Ձեր վստահելի աղբյուրը

«Մենք ասում ենք՝ կառուցում ենք այլընտրանքային ճանապարհ, շատ լավ, բայց ինչո՞ւ ենք միանգամից հրաժարվել արդեն եղած ճանապարհից  ու մի հատ էլ ասում ենք՝ դե լավ, եթե Ադրբեջանն ասում է մերն է, մենք էլ ասենք՝ լավ, այլընտրանքային  ճանապարհներ կառուցենք»,- ասուլիսում ասաց ՀՀ Մարդու իրավունքների պաշտպան Արման Թաթոյանը:

Նա նշեց, որ նման մոտեցմամբ կարելի է ասել՝ եկեք այլընտրանքային գյուղեր, քաղաքներ կառուցենք, կարող է վաղը Ադրբեջանը քարտեզ է բերում ու ասում է՝ այս քարտեզով այս գյուղն էլ է իմը:

«Մեր աշխատակազմը մանրակրկիտ ուսումնասիրել է բոլոր արխիվային փաստաթղթերը, ամեն դեպքում, ինչքան կարողացել ենք: Ադրբեջանական իշխանությունները  1920-ականներից սկսած միշտ օգտագործել են էթնիկ  գործոնը տարածքներ բռնազավթելու համար: Ինչ են ասել՝ այստեղ ադրբեջանցիներ են ապրում, սա ադրբեջանական տարածք է: Ադրբեջանի իշխանությունները սովորեցրել են գյուղացիներին հարձակումներ գործել մեր քաղաքացիների վրա, բողոքներ են գրել մեր բնակչների դեմ, որ այդ տարածքները հետագայում  բռնազավթեն»,- ասաց Ա. Թաթոյանը:

Նա ընդգծեց՝ որպես Մարդու իրավունքների պաշտպան, անընդունելի է համարում այդ մոտեցումը. «Այո ճանապարհ կառուցենք անվտանգության համար, բայց ոչ թե ընդամենը նրա համար, որ Ադրբեջանը պահանջ է ներկայացրել»: 

ՀՀ Մարդու իրավունքների պաշտպանն ընդգծեց՝ դելիմիտացիայի, դեմարկացիայի պայմաններում չի կարելի ասել՝ սա միանշանակ իրենցն է, դելիմիտացիայի, դեմարկացիայի բացակայության պայմաններում  հիմք չեն ընդունվել ոչ մի միջազգային փաստաթուղթ: 

«Խորհրդային Միության ժամանակներից մարդկանց պատկանող հողերի վրա այսօր ֆիզիկապես ներկա են ադրբեջանական զինված ուժեր։ Ավելին՝ միջազգային գոյություն ունեցող պահանջներով սահմանների դելիմիտացիան և  դեմարկացիան չի կարող լեգիտիմ համարվել, եթե չի ապահովում մարդու իրավունքները, չի համապատասխանում ժողովրդավարության և իրավունքի գերակայության կանոններին և չի ապահովում մարդկանց բնականոն կյանքը»,- ասաց Ա. Թաթոյանը:

Նա նշեց, որ Հայաստանի պետական սահմանի մասին օրենքը նախատեսում է, որ կա սահմանային գոտի, սակայն այս դրույթը չի կարող կիրառելի լինել, քանի որ արցախյան երրորդ պատերազմից հետո մեր գրեթե բոլոր բնակավայրերը հայտնվել են սահմանային գոտում։

«Մենք բնակավայրեր ունենք, որտեղ ընդամենը մի քանի մետրից սկսած արդեն մարդկանց տներ են։ Ի՞նչ է նշանակում է, որ մենք պետք է նոր իրավունքների խախտումնե՞ր ունենանք, նոր տեղահանվածնե՞ր: Իհարկե, ոչ: Սա ընդհանրապես կհակասեր բոլոր միջազգային սկզբունքներին: Դրա համար մենք հիմնավորել ենք նրանց հեռացում»,- ասաց Ա. Թաթոյանը: