Ձեր վստահելի աղբյուրը

«Սյունիքի մարզի Ներքին Հանդ գյուղի դպրոցը մի քանի 100 մետր է հեռու ադրբեջանական զինված ուժերի դիրքերից: Ինձ կարո՞ղ է միջազգային որևէ կազմակերպություն համոզել, որ սա երեխաների իրավունքների խախտում չէ»,- ասուլիսում ասաց ՀՀ Մարդու իրավունքների պաշտպան Արման Թաթոյանը:

Նա նշեց, որ իրենց պատրաստած հերթական հատուկ զեկույցը նաև հիմնավոր է երեխաների իրավունքների պաշտպանության տեսանկյունից:

Ա. Թաթոյանը քարտեզի վրա ցույց տվեց Շուռնուխում քաղաքացիներից մեկի տունը, անասնագոմը՝ նշելով, որ անասնագոմը Ադրբեջան է. «Ծաղրից էլ ավելի է մարդու նկատմամբ: Մարդու արժանապատվության ամենակոպիտ խախտում է»:

Նա ասաց, որ ՀՀ քաղաքացուն պաշտպանելու համար իրավացիորեն այստեղ տեղակայված են սահմանապահ զորքեր: ՄԻՊ-ը ցուցադրեց նաև փողոցի մյուս հատվածը՝ նշելով, որ այդտեղ երեխաներ են խաղում զինվորականների անմիջական հարևանությամբ: 

«Այս հատվածում երեք երկրի զորք կա: Այսինքն՝ երեք երկրի զորք կա մի հատվածում, որտեղ ամեն օր երեխաներ են խաղում: Երեխաների իրավունքների տեսանկյունից պատկերացնո՞ւմ եք: Դատապարտելի պահվածք է, որ այս ամենի վրա աչք են փակում: Այդ պատճառով որոշել ենք ամեն ինչ փաստերով հրապարակել: Երեք երկրների զորքերի պայմաններում երեխան կարո՞ղ է նորմալ միջավայրում մեծանալ: Բռնությունից էլ զերծ հասարակություն ենք ասում, միջազգային կազմակերպություններն էլ քարոզ են իրականացնում»,- ասաց Թաթոյանը:

Նա նաև նշեց, որ բացի Գեղարքունիքի և Սև լճի հատվածից, ադրբեջանական երրորդ ներխուժման դեպքն են իրենք վերհանել, որը տեղի է ունեցել 2020 թ. հոկտեմբերին:

«Կապանում Ծավ գյուղի հատվածում ունենք ավելի քան 1,2 կմ ներխուժում: Այս հարցը նույնպես պետք է ընդգրկվի բոլոր բանակցություններում, քանի որ վտանգելու է մարդկանց իրավունքները՝ անմիջապես Ծավ գյուղի վրա կանգնած լինելով»,- ասաց Ա. Թաթոյանը:

Անդրադառնալով Սյունիքի մարզի ճանապարհներին տեղադրված ադրբեջանական ցուցանակներին, նա ընդգծեց՝ դրանք ռազմավարական նպատակ ունեն։

«Դրանք օգտագործվում են մարդկանց ահաբեկելու, իրենց զինված ուժերը կամ սահմանապահ զորքերը տեղակայելու համար:

Զեկույցում հատուկ նշվում է, որ մեզ համար նշանակություն չունի՝  սահմանապահ զորք է, ոստիկանություն, թե զինված  ուժ: Զենքով մարդ է: Մի կարևոր ինդիկատոր հարց կա՝ ով է այդ մարդկանց գերագույն գլխավոր հրամանատարը: 

Ադրբեջանցիների գերագույն գլխավոր հրամանատարն այն նախագահն է, որն ամեն օր սպառնում է Հայաստանի Հանրապետության բնակիչներին, հետևաբար՝ պետք է այս կարևոր հանգամանքները հաշվի առնենք:

Ու երբ մենք նկարում էինք հերթական ցուցանակը, ընդամենը մեկ րոպե ենք կանգնել և մեկ րոպեն էլ չանցած, գլուխներս բարձրացրեցինք ու տեսանք, որ փոքր բլուրի վրա զենքը մեր վրա պահած կանգնած են։ Մարդիկ, բնականաբար, խուսափում են այդ հատվածներով երթևեկելուց։ Սա ազատ տեղաշարժի կոպիտ խախտում է։ Մարդիկ հիվանդանոց են գնում և գերադասում առավոտյան վերադառնան, բայց գիշերն այս ճանապարհով չերթևեկեն»,- ասաց ՄԻՊ-ը:

Նա նաև ընդգծեց, որ Կապանի  օդանավակայանի անմիջապես թռիչքուղիների հարևանությամբ ադրբեջանական տեղակայումներն են։

«Ադրբեջանական զինված ուժերը, այստեղ տեղակայվելով, վերահսկողություն են կարողանում հաստատել ճանապարհի ու Կապան քաղաքի նկատմամբ՝ վտանգելով նաև քաղաքացիական բնակչության կյանքն ու առողջությունը։

Այնտեղ նրանց տեղակայումը, անգամ եթե մեկ կրակոց չի արձակվում, կյանքի իրավունքի խախտում է։ Եվրոպական դատարանի պահանջների համաձայն՝ պարտադիր չէ, որպեսզի զոհ լինի, որ դա համարվի կյանքի իրավունքի խախտում։ Անգամ անմիջական վտանգն այս բոլոր գործոնների պայմաններում, խախտում է: Վտանգ է, որ օդանավակայանը շահագործվի, որովհետև կարող են կրակել կամ հարձակում իրականացնել ինքնաթիռների վրա»,- ասաց ՄԻՊ Արման Թաթոյանը։