Ձեր վստահելի աղբյուրը

«Պատերազմից մեկ տարի անց պետության ղեկավարությունը չի գնահատել այն իրողությունները, որոնք այսօր կատարվում են Հայաստանում, ինչն է բերել պատերազմ, ինչու պատերազմում պարտվեցինք, ինչ ենք անում հետագայում անվտանգությունն ավելի ամուր հիմքերի վրա դնելու համար»,- «Ազատության» հրապարակում ընթացող «Հայաստան» դաշինքի հանրահավաքին ասաց ԱԺ «Հայաստան» խմբակցության ղեկավար, պաշտպանության նախկին նախարար Սեյրան Օհանյանը։

Դրա փոխարեն, նրա խոսքով, նրանք փորձում են այդ պարտության բեռը գցել ուրիշների վրա՝ գցել նախկինների, բանակի վրա։

«Բանակը մեր և ձեր միջոցներով է կառուցվել, հայ ժողովրդի ծոցից է դուրս եկել և երբևէ անձեռնմխելի չի եղել։ Բանակը գտնվել է մշտապես վերահսկողության ներքո՝ քաղաքացիական, հասարակական։ Ձեզանից յուրաքանչյուրի ընտանիքից ձեր սեփական դեսպանն եք ունեցել բանակում ձեր որդիների կերպարով, տեսել եք, թե  ինչ է կատարվում բանակում՝ կառուցվել է, զարգացել է, կարողացել է Արցախ ազատագրել, Հայաստանի սահմաններն անառիկ պահել, Հայաստան-Արցախ անվտանգային մի հզոր միջավայր ձևավորել, որը գործոն է եղել մեր տարածաշրջանում»,- ասաց Ս. Օհանյանը։

Նա նշեց, որ հիմա, իհարկե, այլ գործոն է Հայաստանն առանց Արցախի, կամ Արցախն անկլավային վիճակում. «Հակառակն է  տեղի ունեցել՝ այս իշխանություններն են բանակը քանդել, ամեն օր հարված հասցնել բանակին՝ կադրային փոփոխություններով, պաշտպանության նախարարի, Գլխավոր շտաբի, պաշտպանության բանակի հրամանատարների արագ փոփոխություններով և քաղաքական կախվածության մեջ գցելով նրանց, կառուցվածքային փոփոխություններով  ուռճացնելով կենտրոնական ապարատը և կրճատելով մարտական մոբիլիզացիոն ստորաբաժանումները, փոփոխություններ անելով և ոչ արդյունավետ սպառազինության գնումներ կազմակերպելով։ Իրենց քաղաքականությանը համահունչ բանակը փիառի մակարդակի հասցնելով՝ նրա զարգացման գործընթացն իջեցրեցին սովորական տնտեսական մակարդակի։ Այդ է պատճառներից մեկը, որ այս պատերազմում պարտություն կրեցինք։ Պարտություն կրեց ոչ թե բանակը, այլ պետությունը, պետության կառավարման ցածր մակարդակը»։

Նա նշեց, որ այս օրերին հնչում են այսպիսի խոսքեր՝ բանակը խոսք էր տվել ոչ մի քայլ սկզբունքով պայքարել։

«260 կիլոմետրից ավելի տարածքում ոչ մի քայլ հետ սկզբունքով հրամանատարներն ու զինվորները կռվել են, իսկ ո՞ւր էր այս պետության ղեկավարությունը, երբ մխրճում տեղի ունեցավ հարավային հատվածում։

Այս իշխանությունները բանակի նկատմամբ անփույթ վերաբերմունքով, անգրագետ կառավարմամբ, դավադիր գործողություններով չկարողացան ապահովել ոչ բանակի զարգացում, ոչ պատերազմի ժամանակ հաջողությունները»,- ասաց Ս. Օհանյանը։

Ս. Օհանյանը նշեց, որ սահմանը չեն կահավորել, որևէ զորավարժություն չեն անցկացնում։

«Այսպես կոչված նախկինների ժամանակ ամենահզոր զորավարժություններ են կատարվել, անկախության 25-ամյակի առիթով կազմակերպով հզոր զորահանդեսը։

Տեսնում ենք զորավարժություններ հակառակորդի մոտ։ Մի՞թե մեր բանակն ի վիճակի չէ պատրաստության և նաև մարտունակության աստիճանը բարձրացնելու ու ցույց տալու համար խոշոր զորավարաժություններ կատարել։

Ի վիճակի է։ Բանակն ի վիճակի է դիմադրել, պարզապես առաջադրանքներ չկան և այս իրավիճակից դուրս գալու ամենամեծ հնարավորությունը բանակն ունի, քանի որ գտնվում է  ուղղահայաց ենթարկվածության, հրամանատարության, համապատասխան կարգապահության ներքո»,- ասաց Ս. Օհանյանը։

Նա ընդգծեց՝ մենք այսօր չափազանց դժվար իրավիճում ենք, բայց ելք կա։ Սեյրան Օհանյանը կոչ արեց համախմբվել և եթե դիմադրողականության ալիքը թափանիվի ընթացք ստանա, իրենց առջև դրված խնդիրները կկատարեն՝ թույլ չեն տա Հայաստանի  թուրքացմանը, Արցախն ընդմիշտ և հավերժ կլինի հայկական։