներին կամա թե ակամա մասնակցող կայքերի, օգտատերերի մասին տվյալներ՝ փաստական ապացույցների կցումով: Խնդրում ենք բոլորին, ովքեր ցանկություն և կամք ունեն հաղթահարել ապատիայի և դեպրեսիայի խտացող մթնոլորտը և մեր տեղեկատվական միջավայրը մաքրել աղբից ու թշնամական պրոպագանդայից, աջակցել, տարածել նման հրապարակումները, միանալ այդ լրատվականների և օգտահաշիվների ստրելիզացման գործողություններին, որոնց մասին կիրազեկենք լրացուցիչ:

Տեղեկացնենք, որ շնորհիվ մեր աջակից հայրենակիցների օժանդակության ավարտել ենք տեխնիկական-ծրագրային միջոցների արդիականացման  առաջին փուլը, որ մեզ հնարավորություն է տալիս այլևս չսահմանափակվել մշտադիտարկումով: Աստծո օգնությամբ, ի զեն»։