Ո՞ւր են այն ՀԿ-ները, որոնք երկար տարիներ բղավում էին, իսկ արդեն 3 տարի լուռ են. Աստղիկ Մաթևոսյան
«Արձանագրենք՝ Հայաստանում քաղաքացիական հասարակությունն այդպես էլ չի կայացել, դրա հիմնական պատճառներից մեկն արևմտյան ֆինանսավորումն է»,- ԱԺ-ում հասարակական կազմակերպությունների ներկայացուցիչների մասնակցությամբ ՀԿ-ներին վերաբերող օրենսդրական խնդիրների քննարկմանն ասաց «Քաղաքացիական գիտակցություն» ՀԿ ներկայացուցիչ Աստղիկ Մաթևոսյանը։
Նրա ներկայացմամբ, ՀԿ-ների, քաղհասարակության ստեղծման մեխանիզմը հետևյալն է՝ ընդհանուր շահեր ունեցող մարդիկ, որոնք ուզում են պայքարել որևէ ոլորտում, հավաքվում և ստեղծում են ՀԿ. «Հայաստանում ամեն ինչ ընթացել է հակառակ ուղղությամբ՝ եղել է ֆինանսավորում, դրա հիման վրա ձևավորվել է հասարակական կազմակերպություն, որն արդեն սկսել է առաջնորդվել, շարժվել ֆինանսավորողի շահերով»։
Ա. Մաթևոսյանը նշեց, որ քննարկմանը խոսվեց ՀԿ-ների քաղաքականացված լինելու մասին, բացառվեց, որ Արևմուտքից ֆինանսավորողները քաղաքականացվածության խնդիր չունեն։ Նա համաձայն չէ այս կարծիքի հետ, քանի որ, ըստ նրա, շահը մնում է շահ, անկախ նրանից՝ քաղաքական շահ է, թե մեկ այլ տեսակի շահ, որը հակասում է ազգային, պետական շահին։
«Այս համատեքստում մենք ունենք խնդիր։ Ունենք ՀԿ-ներ, որոնք Հայաստանում տարիներ շարունակ լուն ուղտ դարձնելով բղավել են բազմաթիվ խնդիրների մասին։
Մասնավորապես, բանակում սպանությունների դեպքերի շուրջ մեծ աժիոտաժ էին ստեղծում։ Գիտենք դեպքեր, որ, ընդհուպ, հարազատները դիակը վերցրած այս ու այն կողմ էին տանում, իսկ այսօր Արցախյան երրորդ պատերազմի ժամանակ, երբ զոհվեց մոտ 5000 զինծառայող, կամ՝ մինչ օրս սահմանին զինծառայողներ են զոհվում, ծպտուն չեն հանում։
Գիտենք՝ կան ՀԿ-ներ, որոնք լրագրողներին թարս նայելու համար մեծ աղմուկ էին բարձրացնում, հայտարարություններ տարածում, իսկ այսօր երբ լրագրեղները, ԶԼՄ-ներն իրենց իրավաբանական անձանց տեսքով ենթարկվում են բազմաթիվ հարձակումների, ո՞ւր են։ Անհետացե՞լ են։
Կան ՀԿ-ներ, որոնք նախկինում կանանց իրավունքների հետ կապված աղմուկ էին բարձրացնում, հայտարարություններ տարածում։ Ինչո՞ւ են այսօր լռում, երբ կանանց բռնի, բիրտ ձևով բերման են ենթարկում իրենց հանրային պահանջը բարձրաձայնելու համար։
Գիտենք՝ կան ՀԿ-ներ, որոնք նախկինում սոցիալական խնդիրների մասին գոռգոռում էին, աղմուկ հանում։ Այս ամենը 2018 թվականից հետո պարզապես արմատապես կտրվեց, բազմաթիվ ՀԿ-ներ սկսեցին շարժվել պարզապես իշխանության ուղեծրով՝ դառնալով «գոնգոներ»»,- ասաց Ա. Մաթևոսյանը։
Ըստ նրա, այս ՀԿ-ներն իրականում ոչ թե հետապնդում էին այն շահերը, որոնք գրված էին իրենց կանոնադրության մեջ, այլ հետապնդում էին շահեր, որոնք բխում էին ուղղակի իրենց ֆինանսավորումից։
«Քաղաքացիական գիտակցություն» ՀԿ-ի ներկայացուցիչը հանդես եկավ առաջարկներով՝ նախ նշելով, որ սրանք ոչ թե պետք է ընկալել որպես ուղիղ օրենսդրական առաջարկներ, այլ առնվազն պետք է հանրային քննարկում ծավալել։
«Բազմաթիվ երկրներում կիրառում են, օրինակ, Արևմուտքից ուղարկվող ֆինանսական միջոցներով գոյատևող ՀԿ-ների համար որևէ պիտակով նշվող տարբերակը։ Մարդիկ պետք է իմանան, թե Հայաստանում գործունեություն ծավալող ՀԿ-ները որտեղից են ֆինանսավորվում։
Պետք է խրախուսել Հայաստանի սահմաններում ինքնաֆինանսավորման մեխանիզմը, բարձրացնել քաղաքացիների մասնակցությունը ՀԿ-ների ֆինանսավորման համատեքստում։
Պետք է քաղաքացիները հստակ իմանան բոլոր այն կազմակերպությունները, որոնք երեք տարի առաջ մարդու իրավունքների բազմաթիվ խնդիրներ էին բարձրաձայնում, իսկ այսօր ինչո՞ւ են լռում»,- ասաց Ա. Մաթևոսյանը։
Հարակից հրապարակումներ`
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
