Ձեր վստահելի աղբյուրը

«Մենք ասում ենք՝ քաղաքացի, սպառողական վարկդ ստացի քո հաշվին, գնա ինչ-որ մի տեղ կանխիկացրու, որպեսզի կանխիկով գնում անես և դրանով կանխիկացման համար բանկին գումար տուր»,- ԱԺ Ֆինանսավարկային և բյուջետային հարցերի մշտական հանձնաժողովի նիստում անդրադառնալով կանխիկով գործարքների սահմանափակման ԿԲ-ի օրենսդրական նախաձեռնությանը՝ հայտնեց «Հայաստան» խմբակցության պատգամավոր Արթուր Խաչատրյանը:

Պատգամավորը նկատեց, որ փոփոխությամբ ստվերի կրճատման խնդիր չի լուծվում, այլ բանկերին հարստացնելու խնդիր են լուծում:

«Վաղը քույրս, եղբայրս գալիս են ինձ մոտ և ես ուզում եմ իրենց մի շաբաթով 350000 դրամ տալ մինչև աշխատավարձը ստանան ու վերադարձնեն, պետությունը ինչպե՞ս է գրանցելու, թե մենք ինչպես ենք այդ գումարը փոխանցել միմյանց»,- «Անկանխիկ գործառնությունների մասին» օրենքի նախագիծը ներկայացնող ԿԲ նախագահի տեղակալ Վախթանգ Աբրահամյանին հարցրեց պատգամավորը և հավելեց. «Երկու հարազատ քույր ու եղբայր, մայր և զավակ իրար դրամ են տալիս, ի՞նչ իմաստ կա այն գրանցել և ինչպե՞ս է վերահսկվելու»:

ԿԲ նախագահի տեղակալը պատասխանեց, որ իրավաբանական անձից մեկ այլ իրավաբանական անձ փոքր գումարների փոխանցման համար միայն բանկային փոխանցումների համակարգը չի կարելի օգտագործել, այլ քսակով, QR կոդով, և ՀԴՄ տպող սարքերի միջոցով էլ կարելի է անկանխիկ գործարքներ անել:

Վախթանգ Աբրահամյանը պնդեց՝ օրենսդրական նախաձեռնության նպատակն այն է, որ սպառողական վարկերը օգտագործվեն անկանխիկ եղանակով, իսկ եթե վարկը վերցնելու են և հետո գնալու են կանխիկով գնում անեն, ապա վերահսկելը դժվար կլինի:

«Օրենքի նպատակը խախտման համար մարդկանց պատժելը կամ բռնելը չէ, այլ՝ անկանխիկ վճարումների համակարգի զարգացման համար ի սկզբանե բարենպաստ պայմաններ ստեղծելը, որ եթե քաղաքացին ցանկանում է անպայման անկանխիկ վճարել, ապա իրեն չմերժեն»,- հայտնեց ԿԲ նախագահի տեղակալը:

Նրա խոսքով՝ նաև արտասահմանում նման կարգավորման փորձ կա, որ եթե արտարժույթի շրջանառության ոլորտում քույր ու եղբայր իրար 200 դոլար են տվել, ապա այն հնարավոր չէ բռնել և խոսքը չի գնում այն մասին, որ երկու եղբոր միջև 310000 դրամ փոխանցումը հայտնաբերեն և պատժեն:

«Եթե արտասահմանի փորձից եք խոսում, մի օրինակ էլ ես բերոմ։ Ասում է՝ արտասահմանում 60 տարեկան մարդը 16 տարեկան աղջկա հետ է պսակվում, բայց արտասահմանում կա նաև «գարաժ-սեյլ» երևույթը»,- արձագանքեց Խաչատրյանը և բացատրեց, որ նկատի չունի վարկը վերցնելը և առաջնային շուկայից գնում կատարելը, այլ այդ վարկով, օրինակ, հարևանից գնում կատարելուն, իսկ վերջինս իրավաբանական անձ չէ, արդյունքում ստացվում է, որ վարկը կանխիկացնելու համար քաղաքացին պարտադիր վճարում է բանկին, այն դեպքում, երբ այդ վարկը կարելի էր միանգամից կանխիկ տալ քաղաքացուն, քանի որ նա նախընտրում է կանխիկով գնում անել:

«Վարկը կանխիկացման համար ես բանկին վճարում եմ՝ թեկուզ 100 դրամ, բայց ինչո՞ւ պետք է վճարեմ»,- հարցրեց Խաչատրյանը և նկատեց, որ վարկի տրամադրումն արդեն ստվերային գործարք չէ և առաջարկեց 300000-ից ավելի բարձր շեմ սահմանել:

«Հայաստան» խմբակցության պատգամավորը բերեց գյուղատնտեսական վարկի տրամադրման դեպքը, երբ ֆերմերը վարկը վերցնում է այգեքաղ անող աշխատակիցներին վճարելու համար, և հարց բարձրացրեց, թե ինչո՞ւ պետք է բանկի միջոցով կանխիկացնի իր վարկը:

«Դուք ասում եք, օրենք է, բայց, քաղաքացի՛, եթե դու այն խախտես՝ մենք քեզ չենք պատժի»,- ԿԲ նախագահի տեղակալի պարզաբանումները բացատրեց Արթուր Խաչատրյանը

Վախթանգ Աբրահամյանը տեղեկացրեց, որ անկախ քննարկվող օրինագծի ընդունումից, կանխիկացման համար վճարումները թանկանալու են:

«Քաղաքականություն է գնում և բանկերն հասկանում են, որ կանխիկի հետ առնչվելն ավելի թանկ է»,-հայտնեց ԿԲ նախագահի տեղակալը, և բացատրեց, որ այդ դեպքում ինկասացիայի, անվտանգության, կորստի ապահովագրության տեսանկյունից զգալի միջոցներ են ծախսվում:

Նրա խոսքոց՝ պետք է միջոցներ գործարկվեն, որպեսզի ստիպեն 300 000 դրամից ավելի գործարքները անպայման գրանցվեն, նույնիսկ եթե գյուղացին 400 000 դրամով իր կովն է վաճառում: