Ձեր վստահելի աղբյուրը

«Այո, մեզ այսօր պետք է խաղաղություն, բայց այսօր մեզ պետք է արժանապատիվ խաղաղություն, ոչ թե այն կեղծ օրակարգերը, որոնք բերում են այսօր և ուզում են մեզ, կներեք բառի համար, կերցնեն։ Շարունակական զիջումներով մենք արժանապատիվ խաղաղության չենք հասնի»,-  «Ազատության» հրապարակում «Հայաստան» դաշինքի հանրահավաքին ասաց ԱԺ «Հայաստան» խմբակցության պատգամավոր Վահե Հակոբյանը։

Նա նշեց, որ այսօր ներկա իշխանությունը մեզ  տանում է  կեղծ օրակարգով՝ իմիտացիա անելով, իբր խաղաղության են տանում. «Տեսնում ենք, թե այսօր հերթական անգամ ի՞նչ կատարվեց Շուշիում։ Այսօր զոհվեց մեր հայրենակիցը, ով զինվորական չէր, ձեռքում զենք չկար։
Այս ամենաթողությունը բերելու է մեր ազգի կործանմանը, ինչն ուզում են ստանալ այս իշխանությունները։ Մենք պետք է դիմադրենք պարտվողական հոգեբանությանը, պարտվողական տրամադրվածությանը, այս կառավարության վարած քաղաքականությանը»։

Նա հիշեցրեց մեկ  տարի առաջ այս օրը իշխանությունն ինչպես էր համոզում ժողովին, որ հաղթում ենք պատերազմում, մինչդեռ Շուշին ընկել էր, իսկ արդեն հաջորդ օրը կնքվեց խայտառակ փաստաթուղթը։

Վ. Հակոբյանը մի քանի հարցադրում արեց՝ ինչո՞ւ և ինչպե՞ս հանձնվեց Շուշին, ինչո՞ւ և ինչպե՞ս հայկական կողմը մերժեց Ռուսաստանի միջնորդությամբ պատերազմը շատ ավելի վաղ ժամանակահատվածում դադարեցնելը, ինչո՞ւ և ո՞նց պատահեց, որ պատերազմից հետո մեր տղաներն ընկան գերության մեջ։

«Այս և շատ ավելի հարցերի պատասխանները մենք անկասկած ստանալու ենք։ Մենք ստանալու ենք օբյեկտիվ քննությամբ և ոչ այս իշխանության օրոք։ Համոզված եղեք, մեղավորները  պատժվելու են։
Բայց այսօր մեր խնդիրը վերլուծելը չէ, այլ ամենակարևոր խնդիրն է դադարեցնել շարունակական պարտությունը, կանգնեցնել  շարունակական զիջումները»,- ասաց ընդդիմադիր պատգամավորը։

Նրա խոսքով, այս իշխանությունը ներուժ, հնարավորություն, ցանկություն, ռեսուրս չունի դեմարկացիա և դելիմիտացիա իրականացնելու համար։

«Պարզ տրամաբանությունն ասում է՝ ամենասկզբում պետք է առաջ քաշել նախապայմաններ մինչ այդ պրոցեսը սկսելը՝ մեր տղաների անվերապահ վերադարձը հայրենիք, Հայաստանի Հանրապետության սուվերեն տարածքից Ադրբեջանի զինուժը վռնդում, մեր ճանապարհներն ազատել ցանկացած խոչընդոտից։ Իհարկե, այս գործընթացը որևէ առնչություն չպետք է ունենան արցախյան հարցի կարգավորման հետ։

Ի վերջո, մենք չենք պարտվել թուրք-ադրբեջանական տանդեմին, բանակը, ազգի չի պարտվել, պարտվել են սրանք»,- ասաց Վահե Հակոբյանը։

Նա նշեց, որ այս ամենն իր անդրադարձն է ունեցել երկրի սոցիալ-նտեսական վիճակի վրա։ Ըստ Վ. Հակոբյանի, տարբեր ամբիոններից խոսում են աշխատավարձերի բարձրացման, այս կամ այն քայլն անելու մասին, սակայն այժմյան գնաճի դեմը չեն կարողանում առնել։

«Հիմա բերել են բյուջե, նվազեցրել են բյուջեի պարտքը 100 միլիարդ դրամով։ Գրված է ներքին եկամուտների հաշվին։ Նշանակում է ՝ 2022  թվականին սկսվելու է հարկային տեռոր, որպեսզի այդ 100 միլիարդը բերեն ու դնեն տեղը, քանի որ բյուջեն նկարչություն է։ Սա խորանալու է  ձմռան նախաշեմին։ Գազի գնի շուրջ նորից են բանակցում։ Բանակցում եք, որ նորից թանկանա՞։ Ջուրն էլ թանկանում է հունվարի 1-ից»,- ասաց նա՝ նրանց բոլոր հայտարարությունները որակելով սուտ, կեղծիք և պապուլիստական, իսկ ՕԳԳ-ն՝ 0։

Ինչ վերաբերում է ներդրումներին, Վահե Հակոբյանն ասաց, որ իրեն հարգող որևէ գործարար կամ կազմակերպություն այստեղ մի կոպեկի ներդրում չի անի, քանի որ օտարերկյրա կապիտալով աշխատող հիմնարկներին դնում են ճնշման տակ, այդպես քայքայելով երկրի, բիզնեսի հեղինակությունը։

«Նիկոլի և իր խմբակի այս անլուրջ և անհեռատես մոտեցումները և քայլերը մեզ տանում են կործանման։ Մենք պետք է դառնանք մեկ բռունցք և այստեղ՝ փողոցում, և խորհրդարանում։ Այս բոլոր հարցերի պատասխանը միակն է՝ Նիկոլի և իր խմբակի հեռացումը։

Մենք դիմադրելու ենք պարտվողական հոգեբանությանը, բռնապետությանը։ Ոչ բռնապետությանը։ Մենք դիմադրելու ենք, որպեսզի ունենանք և կառուցենք ուժեղ, բարեկեցիկ Հայաստան, քանի որ այդ Հայաստանին է արժանի մեր երիտասարդությունը, մեր երեխաները պետք է ապրեն այդպիսի Հայաստանում»,- ասաց Վահե Հակոբյանը։