ՌԴ ԱԳՆ հայտարարությունը՝ ԼՂ հակամարտության գոտում հրադադարի մասին եռակողմ պայմանավորվածությունների մեկամյակի կապակցությամբ
Ռուսաստանի Դաշնության արտաքին գործերի նախարարությունը հայտարարություն է տարածել՝ «Լեռնային Ղարաբաղի հակամարտության գոտում հրադադարի մասին Ռուսաստանի, Ադրբեջանի և Հայաստանի ղեկավարների եռակողմ պայմանավորվածությունների մեկամյակի կապակցությամբ։
Հայտարարության մեջ ասվում է, որ 2021 թվականի նոյեմբերի 9-ին լրանում է Ռուսաստանի Դաշնության Նախագահ Վլադիմիր Պուտինի, Ադրբեջանի նախագահ Իլհամ Ալիևի և Հայաստանի Հանրապետության վարչապետ Նիկոլ Փաշինյանի կողմից Լեռնային Ղարաբաղի հակամարտությունում հրադադարի և բոլոր ռազմական գործողությունների դադարեցման մասին հայտարարությունն ընդունելու մեկ տարին։
«Այս քայլը հնարավորություն տվեց վերջ տալ արյունահեղությանը և սկսել տարածաշրջանում խաղաղ կյանքի հաստատման գործընթացը։
Այսօր կարող ենք արձանագրել, որ 2020 թվականի նոյեմբերի 9-ի hայտարարությունում արձանագրված պայմանավորվածություններն ընդհանուր առմամբ կյանքի են կոչվում։ Միևնույն ժամանակ, կարևոր է, որ Բաքուն և Երևանը հավատարիմ մնան դրա բոլոր դրույթների հետագա իրականացմանն ու խստորեն պահպանմանը։
2020 թվականի նոյեմբերի 9-ի հայտարարության համաձայն տեղակայված ռուսական խաղաղապահ զորախումբը (ՌԽԶ) զգալի ներդրում ունի տարածաշրջանում իրավիճակի կայունացման և անվտանգության ապահովման գործում։ Մեր ադրբեջանցի և հայ ընկերները դա գնահատում են։
Ռուս խաղաղապահների մասնակցությամբ 2020 թվականի դեկտեմբերի 2-ից վերադարձվել է ընդհանուր առմամբ 122 ռազմագերի և կալանավոր։ Դրանցից 105-ը վերադարձվել է Հայաստան, իսկ 17-ը՝ Ադրբեջան, իր հերթին 3 փաթեթ ականապատ դաշտերի քարտեզները փոխանցվել են ադրբեջանական կողմին։
Ռուսական խաղաղապահ զորախումբն ակտիվորեն ներգրավված է խաղաղ կյանքի հաստատման գործում: Տարածաշրջան կանոնավոր կերպով մարդասիրական օգնություն է առաքվում, տարածքներ մաքրվում են (2020 թվականի նոյեմբերից ստուգվել է 1937 շենք, մաքրվել է 2311,5 հա տարածք և 683 կմ ճանապարհ, հայտնաբերվել է ավելի քան 26 հազար պայթուցիկ առարկա)։ Կյանքի համար անհրաժեշտ ենթակառուցվածքները վերականգնվում են. մոտ 53 հազար փախստական վերադարձել է իրենց տները։
Ռուսաստանի արտակարգ իրավիճակների նախարարության կողմից 2020 թվականի դեկտեմբերից մինչև այս տարվա հունիսը տարածաշրջան առաքվել է 1581 տոննա մարդասիրական բեռ (էլեկտրակայաններ, ինժեներական և հրշեջ սարքավորումներ, առաջին անհրաժեշտության ապրանքներ) և 800 տոննա շինանյութ։ Աշխատանքներ են տարվել հումանիտար ականազերծման ուղղությամբ։
Մենք շարունակում ենք ջանքեր գործադրել մնացած հումանիտար մարտահրավերներն արագ լուծելու համար, ներառյալ բոլոր կալանավորների ազատումը, բոլոր անհայտ կորածների ճակատագրի պարզումը, մահացածների մարմինների հանձնումը և ականապատ դաշտերի լիարժեք ճշգրիտ քարտեզների տրամադրումը։ Ակտուալ է նաև մշակութային, կրոնական և պատմական ժառանգության օբյեկտների անվտանգության ապահովումը։
Մենք մտադիր ենք մեր գործընկերների հետ հետևողականորեն իրականացնել Հարավային Կովկասում բոլոր տնտեսական և տրանսպորտային կապերի ապաշրջափակման խնդիրները, որոնք ձևակերպված են Ռուսաստանի, Ադրբեջանի և Հայաստանի ղեկավարների 2021 թվականի հունվարի 11-ի հայտարարության մեջ: Մենք բարձր ենք գնահատում եռակողմ աշխատանքային խմբի գործունեությունը՝ Ռուսաստանի Դաշնության, Ադրբեջանի և Հայաստանի Հանրապետության վարչապետների համատեղ նախագահությամբ։ Մենք ընդգծում ենք շահերի հավասարակշռության վրա հիմնված կոնկրետ նախագծերի շուտափույթ մեկնարկի անհրաժեշտությունը, ինչը կօգնի բացել Հարավային Կովկասի տնտեսական և տրանսպորտային ներուժը։
Մենք նշում ենք ադրբեջանա-հայկական պետական սահմանին լարվածության նվազեցման և դրա սահմանազատման գործընթացի մեկնարկի կարևորությունը՝ հետագա սահմանազատմամբ։ Մենք պատրաստ ենք տրամադրել բոլոր անհրաժեշտ խորհրդատվական աջակցությունը։
Կարևոր ենք համարում շարունակել ջանքերը ԵԱՀԿ Մինսկի խմբի համանախագահների գծով, առաջին հերթին՝ տարածաշրջանի առջև ծառացած սոցիալ-տնտեսական և հումանիտար խնդիրների լուծման համատեքստում։ Պահանջված է նաև ԿԽՄԿ-ի, ՄԱԿ ՓԳՀ-ի, ՅՈՒՆԵՍԿՕ-ի և այլ համապատասխան միջազգային կազմակերպությունների ներդրումը։
Կանենք ամեն ինչ՝ նպաստելու Ադրբեջանի Հանրապետության և Հայաստանի Հանրապետության միջև հարաբերությունների կարգավորմանը, աջակցելու խաղաղության նախաձեռնություններին, որոնք ուղղված են բոլոր մակարդակներում շփումների ընդլայնմանը Հարավային Կովկասի կայունության, անվտանգության և տնտեսական զարգացման ապահովման հարցերի լայն շրջանակի շուրջ։
Պատրաստ ենք նաև նպաստել Ադրբեջանի Հանրապետության և Հայաստանի Հանրապետության հասարակության ներկայացուցիչների միջև երկխոսությանը Ռուսաստանի Դաշնության մասնակցությամբ՝ ադրբեջանցի և հայ ժողովուրդների միջև վստահության մթնոլորտ ստեղծելու նպատակով։
Կողմ ենք Հարավային Կովկասի երկրների և նրանց հարևանների միջև բարիդրացիական հարաբերությունների ձևավորմանը, տարածաշրջանային փոխշահավետ համագործակցության զարգացմանը»,-ասվում է ՌԴ ԱԳՆ հայտարարության մեջ։
Լրահոս
Տեսանյութեր
ՈՒՂԻՂ. Մեկնարկեց ՍԴ նիստը, օրակարգում երկու միջազգային համաձայնագրի սահմանադրականության հարցերն են
