Ձեր վստահելի աղբյուրը

«Որքան մենք խոսում ենք խաղաղությունից և խաղաղասիրությունից, այդքան  ստանում ենք պատասխան ագրեսիա և չեմ հիշում դեպք, որ մեր մեկնած խաղաղության ձեռքն ադեկվատ ընդունվի»,-այսօր ԱԺ-ում լրագրողների հետ հանդիպման ժամանակ հայտնեց «Պատիվ ունեմ» խմբակցության պատգամավորը:

Շեշտելով, որ խաղաղապահների ներկայությամբ հայ երիտասարդ է սպանվում և 3-ն էլ վիրավոր  են՝  պատգամավորը նկատեց, որ քաղաքակիրթ աշխարհը լուռ նայում է, թե ինչպես է Ադրբեջանը հրավառությամբ տոնում իր մարդասպանության և արցախցուն հայրենազրկման մեկ տարին:

Նա շեշտեց, որ քաղաքակիրթ մարդկությունը պետք է դատապարտի Ադրբեջանի նման գործողությունները, բայց առաջինը ՀՀ-ն պետք է դատապարտի։

«Եթե մենք չենք անում, էլ ի՞նչ ենք ուզում աշխարհից։ Խաղաղապահները կանգնած են, բայց Ադրբեջանը հայ է սպանում, ընդ որում՝ քաղաքացիական անձի, որը գործ էր անում և ի՞նչ է անում ռուսական կողմը, քանի որ սա ապտակ է նաև ռուսական կողմին»,-ասաց պատգամավորը և հավելեց. «Մենք պետք է պահանջատեր լինենք։ Ադրբեջանը նման գործողություններով հայերին մատաղ է անում իր հաղթանակին, ուստի աշխարհը պետք է արձագանքի»։

Անդրադառնալով միջադեպի վերաբերյալ ԱԺ նախագահ Ալեն Սիմոնյանի դատապարտող հայտարարությանը՝ Թովմասյանը շեշտեց, որ դատապարտելը բավարար չէ, այն ինքնաբուխ պետք է լինի, ոչ թե հարցուպատասխանի ձևաչափով և դատապարտման տեքստերը պետք է ուղարկվեն միջազգային կառույցներին։

Պատասխանելով լրագրողի դիտարկմանը, ըստ որի՝ ԱԺ նախագահի պնդմամբ պատերազմի հարցերով ստեղծվելիք քննիչ հանձնաժողովը հրավիրյալների մեծ ցանկ է ունենալու՝ «Պատիվ ունեմ» խմբակցության պատգամավորն ասաց, որ ենթադրյալ հանցագործը չի կարող իր հանցագործության մասին վարկած քննել և ճշտեց, որ նկատի ունի գործող իշխանությանը։

«Հանձնաժողովը չի կարող օբյեկտիվ լինել, քանի որ դրանում ներգրավվելու են մարդիկ, որոնք պատերազմի ժամանակ պաշտոններ են ունեցել և նրանք կանեն ամեն ինչ, որ մեղադրանք չհնչի, որ օբյեկտիվ քննություն չլինի»,-հայտարարեց Թագուհի Թովմասյանը և պնդեց, որ ընդդիմությունն ի սկզբանե պետք է հայտարարի, որ չի ընդունելու հանձնաժողովի արդյունքները։