Ձեր վստահելի աղբյուրը

Ազատության հրապարակում «Հայաստան» դաշինքի հանրահավաքում դաշինքի առաջնորդ, Արցախի Հանրապետության առաջին նախագահ, ՀՀ երկրորդ նախագահ Ռոբերտ Քոչարյանը հիշեցրեց, թե ինչեր է խոստացել այս իշխանությունը՝ իշխանության գալուց. «Այն, ինչ կատարվեց երկրի, Ղարաբաղի հետ, կատարվեց մի իշխանության, մի քաղաքական խմբակի կողմից, որը իշխանության գալուց խոստացել էր՝ թռիչքաձև տնտեսական աճ, անզիջում պայքար մենաշնորհների և օլիգարխիայի դեմ, բարգավաճում, ներդրումներ, ներգաղթ»։

Այնուհետև նա նշեց,  թե ինչ է ստացել ժողովուրդն այդ խոստումների դիմաց՝  գների թռիչքաձև աճ, նոր մենաշնորհների ձևավորում, նոր օլիգարխիաների կայացում, աղքատության թռիչքաձև աճ, արտագաղթի թռիչքաձև աճ։

«Խոստացել են կոռուպցիայի և թալանի դեմ պայքար։ Այսօր թալանի առաջատարներն են։ Այսօր մտել են ձեր բոլորի գրպանը, փող են աշխատում, փող են դիզում գնաճի, կորոնավիրուսի, հիվանդների, մահերի վրա, ամեն ինչի վրա, քերթում են, ինչ հնարավոր է քերթել, Ղարաբաղում ասում են՝ ձվից մազ են խուզում։ Այդ աստիճանի են խրվել ժողովրդի թալանի գործում։

Արդյո՞ք մենք պատրաստ ենք այս ամենը հանդուրժել։ Արդյո՞ք մենք պատրաստ ենք ընդունել, որ Հայաստանում թռիչքաձև աճ է ունենում զոհերի, մահերի, գերեզմանների թիվը, աղքատությունը։ Չենք կարող հանդուրժել»,- ասաց ՀՀ երկրորդ նախագահը՝ նշելով, որ սա է իրավիճակը և այս իրավիճակի դեմ իրենք դուրս են եկել ուղիղ պայքարի մեջ։

Ռ. Քոչարյանի խոսքով, ընդդիմության առաջ կանգնած խնդիրներն են՝ համոզել ժողովրդին, ցույց տալ որ իրենց խաբել են, որ այս իշխանությունը դավաճանել է սեփական կարգախոսները։

«Մենք բոլորս պետք է միավորվենք, պետք է այս դիմադրության շարժմանն ուժ հաղորդենք ամեն մեկն իր հնարավորությունների չափով։ Սա շատ երկար չի տևելու։ Շաբաթների, ամիսների հարց է լինելու։ Ամեն ինչ կախված է ձեզանից, այս հրապարակում կանգնած Հայաստանի յուրաքանչյուր քաղաքացուց»,- ասաց ՀՀ երկրորդ նախագահը։

Ռոբերտ Քոչարյանն ընդգծեց. «Պայքարելու ենք։ Վստահ եղեք՝ մենք սրանց վռնդելու ենք կամ բարիկադներվ, կամ ընտրություններով, յուրաքանչյուր ճանապարհով։ Եվ այդ բարիկադներում ես ձեր կողքին, ձեր առաջ կանգնած եմ լինելու։

Լավ եղեք։ Ամեն ինչ լավ է լինելու»։