Ձեր վստահելի աղբյուրը

«Ցանկացած իրական ընդդիմադիր ուժի պայքարի, եթե ոչ որպես համակազմակերպիչ, ապա առնվազն որպես մասնակից անպայման կմասնակցենք»,- Ազատության հրապարակում «Հայաստան» դաշինքի կազմակերպած հանարահավաքից առաջ լրագրողների հետ զրույցում ասաց «Պատիվ ունեմ» խմբակցության պատգամավոր Հայկ Մամիջանյանը։

Նա նշեց, որ Ազգային ժողովում «Հայաստան» դաշինքի հետ համատեղ են աշխատում, և նույնը վերաբերում է նաև շատ այլ նախաձեռնությունների։

«Ամենուր, ամեն բան, ինչն անհրաժեշտ է մեր երկիրը կապիտուլյանտներից ազատելու համար՝ հրատապ նիստից մինչև շենքեր գրավել, մենք պատրաստ ենք իրականցնել խաղաղ կերպով, որպեսզի վրաս ևս մեկ քրեական գործ չավելանա։ Իսկ թե ինչպես մենք դա կարող ենք անել, կարծում եմ՝ մեր համաքաղաքացիները և մեզ ուշադիր նայող կապիտուլյանտները հոյակապ գիտեն»,- ասաց Հ. Մամիջանյանը։

Ըստ նրա, բոլոր այն քաղաքացիները, որոնք համարում են, որ իրենք կամ մեկ այլ մարդ ինչ-որ բան սխալ է անում, ամբողջությամբ ազատ են իրենք որևէ բան նախաձեռնելու, և խոստանում է՝ ամբողջ ռեսուրսով նրանց կաջակցեն։

«2020 թվականի նոյեմբերի 9-ից հետո տարբեր ֆորմատներով իրականացրել են հնարավոր ամեն ինչ, ինչ հնարավոր էր։ Ցավոք սրտի, դա բավարար  չեղավ Հայաստանի արժանապատվությունը վերադաձնելու համար, բայց դա չի նշանակում պետք է հիասթափվել և ձեռները ծալած նայել, թե ինչպես է կործանվում մեր պետությունը»,- ասաց «Պատիվ ունեմ» խմբակցության պատգամավորը։

Լրագրողի դիտարկմանը՝ խոսակցություններ կան նոր փաստաթղթի ստորագրման մասին,  հանրահավաքների միջոցով հնարավո՞ր է կանխել, Հայկ Մամիջանյանն ասաց.  «Հայրենիքի պաշտպանության համար պետք է անել ամեն ինչ՝ որը ստացվի, ստացվի։ Ես չունեմ բաղադրատոմս՝ արդյոք այս հանրահավաքը, խորհրդարանում հարց ու պատասխանը, թե ինչ-որ այլ գործողությունն է ճիշտը դա կանխելու համար։ Մենք կանենք ամեն ինչ՝ ինչը մեր ուժերի սահմաններում է, դրանից էլ մի քիչ շատ։ Հուսանք՝ դա կբավարարի, բայց դրա համար մեզ խիստ անհրաժեշտ է, որ մեր կողքին կանգնած լինեն մեր քաղաքացիները և նրանց թիվը գնալով շատանա»։