Ձեր վստահելի աղբյուրը

ՀՀ Մարդու իրավունքների պաշտպանի աշխատակազմի բյուջեն 2022-ին, 2021-ի համեմատ, ավելացնել 1,92 տոկոսով:  ԱԺ-ում ՀՀ 2022թ. պետական բյուջեի մասին ՀՀ օրենքի նախագծի քննարկմանն ասաց ֆինանսների նախարար Տիգրան Խաչատրյանը:

«Աշխատակազմի կողմից նախատեսվում է 2022-ին իրականացնել 1 ծրագիր, որում ընդգրկված են 3 միջոցառումներ: Հանրագումարով՝ 2022-ի բյուջեի նախագծով նախատեսված ֆինանսավորումը կազմում է 542 միլիոն 700 հազար դրամ՝ 2021 թվականի պետբյուջեով նախատեսված 532 միլիոն 500 հազար դրամի դիմաց: Աճը կազմում է 1.92 տոկոս»,- նշեց Տ. Խաչատրյանը:

Քննարկման ժամանակ ԱԺ «Հայաստան» խմբակցության պատգամավոր  Գեղամ Մանուկյանը նախ հիշեցրեց, որ որ այս տարվա մարտի-ապրիլին ֆինանսների նախարարությունը  պատրաստել էր մի աղմկահարույց  օրենսդրական նախաձեռնություն, որով ՄԻՊ օրենքի հոդվածներից մեկը փոխելու էր և ՄԻՊ գրասենյակի ֆինանսավորումը կրճատվելու է:

«Այն մեծ աղմուկ  բարձրացրեց, այդ թվում միջազգային և առկախվեց: Այդ նախագիծը դեռ մնո՞ւմ է  օրակարգում, թե դրվեց դարակում», - հարցրեց Գ. Մանուկյանը:

Տ.Խաչատրյանն ասաց, որ քանի դեռ նախագիծը կառավարության կողմից ԱԺ- սահմանաված կարգով քննարկման ներկայացված չէ,  նշանակում է չունի այն կարգավիճակը, որ այստեղ քննարկեն:

«Երբ որ այդպիսի առիթ հանդիսանա, կխոսենք այդ մասին»,- ասաց նա:

«Պատիվ ունեմ խմբակցության պատգամավոր Թագուհի  Թովմասյանը հետաքրքրվեց, թե ինչո՞վ է  ֆինանսվորման պայմանավորված գրեթե երկու տոկոսանոց աճը, քանի որ գիտեն՝ ՄԻՊ գրասենյակը վերջին տարիներին ծանրաբեռնված է աշխատում,  ենթադրաբար հաստիքների համալրման կարիք կար, ուզում է հասկանալ, թե ինչո՞ւ է ընտրվել այդ չափով բարձրացումը:

Տ. Խաչատրյանն ասաց, որ ինչպես  Մարդու իրավունքների պաշտպանի աշխատակազմի, այնպես էլ մյուս բոլոր գերատեսչությունների դեպքում բյուջեի նախագծում ներառված վերջնական ֆինանսական ցուցանիշներն արտացոլում են այն իրավական ակտերի ֆինանսական պատկերը, որոնք կայացված են:

«Այսինքն՝ եթե մենք խոսում ենք հաստիքակազմի վերաբերյալ, ֆինանսների նախարարությունը պետբյուջեի նախագիծը քննարկելու, ամփոփելու փուլում իրավասու չէ քննարկել, թե որ պետական կառավարման մարմինը որքան հաստիքներ պետք է ունենա կամ այդ հաստիքներն ինչպիսի պաշտոնային աստիճաններ պետք է ներկայացնեն, այլ մենք միայն ստուգում և պետբյուջեի նախագծում արտացոլում ենք այդ կայացված որոշումներին համապատասխան իրավական ակտերով ամրագրված ֆինանսական ցուցանիշները», - ասաց  նախարարը:

Թ. Թովմասյանը մի քանի թվային տվյալներ բերեց՝  2018-ին ՄԻՊ գրասենյակին դիմել է 10 հազար 740 քաղաքացի, 2019-ին՝ 13 հազար 140 քաղաքացի, 2020-ին՝ 14 հազար 780 քաղաքացի:

«Այսինքն, այս տարիներին շեշտակի բարձրացել է ՄԻՊ-ին դիմող քաղաքացիների թիվը, հետևաբար, պետք է սպասարկել այդքան դիմումները: Դրանից ավելի ի՞նչ հիմք է պետք, որպեսզի կառավարությունը համարժեք պատասխան տար այս իրավիճակին կոնկրետ բյուջեի, աշխատակիցների ներգրավման տեսքով», - ասաց ընդդիմադիր պատգամավորը:

Տիգրան Խաչատրյանն արձագանքեց, որ եթե անգամ դիմումների քանակը մնար նույնը, սակայն հիմնավորվեր, որ եղած աշխատակազմը իր հաստիքային կազմով դիմումների բնույթի փոփոխության պատճառով ավելի մեծ ծավալի աշխատանք է կատարում, այդ հարցը կարող էր քննարկվել:

«Եվ, հավանաբար, քննարկվել է: Ես վստահ եմ, որ, եթե կան համապատասխան հիմնավորումներ, ապա այդ դեպքում կայացվում են որոշումներ: Նաև հետագա ամիսներն են դրա համար, որ եթե օբյեկտիվորեն աշխատանքի ծավալն ավելանա այնպես, որ պետք լինի վերանայել աշխատակազմին վերաբերող հարցերը, ապա կառավարությունը սահմանված կարգով այդ որոշումները կկայացնի», - ասաց նախարարը: