Ձեր վստահելի աղբյուրը

«Այսօրվա դրությամբ՝ այդ երաշխիքը, որ կարող է «ՄԻՊ-ի մասին» օրենքով լինել, վերաբերում է նրան, որ նրա բյուջետային միջոցները երբեք չպետք է նվազեն»,-Աժ-ում 2022 թ, բյուջեի քննարկման ժամանակ ընդգծեց «Հայաստան» խմբակցության պատգամավոր Արամ Վարդևանյանը՝ նշելով, որ ժամանակն է սահմանադրական օրենքում մեկ քայլ առաջ գնալ:

Պատգամավորը նկատեց, որ ՄԻՊ-ը շատ հաճախ հանդես է գալիս քննադատական դիրքերից և կարևոր է, որ իշխանություններից բյուջետային միջոցի հարցով կաշկանդվածություն չունենա:

Ընդդիմադիր պատգամավորը նաև անդրադարձավ այսօր ՔԿՀ-ում գրանցված կորոնավիրուսց մահվան առաջին դեպքին և առաջարկեց դիտարկել կորոնավիրուսի համավարակի պայմաններում այլ խափանման միջոցներ կիրառելու հնարավորությունները:

Նկատելով որ ՔԿՀ-ներում, կորոնավիրուսի հետ կապված, վիճակը խնդրահարույց է՝ Արման Թաթոյանը տեղեկացրեց, որ վարակի դեպքերն ավելանում են և արդեն կա մահվան դեպք:

«Պարզաբանումների պահանջով հրատապ նամակ եմ պատրաստել, որը կուղարկեմ Արդարադատության նախարարություն՝ հասկանալու համար ինչ է կատարվում, ինչ միջոցներ են ձեռնարկվում»,-ասաց մարդու իրավունքների պաշտպանը:

Նա տեղեկացրեց, որ ԵԽԽՎ-ի Խոշտանգումների կոմիտեի պահանջ կա, ըստ որի՝ պետք է պետությունը նախաձեռնի ոչ միայն խափանման միջոցների նվազեցում, այլև դատախազների լիազորությունների ընդլայնում:

«Եթե  քրեական գործ է քննվում, դատախազը իրավասու է ինքը քննարկի փոփոխության հարց, կամ, եթե մարդն արդեն դատապարտված է, պայմանական  վաղաժամկետ ազատության հարց լուծվի»,-հայտնեց Արման Թաթոյանը: