Ձեր վստահելի աղբյուրը

«2022-ին նվազագույն ամսական աշխատավարձի բարձրացում չեք նախատեսում, բայց  դրա օբյեկտիվ անհրաժեշտությունն ակնհայտ է առնվազն գնաճով պայմանավորված»,- Ազգային ժողովում 2022 թ. բյուջեի քննարկմանն ասաց  «Հայաստան» խմբակցության պատգամավոր Թադևոս Ավետիսյանը։

Նա նշեց, որ նվազագույն աշխատավարձը 68 հազար դրամ է, մինչդեռ հունիսի դրությամբ մեկ անձի  հաշվով սպառողական նվազագույն զամբյուղի արժեք 70  հազար դրամ  է. «Գնաճը շարունակվում է, իմ գնահատմամբ, արդեն 75 հազար դրամ է այդ զամբյուղը, իսկ հաջորդ տարի ձեր իսկ դրած գնաճի  ցուցանիշով՝ 5,2-5,6 տոկոս, կմոտենա մինչև 80 հազար դրամի»։

Դիմելով աշխատանքի և սոցիալական հարցերի նախարար Նարեկ Մկրտչյանին՝ ընդդիմադիր պատգամավորն ասաց, որ օբյեկտիվորեն նշում է որոշ ծրագերի գծով աճ է նախատեսված և կարևոր, բայց անհասկանալի է, թե ինչու մոտ 13,5 միլիարդ դրամի չափով կրճատել են այնպիսի կարևորագույն ծրագրեր, որոնք ունեն ուղիղ սոցիալական ազդեցություն։ Նա մ քանի օրինակներ բերեց. անապահովության նպաստի ծրագիրն աղքատության աճի ֆոնին նվազեցվում է 6,3 միլիարդով այն դեպքում, երբ ընտանիքին տրվող անապահովության նպաստի չափը ամսվա ընթացքում 31 հազար 350 դրամ է։

«Ինչքան էլ ասեք՝ մակրոտնտեսական կայունություն, փող չկա, խնայենք, երկիրը զարգանա, բայց դուք ավելացնում եք կառավարման ապարատի պահպանաման ծախսերը  28 տոկոսով՝ 1,55 միլիարդ դրամով, սա ո՞նց կհասկանա կենսաթոշակառուն»,- հարցրեց պատգամավորը։

Ն. Մկրտչյանն ասաց, որ պետք չէ մոռանալ, որ երկիրն անցնում է առնվազն երկու ծանրագույն ճգնաժամերի միջոցով՝ պայմանավորված կորոնավիրուսով ու պատերազմով։ 

Նա հայտնեց, որ նվազագույն կենսաթոշակը  2021 թ. կազմում է 26 հազար 500 դրամ, 2022 թ. բարձրացնելու է 2100 դրամով՝  հասնելով 28 հազար 600 դրամ։ Արդյունքում  կբարձրանա շուրջ 15 հազար 600 աշխատանքային կենսաթոշակ ստացող քաղաքացիների կենսաթոշակը։

Թ. Ավետիսյանն ասաց, որ 585  հազար նպաստառուներից և կենասաթոշակառուներից բյուջեն աճել է ընդամենը մոտ 100 հազարինը՝ 17 տոկոսինը, այն էլ միջնում 2-3000 դրամ։

Քննարկմանը ներկա ՀՀ աշխատանքի և սոցիալական հարցերի փոխնախարար Ռուբեն Սարգսյանն ասաց, որ մինչև 2026 թվականը նախատեսվում է նվազագույն աշխատավարձը բարձրացնել մինչև 85 հազար դրամ։

«Նախատեսում ենք 2023-ից առաջին քայլերն անել, հիմա քննարկումների մեջ ենք Հակաստանի ֆինանսների նախարարության գործընկերների հետ»,- ասաց նա։