Ձեր վստահելի աղբյուրը

«ԱԺ պարգևատրումների, դրամական խրախուսումների ու, ընդհանրապես, քաղաքացիական, դատական, պետական այլ ծառայողների գումարները կազմում են ընդհանուր աշխատավարձի գումարների մոտ 20-22 %-ը»,- 2022 թ պետական բյուջեի քննարկման ժամանակ ԱԺ-ում հայտարարեց «Հայաստան» խմբակցության պատգամավոր Աղվան Վարդանյանը և ֆինանսների նախարար Տիգրան Խաչատրյանին հարցրեց. «Մենք շարունակելո՞ւ ենք այս նույն գործելաոճը՝ պարգևատրումները, խրախուսումները, հակասության մեջ մտնելով օրենսդրության հետ»:

Ընդդիմադիր պատգամավորը նաև նկատեց, որ ԱԺ-ի ծախսերում ներքին գործուղումների համար նախատեսված է 235 հազար դրամ, իսկ արտասահմանյան գործուղումների համար 648 միլիոն դրամ և եզրակացրեց, որ խորհրդարանի հիմնական գործը ոչ թե Հայաստանում է, այլ՝ արտերկրում:

Վարդանյանը հայտնեց, որ «Քաղաքացու օրը» նշելու համար հատկացվելու է 40 միլիոն դրամ և հարցրեց, թե անիմաստ ծախսերից բյուջեն չեն ուզում ազատել:

«Թե որքանով են այդ միջոցառումներն անհրաժեշտ ու արդյունավետ, դրանք համապատասխան ոլորտում լիազորված անձանց պատասխանատվության ու մեկնաբանությունների առարկան են»,- պատասխանեց  Տիգրան Խաչատրյանը և վստահեցրեց, որ բոլոր պարգևավճարները հաշվարկված են օրենսդրությամբ սահմանված կարգով:

ՔՊ խմբակցության պատգամավոր Գևորգ Պապոյանն էլ պարզաբանեց, որ պարգևատրման ֆոնդը վերաբերում է ԱԺ-ի բոլոր աշխատողներին՝ բացի պատգամավորներից:

Տոների մասով Աղվան Վարդանյանի հարցին իր նախաձեռնությամբ ցանկացավ արձագանքել կառավարության աշխատակազմի ղեկավար Արայիկ Հարությունյանը՝ ասելով, որ պետական բյուջեով այս տարի Անկախության տոնի վրա 0 դրամ է ծախսվել:

Նա հատնեց, որ իշխանությունները հնարավորություն ունեն գործընկերների հետ իրականացնել ծրագիր, որպեսզի լրացուցիչ ծանրաբեռնվածություն չլինի բյուջեի վրա:

«Ինչ վերաբերում է Քաղաքացու տոնին, մենք ամեն տարի պետք է նշենք, ասեմ ավելին, հնարավորության դեպքում այդ բյուջեն պետք է ավելացնենք, որովհտեև, ի տարբերություն ձեր իշխանության տարիների, քաղաքացին մեր գերագույն արժեքն է»,- ասաց Հարությունյանը՝ շեշտելով, որ քաղաքացին է, որ ցույց է տալիս յուրաքանչյուրի տեղը քաղաքական կյանքում:

«Այո, մենք չենք կարող նշել օլիգարխի տոն ու չենք նշելու, մենք չենք նշելու բյուջեից գումարներ հափշտակողների տոն, սա այլ արժեհամակարգ կրող քաղաքական ուժերինն է, մենք նշելու ենք քաղաքացու տոնն ու ավելի մեծ շուքով»,- հայտարարեց վարչապետի աշխատակազմի ղեկավարը:

Աղվան Վարդանյանը, նկատելով, որ իշխանությունները քաղաքացու մասին միայն խոսում են, արձագանքեց, թե սովոր չէ նման քննարկումները վերածել քաղաքական «չգիտեմինչերի»:

«Թույլ եք տալիս, թույլ տվեք, դրանով է տարբերվում քաղաքական մարդը պատահական մարդկանցից», - ասաց պատգամավորը և հավելեց, որ եթե ստացվում է 1,2 միլիարդ հայթայթել ու նշել Անկախության օրը, դժվար չէր լինի 40 միլիոն էլ հայթայթել ու «Քաղաքացու օրը» նշել:

Ընդդիմադիր պատգամավորը նաև նկատեց, որ բոլոր ուսումնասիրություններով՝ Անկախության օրը ծախսվել է 400-ից 450 միլիոն դրամ:

«Գումարները ինչ են եղել՝ չգիտեմ, ովքեր են այդ ծախսերը իրականացրել, կարծում եմ՝ հանրայնացնելու ձևերը կան, ու ինչ առնչություն ունի աշխատակազմի ղեկավարը այդ միջոցառման կազմակերպիչների հետ, ևս հայտնի է»,- ասաց Վարդանյանը:

Արայիկ Հարությունյանն էլ հայտնեց, որ Աղվան Վարդանյանը իրավական առումով կարող է խնդիրներ ունենալ, եթե չհրապարակի աղբյուրները ու իր առնչությունը ֆինանսավորողների հետ:

ԱԺ «Պատիվ ունեմ» խմբակցութան պատգամավոր Աննա Մկրտչյանն էլ նկատեց, որ զավեշտալի է այն մարդկանցից լսել օլիգարխների մասին հիշատակումները, որոնց պատգամավորական ֆրակցիայում առնվազն մի քանի քրեաօլիգարխի ներկայությունն արդեն իսկ հաստատված փաստ է: